ઈલેક્શન કમિશને દિલ્હી વિધાનસભાની તારીખોનું એલાન કરી દીધું છે. દિલ્હીમાં એક સાથે બધી જ 70 વિધાનસભા બેઠકો પર 8મી ફેબ્રુઆરીએ મતદાન થશે અને 11મીએ તેનું પરિણામ આવશે. પાછલી ચૂંટણીમાં આમ આદમી પાર્ટી 70માંથી 67 બેઠકો પર વિજયી રહી હતી. જ્યારે ભાજપનાં હાથમાં માત્ર 3 જ સીટ આવી હતી. અરવિંદ કેજરીવાલ અને તેમની પાર્ટી ચૂંટણીમાં લોકોને આકર્ષવા માટે નવા નવા પ્રયોગો કરી રહી છે. દિલ્હીમાં અરવિંદ કેજરીવાલ પહેલેથી જ એક લોકપ્રિય મુખ્યમંત્રી છે ત્યારે તેમના આ કામથી યુવાનોમાં ક્રેઝ જોવા મળી રહ્યો છે.
ચૂંટણીનાં એલાન બાદ આમ આદમી પાર્ટીએ શેર કર્યું મીમ
સોશિયલ મીડિયામાં યુવાનોમાં લોકપ્રિય એવેન્જર્સનો સહારો
ભાજપનું IT સેલમાં વિચારમાં પડી ગયું
સોશિયલ મીડિયામાં સૌથી વધારે યુવાનો છે. તેમાં પણ દરરોજ તેઓ મીમ બનાવીને વાયરલ કરતા હોય છે ત્યારે અરવિંદ કેજરીવાલે જાણે યુવાનોનાં મનની વાત જાણી લીધી હોય તેમ આમ આદમી પાર્ટી પણ પોતાના ઓફીશીયલ એકાઉન્ટથી મીમ શેર કર્યો છે. ગઈકાલે જ ચૂંટણીનું એલાન કરવામાં આવ્યું જે બાદથી જ આમ આદમી પાર્ટીએ સોશિયલ મીડિયામાં જાણે ચૂંટણીનું શંખનાદ કરી દીધું હોય તેમ એવેન્જર્સનું મીમ શેર કરીને વાયરલ કર્યું હતું.
સોશિયલ મીડિયામાં ભાજપનું IT સેલ ખુબ એક્ટિવ રહે છે. લોકસભા ચૂંટણી જીતવામાં પણ ભાજપે સોશિયલ મીડિયાનો ખુબ સહારો લીધો હતો ત્યારે આમ આદમી પાર્ટીએ પણ તેનો તોડ શોધી નાખ્યો છે. આમ આદમી પાર્ટીએ ટ્વીટ કર્યું હતું કે દિલ્હી ઈલેક્શનની તારીખોની જાહેરાત થઇ ગઈ છે. જેથી એવેન્જર્સ અસેમ્બલ એવી અપીલ કરી હતી.
નોંધનીય છે કે જયારે પણ એવેન્જર્સમાં યુદ્ધની ઘોષણા કરવામાં આવે છે ત્યારે બધા જ એવેન્જર્સને એકઠા કરવા માટે એવેન્જર્સ એસેમ્બલ એવું કહેવામાં આવે છે. જે બાદ બધા જ એવેન્જર્સ ભેગા થતાં હોય છે. ત્યારે દિલ્હીમાં ચૂંટણી માટે પણ આમ આદમી પાર્ટીએ પણ આ જ વાક્યનો ઉપયોગ કરી મીમ બનાવતા લખ્યું છે કે એવેન્જર્સ અસેમ્બલ.
હવે જોવાનું એ રહે છે કે ભાજપ શું જવાબ આપે છે. જો ભાજપ પણ આ જ અંદાજમાં જવાબ આપે તો આ ચૂંટણીમાં મીમ ખુબ પ્રચલિત રહેશે તે નક્કી છે.