પશ્ચિમ બંગાળ સહિત દેશનાં ચાર રાજ્ય અને એક કેન્દ્રશાસિત પ્રદેશમાં આ વર્ષે વિધાનસભાની ચૂંટણી યોજાવાની છે. આ તમામ ચૂંટણીમાં આખા દેશની નજર પશ્ચિમ બંગાળ પર મંડાયેલી છે.
સી-વોટર સર્વેમાં બંગાળમાં ટીએમસીની વાપસી
મમતા બેનરજી સૌથી વધુ લોકોની પસંદગીના CM ઉમેદવાર
વિધાનસભા ચૂંટણીમાં ટીએમસીમાં 158, ભાજપને 102 બેઠક
સત્તાધારી તૃણમૂલ કોંગ્રેસ (ટીએમસી)નાં અધ્યક્ષ મમતા બેનરજી દ્વારા સરકાર બચાવવા માટે ભરપૂર પ્રયાસો થઈ રહ્યા છે તો બીજી તરફ લોકસભા ચૂંટણીમાં શાનદાર પ્રદર્શનથી ઉત્સાહિત થયેલો ભાજપ પણ કિસ્મતનો દાવ અજમાવી રહ્યો છે. ચૂંટણીપંચે હજુ સુધી વિધાનસભા ચૂંટણી માટેની તારીખની જાહેરાત કરી નથી પણ બંગાળમાં રાજનીતિ અત્યારથી જ જોર પકડી રહી છે.
સી વોટરના સરવેમાં મમતા બેનરજી સૌથી વધુ લોકોની પસંદગીનાં મુખ્યપ્રધાનપદનાં ઉમેદવાર તરીકે આગળ જોવા મળી રહ્યાં છે. મુખ્યપ્રધાનપદ માટે મમતા બેનરજીને રાજ્યના ૪૮.૮ ટકા લોકોએ પસંદ કર્યાં છે. ભાજપના અધ્યક્ષ દિલીપ ઘોષ અને બીસીસીઆઈના અધ્યક્ષ સૌરવ ગાંગુલી પશ્ચિમ બંગાળના સીએમપદ માટેના ત્રીજા ઉમેદવાર તરીકે પસંદગી પામી રહ્યા છે.
બંગાળના મતદારોએ આપેલા અભિપ્રાયમાં સ્પષ્ટ જોવા મળી રહ્યું છે કે મમતા દીદી માટે મોટી રાહતનાં એંધાણ છે. સી વોટર સરવેમાં મમતા બેનરજી મુખ્યપ્રધાનપદ માટે લોકોની પહેલી પસંદ છે. આ સર્વે અનુસાર તેમના સત્તામાં પરત આવવાનું અનુમાન પણ કરાઈ રહ્યું છે.
સરવે અનુસાર મમતા બેનરજીને લગભગ બે ટકા વોટ અને ૫૩ સીટનું નુકસાન થઈ શકે છે. એબીપી-સી વોટર સરવે અનુસાર ટીએમસીને ૪૩ ટકા વોટ શેર સાથે ગઈ ચૂંટણીની ૨૧૧ બેઠકની સરખામણીએ આ વખતે ૧૫૮ સીટ જ મળવાનું અનુમાન છે. ભાજપ ગત ચૂંટણીમાં ૧૦.૨ ટકાની તુલનામાં ૩૭.૫ ટકા વોટ શેર સાથે ત્રણ ગણી લાંબી છલાંગ લગાવીને ૧૦૨ સીટ જીતી શકે છે. ડાબેરી પક્ષો અને કોંગ્રેસને ભારે નુકસાન થવાનું અનુમાન છે. તેમના વોટ શેર ગત ચૂંટણીના ૩૨ ટકાથી ઘટીને ૧૧.૮ ટકા અને બેઠકો ૭૬થી ઘટીને ૩૦ સુધી આવી શકે છે.
સરવેના દાવા પ્રમાણે તામિલનાડુ અને પુડ્ડુચેરીમાં સત્તા પરિવર્તનના સ્પષ્ટ સંકેત જોવા મળી રહ્યા છે. સત્તાધારી એઆઈએડીએમકેને ગઈ વખતની ૧૩૬ના બદલે ફક્ત ૬૪ સીટ મળી રહી છે તો વિપક્ષ ડીએમકે ૧૬૨ સીટ જીતીને સત્તામાં આવે તેવાં અનુમાન છે. સરવે અનુસાર ૩૬.૪ ટકા લોકોનું સમર્થન ડીએમકેના એમ.કે. સ્ટાલિન મુખ્યપ્રધાન બને તે માટે છે. પુડ્ડુચેરીમાં કોંગ્રેસના કે.વી. નારાયણસામી મુખ્યપ્રધાનપદ માટે સૌથી વધુ પસંદગી પામી રહ્યા છે. તેઓ ગત ચૂટંણીની ૧૨ના બદલે ૧૬ સીટ જીતે તેવાં અનુમાન છે. યુપીએની સીટ પણ ઘટે તેવું અનુમાન છે.
સી વોટર સરવેના અનુમાન અનુસાર આસામમાં ભાજપની સરકાર બની શકે છે. સર્બાનંદ સોનોવાલ મુખ્યપ્રધાનપદના સૌથી લોકપ્રિય ઉમેદવાર બની શકે છે. બીજા નંબરે ભાજપના હિમંત બિસ્વ સરમા અને કોંગ્રેસના ગૌરવ ગોગાેઈ ત્રીજા નંબરે છે. સરવે અનુસાર ભાજપ ગઠબંધન ૪૩ ટકા વોટ શેર સાથે ૭૭ સીટ પર જીત સાથે સત્તામાં પરત આવી શકે છે.