કોરોનાએ આર્થિક મોરચે પર હાહાકાર મચાવવાનું શરૂ કરી દીધું છે. વીએમ પોર્ટફોલિયોના રિસર્ચ હેડ વિવેક મિત્તલનું કહેવું છે કે કોરોના વાઇરસના કારણે દુનિયાભરમાં બિઝનેસ એક્ટિવિટી ઠપ થઇ ગઇ છે અને તેથી ગ્લોબલ ઇકોનોમીમાં મોટા કડાકા જોવા મળશે.
અમેરિકા અને યુરોપમાં કંપનીઓના પ્રમોટર્સના રૂપિયા ત્રણ લાખ કરોડ ડોલર ડૂબી શકે
બેન્ક ઓફ અમેરિકા કોર્પોરેશનના અર્થશાસ્ત્રીઓએ પોતાના ક્લાયન્ટ્સને આપી ચેતવણી
ભારતીય શેરબજારમાં પણ એક અઠવાડિયામાં રૂ. 11 લાખ કરોડ ડૂબી ગયા
ક્વાર્ટ્ઝના રિપોર્ટ અનુસાર દુનિયાભરનાં શેરબજારોમાં જો ઘટાડો ચાલુ રહેશે તો કોર્પોરેટ ડેબ્ટ વધતું જશે અને તેનાથી અમેરિકા અને યુરોપમાં કંપનીઓના પ્રમોટર્સના રૂપિયા ૨૧૦ લાખ કરોડ (ત્રણ લાખ કરોડ ડોલર) ડૂબી શકે છે, કારણ કે આ કંપનીઓ તેમનું દેવું ચૂકવી શકશે નહીં અને ડિફોલ્ટમાં આવી જશે.
બેન્ક ઓફ અમેરિકા કોર્પોરેશનના અર્થશાસ્ત્રીઓએ પોતાના ક્લાયન્ટ્સને ચેતવણી આપતાં જણાવ્યું છે કે ગ્લોબલ ગ્રોથ ઘટીને ૨.૮ ટકા પર આવી શકે છે, જે ૨૦૦૯ બાદ સૌથી ઓછી રહેશે. દુનિયાની બીજા નંબરની સૌથી મોટી અર્થવ્યવસ્થા ચીનનો જીડીપી ગ્રોથ પણ ઘટીને વર્ષ ૧૯૯૦ની નીચલી સપાટીએ આવી શકે છે. પરિણામે ભારત સહિત ગ્લોબલ શેરમાર્કેટમાં મોટો ઘટાડો જોવાઇ શકે છે. અત્યાર સુધી શેરબજાર તૂટવાના કારણે અમેરિકન શેરબજારના બે લાખ કરોડ ડોલર ડૂબી ચૂક્યા છે.
ભારતીય શેરબજારમાં પણ એક અઠવાડિયામાં રૂ. ૧૧ લાખ કરોડ ડૂબી ગયા છે. ઓસ્ટ્રેલિયાનો મુખ્ય બેન્ચમાર્ક ઇન્ડેક્સ એએસએક્સ-૨૦૦ છેલ્લા પાંચ દિવસમાં ઘટવાના કારણે ૨૦ હજાર કરોડ ડોલર (રૂ.૧૪.૨ લાખ) ડૂબી ગયા છે. તેની માર્કેટ કેપ બે લાખ કરોડ ડોલરની નીચે આવી ગઇ છે. અત્રે ઉલ્લેખનીય છે કે સમગ્ર દુનિયામાં બિઝનેસ પ્રવૃત્તિ ઠપ થઇ ગઇ છે અને કારખાનાઓમાં ઉત્પાદન બંધ થતાં કંપનીઓની આવક પર વિપરીત અસર પડી રહી છે. જો કર્મચારીઓને સમયસર પગાર નહીં મળે તો સમગ્ર બિઝનેસ સિસ્ટમમાં ઊથલપાથલ આવી શકે છે.