મહામારી / લૉકડાઉનને કારણે ગુજરાતમાં અટવાઇ પડેલ કર્ણાટકના વેપારીઓ ગાડીમાં પસાર કરે છે દિવસ રાત

• લોકડાઉનમાં ફસાયા વેપારી 
• `કાર' બની વેપારીઓનું ઘર 
• છેલ્લા 22 દિવસથી ફસાયા વેપારી 

શહેરોમાં સન્નાટો છે. રસ્તાઓ સુમસામ છે. શહેરના દ્વારે પોલીસનો પહેરો કડક છે. ક્યાંક કર્ફયૂ છે. તો ક્યાં લોકડાઉનનું કડક પણે અમલીકરણ. તેવામાં જો કોઈ મુશ્કેલીમાં મુકાયા હોય તો તે છે પરપ્રાંતિ લોકો. 

22 દિવસોથી ગુજરાતની બોર્ડર પર વિતાવે છે સમય 

કર્ણાટકના વેપારીઓ જે છેલ્લા 22 દિવસોથી આ રીતે ગુજરાતની બોર્ડર પર ફસાઈને બેઠા છે.  કારણ કે, બોર્ડર બંધ છે. ભિલાડ ચેકપોસ્ટ પરથી ન તો કોઈ મહારાષ્ટ્રમાં જઈ શકે છે. કે નતો કોઈ ગુજરાતમાં એન્ટ્રી કરી શકે છે. તેવામાં જવું તો જવું ક્યાં. આ બંને વેપારીઓ છેલ્લા 22 દિવસથી પોતાની કારમાં જ જીવન વિતાવી રહ્યા છે. ત્યારે તેની મુશ્કેલી. તેમના પરિવારની ચિંતા, ખાવું. પિવું. સહિતની અનેક તકલીફોનો અંદાજ તમે લગાવી જુઓ. તમે ખુદ સાંભળો કે કેવી રીતે તેઓ ફસાયા અને કેવી મુશ્કેલીઓ વેઠી રહ્યા છે.

કર્ણાટકમાં સોપારીનો ધંધો કરે છે વેપારી 

મહત્વનું છે કે, કર્ણાટકમાં સોપારીનો ધંધો કરતા આસિફ હુસેન અને મોહંમદ ટકીન 22 દિવસથી આ રીતે ગુજરાત મહારાષ્ટ્ર બોર્ડર પર ફસાયા છે. છતાં આજ સુધી કોઈપણ વહીવટી તંત્ર તેમની મદદે પહોંચ્યું નથી. વલસાડ જિલ્લાના કલેક્ટરને તો કર્ણાટકના અધિકારીઓ દ્વારા રજૂઆત પણ કરાઈ છે. છતાં કલેક્ટર ઊંઘતા નજરે પડ્યા છે. અને હજૂ ક્યારે ઉઠશે તે તો ખબર નથી. જોકે કલેક્ટરની આ લાપરવાહી ક્યાંકને ક્યાંક તેની કામગીરી પર પણ સવાલો ઉભા કરે છે. 

બંને વેપારીઓએ પ્રધાનમંત્રી મોદીના નિર્ણયને આવકાર્યો

જોકે અહીં મહત્વની વાત તો એ છે કે, લોકડાઉનમાં આટલી મુશ્કેલી વેઠવા છતાં આ બંને વેપારીઓએ પ્રધાનમંત્રી મોદીના નિર્ણયને આવકાર્યો. બીજી તરફ અહીં પણ માનવતાની તસવીરો જોવા મળી. સ્થાનિક લોકોને આ બંને વેપારી અંગે માહિતી મળતા જ તેઓ તેમની મદદે પહોંચી ગયા. અને છેલ્લા 22 દિવસોથી તેમની તમામ પ્રકારની મદદ પણ કરી રહ્યા છે.