ચિંતાજનક / ગુજરાતમાં સતત ઘટતા કોરોના કેસ વચ્ચે આ મોટા શહેરમાં કેસ વધતા ટેન્શનમાં વધારો, ટેસ્ટિંગ ઘટ્યા

• ગુજરાત મે મહિનાની શરૂઆતથી જ કોરોના કેસ ઘટ્યા 
• ટેન્શન વધ્યુ : વડોદરામાં ટેસ્ટિંગ ડોમ બંધ, નવા 862 કેસ 
• અમદાવાદ સહિતના શહેરોમાં સતત ઘટી રહ્યા છે કેસ 

ગુજરાતમાં ઘટતા કેસ વચ્ચે વડોદરામાં વધ્યું ટેન્શન 

ગુજરાત સહિત આખા દેશમાં કોરોના વાયરસની બીજી લહેરનો કહેર ચાલી રહ્યો છે ત્યારે ગુજરાતમાં મે મહિનાની શરૂઆતથી જ કેસમાં સતત ઘટાડો નોંધાઈ રહ્યો છે. કેસમાં ઘટાડો આવતા હવે આજથી ગુજરાતમાં ધીમે ધીમે છૂટછાટો આપવામાં આવી રહી છે ત્યાં વડોદરામાં અવળી ગંગા જોવા મળી રહી છે. બધા શહેરોમાં જ્યાં કોરોના વાયરસના કેસ ઘટી રહ્યા છે ત્યાં વડોદરામાં કોરોના વાયરસના કેસ વધી રહ્યા છે. 

ટેસ્ટ ઘટ્યા છતાં કેસ વધ્યા 

વડોદરામાં એક દિવસમાં કોરોના નવા 862 કેસ સામે આવ્યા છે. વડોદરામાં 4 દિવસથી ટેસ્ટિંગ ડોમ પણ બંધ કરી દેવામાં આવ્યા છે. 5 વિધાનસભા વિસ્તારના 10 ટેસ્ટિંગ ડોમ બંધ કરી દેવામાં આવ્યા તથા તેની પાછળના કારણ આપવા પર તંત્રએ મૌન સેવ્યું છે. સતત ઓછા થતાં ટેસ્ટિંગ છતાં વડોદરામાં કોરોના વાયરસના કેસ વધી રહ્યા છે. જેના કારણે ટેન્શન વધ્યું છે. 

અમદાવાદમાં કોરોના સંક્રમણથી આંશિક રાહત

કોરોના વાયરસનો સૌથી વધારે કહેર અમદાવાદમાં જોવા મળ્યો હતો ત્યારે અમદાવાદમાં કોરોના વાયરસના કેસની સાથે સાથે માઇક્રો કન્ટેન્ટમેન્ટ ઝૉન પણ ઘટી રહ્યા છે. છેલ્લા 3 દિવસથી માઇક્રો કન્ટેનમેન્ટમાં કોઈ વધારો થયો નથી ત્યારે શહેરમાં હાલ 29 જ માઇક્રો કન્ટેનમેન્ટ ઝૉન બચ્યા છે. નવા કેસમાં પણ સતત ઘટાડો નોંધાઈ રહ્યો છે. 

કોરોના વાયરસ કેસ અપડેટ (21 મે, 2021)

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં એક દિવસમાં કોરોનાના 4,773 નવા કેસ નોંધાયા છે, તો 64 લોકોના સંક્રમણના કારણે મોત નિપજ્યા છે. આજે ફરી એક વખત ગુજરાતમાં, કોરોનાની બીજી લહેરમાં કોરોનાના કેસ કરતા આજે સાજા થનારનો આંકડો વધુ છે. જો કે, ગઈકાલ કરતા મોતની સંખ્યામાં ઘટાડો થયો છે. રાજ્યમાં 64 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 9404 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ઘટાડો જોવા મળ્યો છે. જો કે, નવા કેસની સામે આજે ગુજરાતમાં 8308 દર્દીઓ સાજા થયાં છે. આ સાથે જ અત્યાર સુધીમાં 6,77,798 દર્દીઓ કોરોના મુક્ત થયાં છે. આમ આજે કેસ પણ ઘટ્યા અને સાજા થનારનો આંકડો રાહત આપનારો છે. રાજ્યમાં હાલ 716 લોકો વેન્ટિલેટર પર છે. એક્ટિવ કેસનો આંકડો 98,018 પર પહોંચ્યો છે.