માતાજીના ગીતમાં ધાર્મિક લાગણી દુભાતા લોકગાયકો મેદાને આવી ગયા છે. 'ગરબે કી રાત' ગીતને લઇને કિર્તીદાન ગઢવીએ પણ નારાજગી વ્યક્ત કરી છે.અને તાત્કાલિક ગીતને હટાવી લેવાની માંગણી કરી છે. તેમજ લાગણી દુભાણી હોવાની વાત કરી રાહુલ વૈદ્ય અને તેની ટીમને આ ગીતના શબ્દો ફેર કરવાનો આગ્રહ કર્યો છે તેમજ ગીતમાં બતાવવામાં આવેલી અશ્લીલતાને ધ્યાને રાખી એક ટકોર પણ કરી છે કે આ રીતે માતાજીના નામ પર કોઈ અશ્લીલતા ચલાવી લેવામાં આવશે નહીં. માતા મેલડી અને માતા મોગલનું નામ ગીતમાં તાત્કાલિકના ધોરણે દૂર કરવા માંગ કરી છે. મહત્વનું છે કે કિર્તીદાન ગઢવી હાલ અમેરિકાના નવરાત્રી પ્રવાસ પર છે જ્યા તેમણે આ ગીત વિશે ખબર પડતાં વીડિયો જાહેર કરી વિરોધ નોંધાવ્યો છે.
રાહુલ વૈદ્યને મળી રહી છે જાનથી મારી નાખવાની ધમકી:રાહુલ વૈદ્યના પ્રવક્તા
રાહુલ વૈદ્યના પ્રવક્તાએ આ વાતની પુષ્ટિ કરી છે. તેણે કહ્યું, હા આ સાચું છે કે આવા મેસેજ અને કોલ્સની સંખ્યા ગઈકાલ રાતથી વધી ગઈ છે, મેસેજમાં લોકો રાહુલ વૈદ્યને જાનથી મારી નાંખવાની અને તેની સામે એફઆઈઆર નોંધવાની વાત કરી રહ્યાં છે. અમે માતા દેવીનો આદર સાથે ઉલ્લેખ કર્યો હતો અને તેનો અર્થ કોઈની લાગણીઓને ઠેસ પહોંચાડવાનો નહોતો. જોકે, એ હકીકતને સમજીને કે લોકોનો અમુક વર્ગ ગીતમાં માતા દેવીનું નામ પસંદ નથી કરતા, અમે તેનું સન્માન કરીએ છીએ અને અમારા સ્તરે તેને સુધારવા માટે કામ કરી રહ્યાં છીએ.
ગરબાના ગીત 'ગરબે કી રાત'ને લઇને વિવાદે જોર પકડતા બૉલીવુડ કલાકાર રાહુલ વૈદ્યએ માફી માંગતા કહ્યું છે કે મોગલ માતાના નામને લઇને અજાણતા ઠેંસ પહોંચી છે, કોઇની ભાવના કે કોઇને ઠેંસ પહોંચાડવાનો ઇરાદો નથી હોતો, આ ભૂલ અજાણતા થઇ છે જેને લઈને હું જેની લાગણી દુભાઈ હોય તેની માફી માગુ છું.
શનિ-રવિની રજાને લઇને ટીમ રજા પર છે તો ધીરજ રાખજો: રાહુલ વૈદ્ય
મહત્વનું છે કે 'ગરબે કી રાત' ગીતમાં ડાન્સની અશ્લીલતાને લઈને વિરોધ કરવામાં આવી રહ્યો છે.ગીતમાં 'રમવા આવો માંડી રમવા આવો આજ માત મેલડી રમવા આવો, રમવા આવો માંડી રમવા આવો આજ માત મોગલ માંડી રમવા આવો' તેવા શબ્દનો ઉપયોગ કરાયો છે પણ ગીતની કોરિયોગ્રાફીમાં મોટી ક્ષતિ છે. આ લિરિક્સ જ્યારે વાગે છે ત્યારે નીયા શર્મા અશ્લીલ ડાન્સ કરતી જોવા મળી રહી છે જેનો મોટા પાયે વિરોધ થતાં રાહુલ વૈદ્યએ સોશિયલ મીડિયામાં વીડિયો પોસ્ટ કરી આ માફી માંગતા કર્યું છે કે માતાની ભક્તિને ધ્યાને લઇ મે ગીત બનાવ્યું હતું, કોઇની ભાવના કે કોઇને ઠેંસ પહોંચાડવાનો ઇરાદો નથી હોતો, મોગલ માતાનો ઉલ્લેખ છે તે શબ્દને હું હટાવી દઇશ, શનિ-રવિની રજાને લઇને ટીમ રજા પર છે, મેં ફેરફાર કરવાનું સૂચન કરી દીધું છે.મને 3 દિવસનો સમય આપશો, ત્યાં સુધી સંયમ રાખશો.
હમ જો કહેતે હૈ વો કરતે ભી હૈ. :રાજભા ગઢવી
લોક સાહિત્યકાર રાજભા ગઢવીને આ ગીત તેમના ચાહક વર્ગ દ્વારા મોકલવામાં આવ્યું હતું. અને ગીતમાં વર્ણવાયેલા શબ્દો અને ડાન્સને લઈને મોટો વિરોધ શૂર રેલાવવામાં આવ્યા.રાજભા ગઢવીએ ચીમકી ઉચ્ચારતા કહ્યું છે કે માતાજીના નામે આવી અશ્લીલતા નહીં ચલાવી લેવાય, તેમને રાહુલ વૈદ્યને ખુલ્લો પડકાર આપતા કહ્યું છે કે આ ગીતને તાત્કાલિકના ધોરણે સોશિયલ સાઈટ પરથી ઉતારી દેવામાં આવે. હિન્દી શબ્દનો પ્રયોગ કરી વિરોધ કર્યો કે યે ગીત ઉતર જાના ચાહિયે વરના અચ્છા નહીં હોગા. હમ જો કહેતે હૈ વો કરતે ભી હૈ. આમ આ ગીતને લઈને અન્ય કલાકારો પણ રોષ ઠાલવી રહ્યા છે.સોશિયલ મીડિયા પર લોકો ગીતની ઝાટકણી કાઢી માફી માંગવાની વાત કરી રહ્યા છે.જે બાદ બૉલીવુડ કલાકાર રાહુલ વૈદ્યએ માફી લીધી છે અને 3 દિવસમાં ગીતમાં સુધારો કરવાની વાત કરી છે.