આક્ષેપ / છોટાઉદેપુરમાં SP અને SP કચેરીના તમામ સ્ટાફ સામે ફરિયાદ, પોલીસના મારથી સગીરને થયું પેરાલિસિસ, કોર્ટે ગાંધીનગર CIDને જુઓ શું કર્યા આદેશ

• છોટાઉદેપુરમાં સગીરને માર માર્યા કેસમાં નોંધાઇ ફરિયાદ
• SP અને SP કચેરીના તમામ સ્ટાફ, ડોક્ટરો સહિત 15 સામે ફરિયાદથી ખળભળાટ
• કોર્ટે ગાંધીનગર CIDને તપાસ કરવા કર્યા આદેશ 

છોટાઉદેપુરમાં સગીરને માર માર્યા કેસમાં છોટાઉદેપુર પોલીસવડા સહિત 15 સામે પોલીસ ફરિયાદ નોંધાતા ચકચાર મચી છે. ફરિયાદમાં SP અને SP કચેરીના તમામ સ્ટાફ સહિત 15 સામે રાવ કરાઈ છે. જેને પગલે કોર્ટે ગાંધીનગર CIDને તપાસ કરવા આદેશ જારી કર્યા હોવાનું જાણવા મળી રહ્યું છે. મહત્વનું છે કે છોટાઉદેપુરના જબુગામ ખાતે હત્યાના કેસમાં ફરિયાદી પિતા અને તેના સગીર વયના પુત્રને પૂછપરછ માટે લવાયા હતા. આ દરમિયાન પિતા પુત્રે કાબુલાત ન આપતા આડેધડ માર મારવામા આવ્યો હતો. આ અંગે ખોટી રીતે માર માર્યાનો પરિવારજનોએ આક્ષેપ કર્યો હતો. એટલું જ નહી પોલીસના મારથી સગીરને પેરાલિસિસ થયું હોવાનો પણ પરિવારજનોએ આરોપ લગાવ્યો હતો. જેને  પગલે ખળભળાટ મચી ગયો છે.

શું હતો સમગ્ર મામલો ? 

આ કેસની ફરિયાદમાં જણાવ્યા મુજબ વિગત અનુસાર ગત તારીખ 6 નવેમ્બરના રોજ છોટાઉદેપુરના જબુગામ ખાતે દલાજી વણઝારાને 50 લાખની ખાંડણી બાબતે મોતને ઘાટ ઉતારી દેવામાં આવ્યા હતા. આ પ્રકરણમાં ફરિયાદી અને તેના સગીર વયના દીકરાની સંડોવણી હોવાની શંકાના આધારે પોલીસ દ્વારા બંનેની પૂછપરછ માટે પોલીસ મથકે ગયા હતા. આ દરમિયાન એલસીબી ઓફિસે પૂછપરછ કરવામાં આવી હતી. જે વેળાએ જિલ્લા પોલીસ વડા પણ ત્યાં પહોંચ્યા હતા અને જ્યાં સુધી હત્યાનો ગુનો ન કબૂલે ત્યાં સુધી માર મારવાની સૂચના આપી હતી.

સીઆઇડી ક્રાઇમ ગાંધીનગરને તપાસ માટે આદેશ કર્યા
ત્યારબાદ પોલીસ સ્ટાફે ઢોર માર મારતા સગીર વયના પુત્રને ગંભીર ઇજા પહોંચી હતી. જેને લઈને તેને છોટાઉદેપુર ખાતે આવેલ મેડિટોપ હોસ્પિટલ ખાતે ખસેડાયો હતો. ત્યારબાદ વધુ સારવારની જરૂર જણાતાં વડોદરાની વિન્સ હોસ્પિટલમાં લઈ જવાયો હતો. જ્યાં પણ પૂરી સારવાર ન આપી હોવાની રાવ ઉઠી છે. બાદમાં વડોદરાની આદિકયુરા હોસ્પિટલમાં ખસેડાયો હતો. 10 દિવસની સારવાર બાદ ઘરે મોકલાયો હતો પણ અહીં બીલ બાબતે માથાકૂટ થઈ હોવાના પણ આરોપ લાગી રહ્યા છે. બાદમાં પોલીસ કર્મી અને અધિકારીઓ ઉપરાંત જુદી જુદી હોસ્પિટલોના તબીબ સામે બાળ અદાલતમાં ફરીયાદ નોંધાઇ હતી. આથી બાળ અદાલતે સીઆઇડી ક્રાઇમ, ગાંધીનગરને તપાસ માટે આદેશ કર્યા છે.