મુખ્યમંત્રી કાર્યાલયના PRO હિતેશ પંડ્યાએ રાજીનામું આપ્યું છે, મહાઠગ કિરણ પટેલ કેસમાં હિતેશ પંડ્યાના દીકરા અમિત પંડ્યાનું નામ સામે આવ્યું હતું
CM કાર્યાલયના PRO હિતેશ પંડ્યાએ આપ્યુ રાજીનામું
કિરણ પટેલ કેસમાં હિતેશ પંડ્યાના દીકરા અમિતનું નામ હતું
અગાઉ અમિત પંડ્યાની પક્ષના પ્રાથમિક સભ્ય પદેથી હકાલપટ્ટી કરાઈ હતી
મુખ્યમંત્રી કાર્યાલયના PRO હિતેશ પંડ્યાએ રાજીનામું આપ્યું છે. મહાઠગ કિરણ પટેલ કેસમાં હિતેશ પંડ્યાના દીકરા અમિત પંડ્યાનું નામ સામે આવ્યું હતું જેને લઈ અટકળો મનાય છે કે, હિતેશ પડ્યાંના રાજીનામાનું કારણ મહાઠગ કિરણ પટેલ કેસ છે.
— VTV Gujarati News and Beyond (@VtvGujarati) March 24, 2023
અમિત પંડ્યાની હકાલપટ્ટી કરાઈ હતી
હિતેષ પંડ્યાના પુત્ર અમિત પંડ્યા ભાજપના પ્રાથમિક સભ્ય હતા. તેમની નિમણૂક પ્રદેશ ભાજપે સોશિયલ મીડિયા સેલમાં કરી હતી. આ વિવાદ વકરતા ભાજપે અમિત પંડ્યાની પક્ષના પ્રાથમિક સભ્ય પદેથી હકાલપટ્ટી કરી હતી તેમજ સોશિયલ મીડિયા સેલમાંથી પણ દૂર કરી દીધા હતા.
કિરણ પટેલના અનેક ખુલાસા
અમદાવાદમાં મહાઠગ કિરણ પટેલ અંગે વધુ એક ખુલાસો થયો છે. જમીની હકીકત પરથી VTV NEWSએ પરદો ઉચક્યો છે. હાઈ પ્રોફાઈલ જીવન જીવતા કિરણ પટેલની વતનમાં અલગ છબી છે. કરોડોના બંગલામાં રહેતા કિરણ પટેલની માતા જર્જરિત મકાનમાં રહે છે. દીકરાના કારસ્તાનના કારણે માતાએ પણ ઘર છોડ્યું હતું. લક્ઝુરિયસ ગાડીઓમાં રોફ જમાવતા કિરણની માતા એકલવાયું જીવન જીવે છે. ગામના લોકોએ પણ ઠગની સ્થિતિનું વર્ણન કર્યું છે.
કિરણ પટેલે જગદીશ ચાવડાના બંગલા પર બગાડી હતી નજર
PMOમાં નોકરી કરું છું અને મારી બહુ મોટી ઓળખાણ છે આવું કહી છેતરપિંડી કરનાર મહાઠગ કિરણ પટેલે પૂર્વ મંત્રીના ભાઈને પણ નથી મૂક્યા. પૂર્વ મંત્રી જવાહર ચાવડાના ભાઈ જગદીશ ચાવડાના સિંધુભવન રોડ પર આવેલી નીલકંઠ ગ્રીન સોસાયટીના બંગલા પર કિરણ પટેલે નજર બગાડી હતી. મોટી મોટી ઓળખાણો આપીને અને મીઠી મીઠી વાતો કરીને જગદીશ ચાવડાનોનો બંગલો ઝડપી લેવા માટે ષડયંત્ર રચ્યું હતું. જગદીશ ચાવડાના બંગલાના રિનોવેશનના નામે કિરણ પટેલે પોતાનો દાવો મુક્યો હતો. વાસ્તુ કરાવી કિરણ પટેલે બંગલો પચાવવાનો પ્રયાસ કર્યો હતો. જગદીશ ચાવડાના બંગલામાં કિરણ પટેલે પોતાનું બોર્ડ પણ લગાવી દીધું હતું. એટલું જ નહીં બાદમાં કિરણ પટેલ સિવિલ કોર્ટમાં ખોટો કેસ પણ દાખલ કર્યો હતો.
અનેક લોકોને છેતરી ચૂક્યો છે મહાઠગ
આપને જણાવી દઈએ કે, કિરણ પટેલ અત્યાર સુધીમાં ઘણાં લોકોને ચૂનો ચોપડી ચૂક્યો છે. તેની વિરુદ્ધ વડોદરામાં પણ ફરિયાદ નોંધાઈ ચૂકી છે. કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી.
શું હતો સમગ્ર મામલો ?
જમ્મુ-કાશ્મીરમાં પોલીસે એક એવા ઠગની ધરપકડ કરી છે, જે પોતાને PMO ઓફિસર ગણાવતો હતો. ગુજરાતમાં રહેતા આ વ્યક્તિનું નામ કિરણ પટેલ છે. તે પોતાને PMOના એડિશનલ ડાયરેક્ટર તરીકે ઓળખાવતો હતો. આટલું જ નહીં ઠગ Z પ્લસ સિક્યોરિટી, બુલેટપ્રૂફ એસયુવીની સુવિધાઓ પણ લઈ ગયો હતો. તે હંમેશા ફાઈવ સ્ટાર હોટલમાં રહેતો હતો. પોલીસે શંકાના આધારે તપાસ કરી તો તે નકલી અધિકારી હોવાનું બહાર આવ્યું. તેની 10 દિવસ પહેલા ધરપકડ કરવામાં આવી હતી, પરંતુ તેને ગુપ્ત રાખવામાં આવી હતી. જોકે પોલીસે ગુરુવારે ધરપકડનો ખુલાસો કર્યો હતો.