રાજકોટ / ગુજરાતમાં કોરોના નિયંત્રણને લઈને CM ભૂપેન્દ્ર પટેલનું નિવેદન, તમારે જાણવું જરૂરી

• કોરોનાની સ્થિતિ અંગે CMનું મોટું નિવેદન
• હાલના તબક્કે વધુ નિયંત્રણો જરૂરી નથી
• પહેલા ભાજપનો કાર્યકર માસ્ક પહેરે : CM 

ગુજરાતમાં એકાએક કોરોના કેસ વધી રહ્યા છે ગઈ કાલે 500થી વધુ કોરોના કેસ સામે આવ્યા છે, ત્યારે મુખ્યમંત્રી ભૂપેન્દ્ર પટેલનું મહત્વનું નિવેદન સામે આવ્યું છે. રાજકોટમા કાર્યકર્તાઓ સાથે સંવાદ કાર્યક્રમમાં CMએ નિવેદન આપતા કહ્યું કે હાલના તબક્કે વધુ નિયંત્રણો નાખવાની જરૂર નથી, ગુજરાતમાં કોરોનાની સ્થિતિ હાલ કાબૂમાં છે. જેથી નિયંત્રણો નાખવની કોઈ જરૂરિયાત દેખાતી નથી. અહીં માસ્ક અંગે પણ મુખ્યમંત્રીએ કાર્યકર્તાઓને ટકોર કરી હતી અને કાર્યર્તાઓને માસ્ક પહેરવાનું સુચન કર્યું હતું. મુખ્યમંત્રીએ એમ પણ જણાવ્યું કે લોકોને દંડ કરતા પહેલા આપણે પણ નિયમોનું પાલન કરવું જરૂરી છે. 

હાલના તબક્કે વધુ નિયંત્રણો જરૂરી નથી

ઉલ્લેખનિય છે કે આજે મુખ્યમંત્રી રાજકોટની મુલાકાતે છે ત્યારે તેમના દ્વારા આજે રાજકોટ ખાતે સિવિલ હોસ્પિટલ કેમ્પસ પાસે ચૌધરી હાઈસ્કૂલ મેદાનમાં કાર્યરત કરવામાં આવેલી ઇન્ડો અમેરિકન પોર્ટેબલ હેલ્થ કેર યુનિટને ખુલ્લી મુકવામાં આવી હતી. રાજકોટમાં ગુજરાતની પ્રથમ ફાયર અને વોટરપ્રૂફ ઇન્ડો અમેરિકન પોર્ટેબલ હેલ્થ કેર  હોસ્પિટલને રીબીન કાપીને મુખ્યમંત્રીએ ખુલ્લી મુકી હતી, મહત્વનું છે કે આ ઇન્ડો અમેરિકન પોર્ટેબલ હેલ્થ કેર યુનિટને આપતકાલિન સમયમાં એક જગ્યાએથી બીજી જગ્યાએ ખસેડી પણ શકાય છે. તેમજ આ હોસ્પિટલની અંદર ICU સાથે 100 બેડની સુવિધા પણ ઉપલબ્ધ છે. હોસ્પિટલમાં ચાર ડોમમાં 16 આઇ.સી.યુ. બેડ, 30 ઓક્સિજનની સુવિધાવાળા બેડ અને 54 જનરલ બેડનો સમાવેશ થાય છે.આ હેલ્થ કેર યુનિટ ઇમરજન્સી ટ્રીટમેન્ટ માટે અતિ ઉપયોગી બનશે તેમજ 120 કિમીની ઝડપે પવન ફૂંકાય તો પણ યુનિટ અડીખમ ઉભું રહેશે

ગુજરાતમાં ગુરૂવારે નોંધાયેલા કોરોનાના કેસ 

રાજ્યમાં કોરોનાની ત્રીજી લહેરની દહેશત વચ્ચે સતત કોરોનાના કેસ વધી રહ્યા છે. ગુરૂવારે રાજ્યમાં 571 કેસ સામે આવતા ચિંતાનું મોજું ફરી વળ્યું છે, એક્ટિવ કેસની સંખ્યા 2371 સુધી પહોંચી ગઈ છે. અમદાવાદમાં સૌથી વધુ 278 કેસ આવતા તંત્ર સાબદું બન્યું છે. રાહતના સમાચાર એ છે કે આજે કોઈ પણ કેસ ઑમિક્રૉનનો નોંધાયો નથી. આજે કોરોનાને માત આપીને 102 દર્દી ડિસ્ચાર્જ થયા છે જ્યારે કોરોનાગ્રસ્ત 11 દર્દી વેન્ટિલેટર પર સારવાર હેઠળ છે. છેલ્લા 24 કલાકમાં 2 દર્દીઓએ કોરોનાના કારણે જીવ ગુમાવ્યો છે. ગુજરાતમાં કોરોનાથી સાજા થવાનો દર 98.50 ટકા રહ્યો છે. જ્યારે રાજ્યભરમાં આજે 2.32 લાખ નાગરિકોનું વેક્સિનેશન કરવામાં આવ્યું છે. ગુજરાતના 3 શહેરમાં ચિંતાજનક કેસમાં વધારો જોવા મળી રહ્યો છે ત્યારે અમદાવાદ શહેરમાં 269 અને ગ્રામ્યમાં 9 કેસ, સુરત શહેરમાં 74 અને ગ્રામ્યમાં 4 કેસ, વડોદરા શહેરમાં 41 અને ગ્રામ્યમાં 9 કેસ નોંધાયા છે. ત્યારે આ ત્રણેય જિલ્લામાં સૌથી વધુ કેસ નોંધાઇ રહ્યા છે.

કોરોના વકરતા હવે મુખ્યમંત્રીએ મોરચો સંભાળ્યો

ગુજરાતમાં સંભવિત ત્રીજી લહેરના ભણકારા વચ્ચે મુખ્યમંત્રી ભૂપેન્દ્ર પટેલે રોજ કોર કમિટીની બેઠક બોલાવવાનો નિર્ણય કર્યો છે. મુખ્યમંત્રીના અધ્યક્ષ સ્થાને મળનારી આ બેઠકમાં કોરોના કંટ્રોલની કામગીરીની રોજ રૂપરેખા તૈયાર થશે તેમજ જિલ્લાને આપેલ આદેશ પ્રમાણે થઈ રહેલા કામોનું સીએમ પટેલ ખુદ નિરીક્ષણ કરશે.સોમ, મંગળ, બુધ મુખ્યમંત્રી કાર્યાલયમાં કોર કમિટીની બેઠક મળશે જ્યારે ગુરુ, શુક્ર, શનિ મુખ્યમંત્રી નિવાસસ્થાને આ બેઠકનું આયોજન થશે. કોર કમિટીની બેઠકમાં   પ્રવકતા મંત્રી રાજેન્દ્ર ત્રિવેદી, જીતુ વાઘાણી, આરોગ્ય મંત્રી ઋષિકેશ પટેલ, ગૃહ રાજ્ય મંત્રી હર્ષ સંઘવી જેવા મંત્રીઓ તો મુખ્ય સચિવ પંકજ કુમાર, આરોગ્ય વિભાગના ACS મનોજ અગ્રવાલ, આરોગ્ય કમિશનર, રાજ્ય પોલીસ વડા આશિષ ભાટિયા અને અધિક મુખ્ય સચિવ રાજકુમાર જેવા મોટા અધિકારી હાજર રહેશે.