વાતાવરણ / આગામી 72 કલાકમાં ગુજરાતમાં 40 કિ.મી ઝડપે પવન ફૂંકાશેઃ હવામાન વિભાગ

ગુજરાતના દક્ષિણ વિભાગમાં તેમજ રાજસ્થાન અને ઉત્તર ગુજરાતમાં સાયક્લોનિક સર્ક્યુલેશન સિસ્ટમ સર્કિય થઈ છે. જેના કારણે કેટલાક વિસ્તારોમાં ઝાપટાં તો કેટલાક વિસ્તારમાં છૂટો છવાયો વરસાદ થઈ શકે છે. તો આગામી 48 કલાકમાં 40 કિમીની ઝડપે પવન પણ ફુંકાઈ શકે છે. આગામી 12 મે સુધીમાં થન્ડર સ્ટોર્મની પણ આગાહી કરવામાં આવી છે. બનાસકાંઠા, રાજકોટ, કચ્છ, પાટણ, અમરેલી, અરવલ્લી, સાબરકાંઠા અને સુરેન્દ્રનગર જિલ્લામાં તેની અસર થઈ શકે છે. તો આ સ્થિતિના કારણે રાજ્યમાં ગરમીનો પારો પણ થોડો નીચે ગયો છે. જેથી લોકોને ગરમીમાં આંશિક રાહત મળી છે. ત્યારે રાજ્યના અનેક જિલ્લાઓમાં કમોસમી વરસાદ પડી રહ્યો છે.

સાબરકાંઠામાં વહેલી સવારે વરસાદી ઝાપટા
સાબરકાંઠામાં પણ વહેલી સવારે વરસાદી ઝાંપટા આવ્યા હતા. જિલ્લાના હિંમતનગર, પોસીના, વડાલી, ખેડબ્રહ્મામાં કમોસમી વરસાદ પડ્યો હતો. કમોસમી વરસાદ આવતા ખેડૂતોમાં ચિંતા જોવા મળી છે.

અરવલ્લી જિલ્લામાં ધૂળની ડમરીઓ સાથે તેજ પવન
અરવલ્લીનું વાતાવરણ પલટાયુ છે. ધૂળની ડમરીઓ સાથે ભારે પવન શરૂ થયો છે. વહેલી સવારે ભિલોડા પંથકમાં વાવાઝોડા સાથે વરસાદ પડ્યો હતો. મોડાસા સહિત જિલ્લામાં ભારે પવન ફૂંકાયા. હવામાન બદલાતા વાતાવરણમાં ઠંડક પ્રસરી છે. હવામાનની આગાહીને લઈને તંત્ર પણ સજ્જ થયું છે.

અંબાજી સહિત આસપાસના પંથકમાં વરસાદ
તો આ તરફ ઉત્તર ગુજરાતના વાતાવરણમાં એકાએક પલટો આવ્યો છે. અંબાજી સહિત આસપાસના વિસ્તારોમાં વરસાદ પડ્યો હતો. કમોસમી વરસાદ આવતા ખેડૂતોમાં ચિંતા જોવા મળી રહી છે.

અત્રે ઉલ્લેખનીય છે કે દેશના મોટા ભાગના વિસ્તારમાં વીજળીના કડાકા સાથે વાવાઝોડાનું અલર્ટ જાહેર કરવામાં આવ્યું છે. હવામાન વિભાગે 15 મે સુધી અલર્ટ આપ્યું છે. ઉત્તર પશ્ચિમ ભારતના મેદાની વિસ્તારમાં કડાકાભેર વીજળી ત્રાટકવાની શક્યતા છે. વાવાઝોડા સાથે વરસાદ થવાની પણ શંકા જાહેર કરી છે. પૂર્વોત્તરમાં 12 મેથી 16 મે સુધી ભારે પવન સાથે વરસાદની આગાહી કરવામાં આવી છે. 30થી 40 કિ.મી.ની ઝડપે પવન ફૂંકાઈ શકે છે.