તણાવ / રાફેલથી ભારતીય વાયુસેનાની તાકાત વધતા ચીન ડર્યુ, ભારત સાથે જોડાયેલા 13 એરબેઝ કરી રહ્યુ છે અપગ્રેડ

• રાફેલના ભારતીય સેનામાં સામેલ થવાથી ચીનની વધી ચિંતા
• રાફેલના ડરથી એરબેઝ અપગ્રેડ કરી રહ્યું છે ચીન
• ભારત સાથે જોડાયેલા 13 એરબેઝ અપગ્રેડ કરી રહ્યું છે ચીન

રાફેલના ભારતીય સેનામાં સામેલ થવાથી ચીનની ચિંતા વધી છે. વાયુસેનાની તાકાત વધવાના કારણે ચીન ટેન્શનમાં છે. જેથી ડરેલા ચીનને લઈને યુરેશિયન ટાઈમ્સમાં ખબર છપાઈ છે.  જેમાં જણાવવામાં આવ્યું છે કે ચીન રાફેલના ડરથી એરબેઝ અપગ્રેડ કરી રહ્યું છે. ચીન ભારત સાથે જોડાયેલા 13 એરબેઝ અપગ્રેડ કરી રહ્યું છે. તેમજ જમીન પર જંગ માટે ચીન તૈયારી કરી રહ્યું છે.

બીજી તરફ ચીનમાં તમામ પ્રદેશોમાંથી તિબ્બતમાં ચીની સેના એકઠી થઈ છે. તિબ્બતમાં ચીનના 2.5 લાખ સૈનિકો તૈયાર છે. LAC પર ચીનના 6 લાખ સૈનિકો તૈયાર છે. ચીનના ફાયટર જેટ,મિસાઈલ અને તોપ પણ તૈયાર છે.

ઉલ્લેખનીય છે કે લદ્દાખમાં પૈંગોંગ સરોવર પાસે ભારત અને ચીની સેના આમને સામને આવ્યા બાદ તણાવની સ્થિતિ સર્જાઈ છે. ભારતીય સેનાએ ફિંગર 4 પર ડેરો જમાવ્યો છે. બીજી તરફ ચીની આર્મી ફિંગર 4થી 8 સુધી પાછી ખસવા તૈયાર નથી. અને ફિંગર 5થી ફિંગર 8 વચ્ચે નિર્માણ કાર્ય શરૂ કરી દીધું છે. ચીનના નવા સૈનિકો અને વાહનો પણ નજરે પડ્યા છે. તે ત્યાં પણ પોતાની સેનાની તાકાતને મજબૂત કરી રહ્યું છે.

જોકે એક્ચ્યુઅલ લાઈન ઓફ કંટ્રોલ ફિંગર 8 પર છે તેમ છતાં ચીની સેના LAC ક્રોસ કરીને ફિંગર 5 સુધી પેટ્રોલિંગ કરે છે. જોકે આ વખતે ભારતીય સેના પણ આક્રમક મૂડમાં છે. ચીનની કોઈપણ ચાલાકીનો જડબાતોડ જવાબ આપવામાં આવશે. 

ત્યારે આજે  ભારતીય રક્ષામંત્રી રાજનાથસિંહ અને ફ્રાંસના રક્ષામંત્રીની હાજરીમાં સર્વધર્મ પૂજા સાથે રાફેલનો વાયુસેનામાં સમાવેશ કરાયો છે. અંબાલા ખાતેના IAF એરબેઝમાં રાફેલના સમાવેશ માટે આયોજિત સર્વ ધર્મ પૂજામાં વાયુસેનાના પ્રમુખ એર ચીફ માર્શલ આરકેએસ ભદોરિયા પણ ઉપસ્થિત રહ્યાં.