ટીમ ઈન્ડિયાનો બેટ્સમેન ચેતેશ્વર પૂજારા સાત વર્ષ બાદ ઈન્ડિયન પ્રીમિયર લીગ (આઈપીએલ)માં રમતો જોવા મળશે.
પૂજારાનું આઈપીએલમાં કમબેક
સાત વર્ષ બાદ આઈપીએલમાં રમતો જોવા મળશે
સિઝનમાં ગગનચૂંબી સિક્સ ફટકારવા આતુર
૯ એપ્રિલથી શરૂ થઈ રહેલી આઈપીએલની ૧૪મી સિઝન માટે હાલ પૂજારા નેટ્સમાં પરસેવો પાડી રહ્યો છે. પૂજારાને ચેન્નઈ સુપરકિંગ્સે તેની બેઝ પ્રાઈસ ૫૦ લાખ રૂપિયામાં ખરીદ્યો છે. પૂજારાની ઈમેજ ટેસ્ટ ક્રિકેટના બેટ્સમેન તરીકેની જ રહી છે, પરંતુ હવે તે ક્રિકેટના સૌથી નાના અને ઝડપી ફોર્મેટ માટે ખુદને તૈયાર કરી રહ્યો છે.
પૂજારા કરી રહ્યો છે તનતોડ મહેનત
પૂજારાએ જણાવ્યું કે, આઈપીએલની આગામી સિઝન માટે તે તનતોડ મહેનત કરી રહ્યો છે અને ગગનચૂંબી સિક્સ મારવા તે આતુર છે. ખાસ કરીને ટી-૨૦ ફોર્મેટમાં જે શોટ્સની જરૂર પડે છે તેની પ્રેક્ટિસ હાલ પૂજારા કરી રહ્યો છે. ઉલ્લેખનીય છે કે, ૩૩ વર્ષીય પૂજારા આઈપીએલમાં તેની છેલ્લી મેચ વર્ષ ૨૦૧૪માં રમ્યો હતો. એ વખતે તે કિંગ્સ ઈલેવન પંજાબનો ખેલાડી હતો.
ટી-૨૦ ફોર્મેટમાં સિક્સ ફટકારવી સૌથી વધુ મહત્વની
પૂજારાએ કહ્યું કે, ટી-૨૦ ફોર્મેટમાં સિક્સ ફટકારવી સૌથી વધુ મહત્વની હોય છે અને હાલના સમયે હું નેટ્સમાં તેના પર જ પ્રેક્ટિસ કરી રહ્યો છું. પૂજારા વાનખેડે સ્ટેડિયમમાં મુંબઈ ઈન્ડિયન્સ વિરુદ્ધ આઈપીએલમાં તેની છેલ્લી મેચ રમ્યો હતો.
આઈપીએલના રેકોર્ડની વાત કરીએ તો તેણે ૩૦ મેચમાં ૩૯૦ રન બનાવ્યા છે. પૂજારાએ જણાવ્યું કે, આઈપીએલમાં હું કોઈ પણ ક્રમે બેટિંગ કરવા માટે તૈયાર છું. મહેન્દ્રસિંહ ધોનીનાં નેતૃત્વમાં રમવા માટે પણ હું ખૂબ ઉત્સુક છું, કેમ કે ધોની પાસેથી હંમેશાં કંઈક ને કંઈક શીખવા મળે છે.