બેટ-દ્વારકામાં સતત બે દિવસથી ચાલી રહેલી દબાણ હટાવવાની કામગીરી દરમિયાન આજે ડ્રગ્સ રેકેટ સાથે જોડાયેલા આરોપી રમઝાનનું મકાન તોડી પડાયું હતું.
બેટ દ્વારકામાં મેગા ડિમોલેશનનો બીજો દિવસ
ડ્રગ્સ ડીલર રમઝાનનું મકાન તોડી પડાયું
જખૌમાં પકડાયેલ ડ્રગ્સમાં રમઝાનની સંડોવણી સામે આવી હતી
બેટ દ્વારકામાં ચાલી રહેલા મેગા ડિમોલેશનનો બીજો દિવસ છે. આજે બીજા દિવસે પણ તંત્રનું બુલડોઝર ગેરકાયદે બાંધકામો પણ ધણધણ્યું હતું. આજે ડ્રગ્સ રેકેટ સાથે જોડાયેલા આરોપી સામે કડક કાર્યવાહી કરવામાં આવી હતી. જેમાં બેટ દ્વારકામાં ડ્રગ્સ ડિલર રમઝાનનું મકાન તોડી પાડવામાં આવ્યું હતું. મહત્વનું છે કે જખૌમાં પકડાયેલા ડ્રગ્સ મામલે પોલીસની તપાસમાં રમઝાનની સંડોવણી સામે આવી હતી.
પાંજપર વિસ્તારમાં આવેલ મકાન પર બુલડોઝર ફેરવાયું
બેટ દ્વારકામાં મેગા ડિમોલેશનનો બીજો દિવસ હોય આજે પણ 20 થી વધુ દબાણો દૂર કરવામાં આવ્યા હતા. આજે જેસીબી મશીનોની મદદથી 52078 ચોરસ ફૂટ પર ગેરકાયદેસર કોર્મેશિયલ બાંધકામો તોડી પાડવામાં આવ્યા હતા ગોડાઉન અને ધાર્મિક સ્થળો પર બુલડોઝર ફેરવી દેવાયું હતું. જે ને પગલે આજે દ્વારકામાં તંત્ર દ્વારા પાંજપર વિસ્તારમાં આવેલ આરોપીના મકાનનો કડૂસલો બોલાવવામાં આવ્યો હતો. ઉપરાંત આ બે દિવસની કાર્યવાહી દરમિયાન બેટ દ્વારકામાં ખડકી દેવામાં આવેલ ગેરકાયદે ધાર્મિકસ્થળોને તોડી પાડવામાં આવ્યા હતા.
બેટ દ્વારકામાં ધાર્મિક સ્થળો તોડી પડાયા
ઉલ્લેખનીય છે કે એક હજારથી પણ વધુ પોલીસ જવાનોના લોખંડી બંદોબસ્ત વચ્ચે બેટ દ્વારકામાં કર્ફ્યૂ જેવા માહોલ વચ્ચે ડીમોલીશનની કાર્યવાહી ચાલી રહી છે. દ્વારકામાં મોટું ઓપરેશન હાથ ધરી બેટ, દ્વારકા સહિતના અન્ય નિર્જન ટાપુ પર દબાણ હટાવની કાર્યવાહી કરવામાં આવી રહી છે. ગઇકાલે તંત્ર દ્વારા કોમર્શિયલ વિસ્તારમાં બુલડોઝર ફેરવી દેવામાં આવ્યું હતું. ઉપરાંત 10 જેટલા શકમંદોને પણ પોલીસે ઉઠાવી લઇ પૂછપરછ માટે ડીટેઈન કર્યા હતા. બેટ દ્વારકામાં ધર્મના નામે અમુક કથિત ગેરકાયદે પ્રવૃત્તિ મેગા ઓપરેશનથી ડામી દેવાશે અને આવા ગેરકાયદે બાંધકામો દૂર કરાશે. આ મેગા ઓપરેશન હજુ એક થી બે દિવસ ચાલે તેવી શક્યતાઑ વ્યક્ત કરવામાં આવી રહી છે.