રાજકારણ / કોંગ્રેસના હાથમાં તો અહીં પણ આવી માત્ર એક સીટ, ભાજપે અપનાવી એવી રણનીતિ કે સત્તામાં બેસી જશે

• BTC ચૂંટણીમાં કોંગ્રેસને માત્ર એક સીટ મળી 
• ભાજપને 9 સીટ પરંતુ અન્ય પાર્ટી સાથે મળીને બનાવી શકે છે સરકાર 
• અસમ વિધાનસભા ચૂંટણી પહેલા આ ચૂંટણી મનાય છે સેમીફાઈનલ 

કોંગ્રેસનું સતત ખરાબ પ્રદર્શન 

જ્યારથી ભારતીય જનતા પાર્ટી કેન્દ્રમાં સત્તા પર આવી છે ત્યારથી જ કોંગ્રેસ પાર્ટીનું પતન થઇ રહ્યું હોય તેમ દેખાઈ રહ્યું છે. વિવિધ રાજ્યોમાં કોંગ્રેસની હાલત એકદમ ખરાબ થઇ રહી છે. વર્ષ 2019 બાદ ઘણી બધી ચૂંટણીઓમાં કોંગ્રેસ સાફ થઇ ગઈ છે. ત્યારે ફરી વાર કોંગ્રેસનું આવું જ પ્રદર્શન જોવા મળ્યું છે. 

અસમમાં પણ પંજાના હાથમાં કશું ન આવ્યું 

બિહાર વિધાન સભા, મધ્યપ્રદેશમાં પેટાચૂંટણી અને હૈદરાબાદમાં કોર્પોરેશનની ચૂંટણીમાં ખરાબ પ્રદર્શન બાદ હવે અસમની સત્તાના સેમીફાઈનલમાં પણ કોંગ્રેસે ખૂબ જ ખરાબ પ્રદર્શન કર્યું છે. બોડોલેન્ડ ટેરીટોરીયલ કાઉન્સિલ ઈલેકશનમાં કોંગ્રેસ માત્ર એક જ જીતી શકી છે. ભાજપે પણ કંઈ ખાસ પ્રદર્શન આ ચૂંટણીમાં કર્યું નથી પરંતુ સૂત્રો અનુસાર માનવામાં આવી રહ્યું છે કે ભાજપ સ્થાનિક પાર્ટી સાથે મળીને સત્તાના સિંહાસન પર બેસી જશે. 

કોંગ્રસને માત્ર એક સીટ મળી 

નોંધનીય છે કે બોડોલેન્ડ ટેરીટોરીયલ કાઉન્સિલમાં 40 સભ્યો હોય છે અને હાલમાં થયેલ ચૂંટણીમાં કોઈ પણ પક્ષને સ્પષ્ટ બહુમતી મળી નથી. આ ચૂંટણીમાં બોડો પીપલ્સ ફ્રન્ટને 17 બેઠકો મળી છે જ્યારે યુનાઇટેડ પીપલ્સ પાર્ટી લિબરલને 12 બેઠકો મળી છે, ભાજપને 9 બેઠક મળી છે જ્યારે કોંગ્રેસ માત્ર 1 જ બેઠક પર વિજયી થઇ. નોંધનીય છે ભારતીય જનતા પાર્ટી BPF સાથે મળીને સરકાર ચલાવી રહી હતી પણ ચૂંટણી આવતા એકલા જ ચૂંટણીમાં ઝંપલાવ્યું હતું. 

ભાજપ બનાવી શકે છે સરકાર 

માનવામાં આવી રહ્યું છે કે ભારતીય જનતા પાર્ટી હવે યુનાઇટેડ પીપલ્સ પાર્ટી લિબરલ સાથે મળી શકે છે. UPPLના પ્રમુખ પ્રોમોદ બ્રહ્માએ ભાજપના દિગ્ગજ નેતા હેમંત વિશ્વ સરમા સાથે બેઠક કરી હતી અને ગઠબંધન બનાવવા માટે ચર્ચા કરી. ભાજપ નેતાએ કહ્યું આ મુદ્દે નિર્ણય સીએમ સર્બાનંદ સોનોવાલ સાથે ચર્ચા કર્યા બાદ લેવામાં આવશે. 

નોંધનીય છે કે આવતા વર્ષે અસમમાં ચૂંટણી થવાની છે અને વિધાનસભા ચૂંટણી પહેલા આ ચૂંટણીને સત્તા માટે સેમીફાઈનલ માનવામાં આવે છે. આ ચૂંટણીમાં ચાર જિલ્લાઓને કવર કરવામાં આવે છે જે બોડોલેન્ડ ક્ષેત્ર હેઠળ આવે છે.