અર્થવ્યવસ્થા / એક સમયે ભારત પર રાજ કરનાર બ્રિટનને લાગ્યો 300 વર્ષનો સૌથી મોટો ઝટકો, GDP કડડભૂસ 

• ભારત પર રાજ કરનાર બ્રિટનને 300 વર્ષનો સૌથી મોટો ઝટકો લાગ્યો
• વર્ષ 2020માં બ્રિટનના ગ્રોસ ડોમેસ્ટિક પ્રોડક્ટ GDPમાં 11 ટકાનો ઘટાડો: ONS
• બ્રિટન માટે 1709ના 'ગ્રેટ ફ્રોસ્ટ' પછીનો સૌથી મોટો ઘટાડો 

કહેવાય છે કે, સમય બદલાતા વાર નથી લાગતી. એક સમયે ભારત પર રાજ કરનાર બ્રિટનને 300 વર્ષનો સૌથી મોટો ઝટકો લાગ્યો છે. વિગતો મુજબ જે દેશ એક સમયે ભારત પર લાંબા સમય સુધી રાજ કરતો હતો. આજે તે દેશની અર્થવ્યવસ્થા ખરાબ તબક્કામાંથી પસાર થઈ રહી છે. બ્રિટિશ શાસનથી આઝાદી મળ્યા બાદ જ્યાં ભારત માત્ર સાત દાયકામાં વિશ્વમાં સૌથી ઝડપથી વિકસતા અર્થતંત્ર તરીકે ઉભરી રહ્યું છે, ત્યાં બ્રિટિશ અર્થતંત્રમાં 300 વર્ષમાં સૌથી મોટો ઘટાડો નોંધાયો છે.

એક રિપોર્ટ અનુસાર બ્રિટનમાં વર્ષ 2020માં ઉત્પાદનમાં સૌથી મોટો ઘટાડો જોવા મળ્યો જ્યારે યુકે સહિત સમગ્ર વિશ્વમાં કોરોના મહામારી (કોવિડ-19)નો પ્રકોપ ચાલુ રહ્યો હતો. સોમવારે જારી કરાયેલા સત્તાવાર ડેટામાં જાણવા મળ્યું છે કે વિશ્વની સૌથી મોટી અર્થવ્યવસ્થાઓમાંની એક બ્રિટનને રોગચાળાની મોટી અસર પડી છે. જેના કારણે દેશની જીડીપી (યુકે જીડીપી) અન્ય મોટી અર્થવ્યવસ્થાઓ કરતા ઘણી ખરાબ દેખાઇ રહી છે. 

બ્રિટનમાં જીડીપીમાં 11% ઘટાડો

ઓફિસ ફોર નેશનલ સ્ટેટિસ્ટિક્સ (ONS)એ આંકડાઓ જાહેર કરતા જણાવ્યું કે, વર્ષ 2020માં બ્રિટનના ગ્રોસ ડોમેસ્ટિક પ્રોડક્ટ (GDPમાં 11 ટકાનો ઘટાડો થયો છે. આ આંકડો ONS દ્વારા આપવામાં આવેલા અનુમાન કરતા ઘણો વધારે છે. રિપોર્ટ અનુસાર વર્ષ 1709 પછી દેશના જીડીપીમાં આ સૌથી મોટો ઘટાડો હતો.

બ્રિટન માટે 1709ના 'ગ્રેટ ફ્રોસ્ટ' પછીનો સૌથી મોટો ઘટાડો 

ઓએનએસએ અગાઉ અર્થતંત્રમાં ઘટાડાનું પ્રમાણ સુધારીને 9.3 ટકા કર્યું હતું, જે પ્રથમ વિશ્વયુદ્ધ પછીનું સૌથી મોટું છે. પરંતુ જીડીપીમાં ઘટાડો આ અંદાજ કરતા ઘણો વધારે જોવા મળી શકે છે. રિપોર્ટ અનુસાર 2020માં ઉત્પાદનમાં ઘટાડો બ્રિટન માટે 1709ના 'ગ્રેટ ફ્રોસ્ટ' પછીનો સૌથી મોટો ઘટાડો હતો.  

હવે નવા આંકડા ક્યારે આવશે ? 

ગ્રોસ ડોમેસ્ટિક પ્રોડક્ટ (જીડીપી)માં ઘટાડો અગાઉની સરખામણીમાં આરોગ્ય સેવાઓ અને રિટેલર્સના ઓછા યોગદાનને દર્શાવે છે. ઓએનએસના અર્થશાસ્ત્રી ક્રેગ મેકલેરેને જણાવ્યું હતું કે, આરોગ્ય સંભાળને શરૂઆતમાં અમે ધાર્યા કરતાં વધુ ખર્ચનો સામનો કરવો પડ્યો હતો. મતલબ કે, અર્થતંત્રમાં તેનું એકંદર યોગદાન ઓછું હતું. નોંધપાત્ર રીતે ઓએનએસ 30 સપ્ટેમ્બરના રોજ 2021 અને 2022ના પ્રથમ અર્ધવાર્ષિક વિકાસના આંકડા પ્રકાશિત કરશે.