લોકસભા ચૂંટણી / હવે થશે ભાજપના 'સતા પક્ષની લહેર'ના દાવાની અગ્નિપરીક્ષા

વડાપ્રધાન નરેન્દ્ર મોદી અને  ભાજપના સત્તા પક્ષની લહેરના દાવાની હવે આગામી ત્રણ લોકસભાની ચૂંટણીના તબક્કામાં જોવા મળશે. લોકસભાની ચૂંટણીમાં હવે 168 બેઠક પર મતદાન યોજાવા જઇ રહ્યું છે જેમાં 116 બેઠકો સત્તાધારી પક્ષની પાસે છે. આ બેઠકમાં મુખ્યત્વે ઉત્તર પ્રદેશમાં (41), મધ્ય પ્રદેશ (23), બિહાર (21), રાજસ્થાન (12) અને ઝારખંડ (11)નો સમાવેશ થાય છે.
 

આ સિવાય પંજાબ (13), હરિયાણા (10), દિલ્લી (7) અને હિમાચલ પ્રદેશની (4) બેઠક પર પણ મતદાન યોજાશે. ભાજપ પશ્ચિમ બંગાળમાં તૃણમુલ કોંગ્રેસને ટક્કર આપી રહ્યું છે, જ્યાં આગામી ત્રણ તબક્કામાં 24 બેઠક પર મતદાન યોજાશે. ભાજપને ઉત્તર પ્રદેશના પૂર્વાંચલમાંથી ઘણી આશા છે. જો કે પૂર્વી ઉત્તર પ્રદેશમાં મતદાતાઓ જાતિ આધારે મતદાન કરે છે, જેમાં એસપી-બીએસપી ગઠબંધનને વધારે ફાયદો જોવા મળી રહ્યો છે. 
 

ઉત્તર પ્રદેશની જે 41 બેઠક પર મતદાન યોજાવાનું છે તેમાં ભાજપ 2014માં માત્ર ત્રણ બેઠક રાયબરેલી, અમેઠી અને આઝમગઢમાં જ હાર્યું હતું. જો કે ત્યારબાદ યોજાયેલી પેટાચૂંટણીમાં ગોરખપુર અને ફૂલપુરમાં પરાજયનો સામનો કરવો પડ્યો હતો. રાજસ્થાનમાં ભાજપ માટે 2014 જેવું પ્રદર્શન ફરી એકવાર કરવું કઠીન છે.

 

જેનું મુખ્ય કારણ વિધાનસભા ચૂંટણીમાં મળેલો પરાજય છે. રાજસ્થાનમાં 12 બેઠક પર પાંચમા તબક્કામાં મતદાન યોજાશે. જ્યારે મધ્યપ્રદેશમાં 23 બેઠક પર ચૂંટણી યોજાઇ રહી છે જેમાં 22 બેઠક પર ભાજપ પ્રતિનિધિત્વ કરી રહ્યું છે. જ્યારે દિલ્લીમાં સાત લોકસભાની ચૂંટણીમાં આ વખતે ત્રિકોણીયો જંગ જોવા મળશે. જો કે 2014ની જેમ ફરી કરિશ્મા જોવા મળે તેવી સંભાવના ઘણી ઓછી છે. 

વારણસીમાંથી વડાપ્રધાન નરેન્દ્ર મોદીની નજર રેકોર્ડ અંતરથી જીત મેળવવા પર છે. ગત સપ્તાહે વડાપ્રધાન નરેન્દ્ર મોદીએ ભવ્ય રોડ શો યોજ્યો હતો. જો કે સત્તાધારી પક્ષના કેટલાક ઉમેદવાર એસપી-બીએસપી ગઠબંધન સામે કમજોર જોવા મળી રહ્યાં છે.