સાખ દાવ પર / દાદરા નગર હવેલી લોકસભા પેટા ચૂંટણીમાં ભાજપ-શિવસેના વચ્ચે પ્રતિષ્ઠાનો જંગ; કાલે મતદાન

• દાદરા નગર હવેલી લોકસભા બેઠક 
• શનિવારે મતદાન-BJP-શિવસેના વચ્ચે જંગ 
• સ્વર્ગીય ડેલકરના પત્ની છે ચૂંટણીમાં ઉમેદવાર 

દાદરા નગર હવેલી લોકસભાની પેટાચૂંટણીનું શનિવારે  મતદાન થશે.  પૂર્વ સાંસદ મોહન ડેલકરના અપમૃત્યુ બાદ આ બેઠક ખાલી પડી છે. મોહન ડેલકર લાંબા સમયથી  અપક્ષ ઉમેદવાર તરીકે ચૂંટાઈ આવતા હતા. આ બેઠક પરની પેટા ચૂટણીમાં  333 મતદાન મથકો પર 2.58 લાખ જેટલા મતદારો મતાધિકારનો ઉપયોગ કરશે.  ભાજપ, કોંગ્રેસ, અપક્ષ અને શિવસેનાના ઉમેદવારો વચ્ચે આ ચૂંટણી જંગ છે. વિશેષ તો ભાજપ અને શિવસેના વચ્ચે લોકસભા બેઠક માટે ખરાખરીનો જંગ રહેશે. ઉલ્લેખનીય છે કે, આ બેઠક પર ડેલકરનાં પત્ની કલાવતી શિવસેનામાંથી ઉમેદવાર તરીકે મેદાનમાં છે 

ભાજપમાંથી મહેશ ગાવિત ઉમેદવાર 

મોહન ડેલકરનાં નિધનથી ખાલી પડેલી દાદરા નગર હવેલી લોકસભા બેઠક માટે ભાજપે મહેશ ગાવીતને લોકસભાની ચૂંટણી માટે  મેદાનમાં ઉતાર્યા છે. ડેલકરના વર્ચસવાળી આ બેઠક કબજે કરવા ભાજપે પ્રચાર માટે કેન્દ્ર અને પ્રદેશ નેતાઓની ટીમ મેદાનમાં ઉતારી હતી. જેમાં  મહારાષ્ટ્રના પૂર્વ CM દેવેન્દ્ર ફડણવિસ, ગુજરાત  ભાજપ પ્રદેશ  પ્રમુખ પાટીલે સભા કરી હતી. તો કેન્દ્ર સરકારમાં મંત્રી પુરષોત્તમ રૂપાલા, સ્મૃતિ ઈરાની, ઉપરાંત  મનોજ તિવારીએ પણ સભા સંબોધી હતી. ભાજપ માટે પણ આ બેઠક પ્રતિષ્ઠાનો પ્રશ્ન છે.

શિવસેનામાંથી કલાવતી ડેલકર 

બીજી તરફ, શિવસેનાના ઉમેદવાર તરીકે સ્વર્ગીય મોહન ડેલકરનાં પત્ની કલાવતીએ ચૂંટણી જંગમાં પહેલીવાર ઝુકાવ્યું છે. ડેલકર પરિવાર માટે લોકસભાની વર્તમાન પેટાચૂંટણી અસ્તિત્વના જંગ સમાન છે.ત્યારે,શિવસેના તરફથી સંજય રાઉત અને આદિત્ય ઠાકરે પાર્ટીનો પ્રચાર કલાવતી ડેલકર માટે કરી ચૂક્યા છે.દાદરા નગર હવેલી લોકસભા વિસ્તારમાં 9 મતદાન મથકો અતિસંવેદનશીલ ગણાવાયા છે ત્યારે પોસ્ટલ બેલેટસથી દિવ્યાંગો, અસ્વસ્થ લોકોએ 820 જેટલા મતદાતાઓએ પોસ્ટલ મતદાન કર્યું છે 

ચુસ્ત બંદોબસ્ત વચ્ચે મતદાન 

દાદરાનગર હવેલી લોકસભા બેઠક માટે શાંતિપૂર્ણ મતદાન પ્રક્રિયા પાર પાડવા પોલીસ, અર્ધલશ્કરી દળો તૈનાત કરવામાં આવ્યા છે, 10 પેરામિલિટરી ફોર્સની કંપનીઓ, 18 સ્ટ્રેટિક ટીમો પણ તૈનાત કરાઈ છે. આ ઉપરાંત ચૂંટણી પંચ તરફથી ચૂંટણી લગતી ફરિયાદો માટે એક નંબર જાહેર 1077 કરી, આ પર ફરિયાદ કરવા જણાવાયું છે