ઝારખંડ / ભાજપની મહિલા નેતાની ક્રૂરતા, યુવતીને બંધક બનાવી દાંત તોડ્યા અને શરીર પર ડામ આપી પેશાબ પીવડાવ્યો

• ભાજપ નેતા સીમા પાત્રા પર હિંસાનો આરોપ 
• તેમના નિવાસસ્થાન પર યુવતીને બંધક બનાવી હતી
• પીડિતા પર ત્રાસ ગુજારવામાં આવતો હતો

નિવૃત્ત IAS અધિકારીની પત્ની ભાજપ નેતા સીમા પાત્રા પર રાંચીના અરગોડા પોલીસ સ્ટેશનમાં એક દિવ્યાંગ ઘરેલુ મદદને પોતાના ઘરમાં લાંબા સમય સુધી બંધક બનાવવા બદલ આઈપીસી કલમ સહિત એસસી/એસટીની કલમો હેઠળ કેસ દાખલ કરવામાં આવ્યો છે. ઝારખંડનો આ મામલો સામે આવ્યા બાદ ભાજપે સીમા પાત્રાને પાર્ટીમાંથી સસ્પેન્ડ કરી દીધા છે. સાથે જ ધરપકડની તલવાર પણ તેમના પર લટકી છે. રાંચીના અશોક નગરમાં રોડ નંબર વનમાં રહેતા ભાજપ નેતા સીમા પાત્રા પર આઈપીસીની કલમ 323/ 325/ 346 અને 374 હેઠળ કેસ નોંધવામાં આવ્યો છે. સીમા પર એસસી-એસટી એક્ટ હેઠળ કેસ પણ નોંધવામાં આવ્યો છે. આ કેસની તપાસ માટે હાથિયાના ડીએસપી રાજા મિત્રાને આ કેસના આઈઓ બનાવવામાં આવ્યા છે. તેના પર આરોપ છે કે તેણે લાંબા સમયથી એક યુવતીને તેના નિવાસ સ્થાને બંધક બનાવી રાખી હતી. જેને પોલીસે બચાવી લીધી છે.

8 વર્ષથી ઘરકામ કરે છે 
આરોપ છે કે છેલ્લા આઠ વર્ષથી સીમા પાત્રાના ઘરે ઘરકામ માટે રાખવામાં આવેલી યુવતી પર લાંબા સમયથી ખરાબ રીતે ત્રાસ ગુજારવામાં આવી રહ્યો હતો. તેને ઘરની બહાર નીકળવાની પણ મંજૂરી આપવામાં આવી રહી ન હતી. ઘરમાં બંધક બનેલી દિવ્યાંગ મહિલાએ ગમે તેમ કરીને વિવેક આનંદ બાસ્કે નામના સરકારી કર્મચારીને મોબાઈલ પર મેસેજ કરીને તેના પર થઈ રહેલા અત્યાચારની જાણકારી આપી હતી. તેઓની બાતમી પરથી અરગોડા પોલીસ સ્ટેશનમાં ફરિયાદ નોંધાવવામાં આવી હતી. સીમા પાત્રા પૂર્વ આઈએએસ મહેશ્વર પાત્રાની પત્ની છે. આ કેસમાં સીમા પાત્રાની પુત્રી પર પણ કેસ થઈ શકે છે.

#Terrible The brutality that happened to this tribal woman in Jharkhand is extremely painful, for eight consecutive years she was imprisoned and tortured, her teeth were blown out, she was given urine, she was burnt with iron rods several times. The accused must be hanged... pic.twitter.com/wk9NLG2tUB

— The Dalit Voice (@ambedkariteIND) August 30, 2022

પીડિતાના દાંત પણ તોડી પાડ્યા 
પીડિત નોકરાણી સુનીતાએ આરોપ લગાવ્યો કે સીમા પાત્રાએ તેને લાંબા સમય સુધી બંધક બનાવી રાખી હતી. સુનિતાએ પોલીસને જણાવ્યું કે, માલકણ એટલી અત્યાચારી હતી કે લોખંડનો પાઈપ ફટકારીને દાંત તોડી નાંખ્યા. ચાલી પણ શકાતું નહોતું. ઘસડાઈને ચાલતી હતી. મને ગોંધી રાખી હતી એટલે પેશાબ ત્યાં જ થઈ જતો. ક્યારેક પેશાબ રૂમની બહાર જાય તો જીભથી જમીન સાફ કરાવતી. મેં વર્ષોથી સૂર્ય પ્રકાશ પણ જોયો નથી. વર્ષોથી અંધારામાં કેદ છું. આ ભયાનકતા સામે આવ્યા પછી ભાજપે મહિલા નેતાને પક્ષમાંથી હાંકી કાઢી છે.

ગમે તે સમયે થઇ શકે છે ધરપકડ
અહીં પીડિતા સુનીતાને બચાવ્યા બાદ કડક સુરક્ષા વચ્ચે રિમ્સમાં તેની સારવાર ચાલી રહી છે. પીડિત સુનીતાની સુરક્ષા વ્યવસ્થામાં બે મહિલા સુરક્ષાકર્મી તૈનાત કરવામાં આવી છે. મેડિકલ ફિટ થયા બાદ પીડિતા સુનિતાને કોર્ટમાં રજૂ કરવામાં આવશે. જે બાદ કલમ164 મુજબ નિવેદન નોંધવામાં આવશે. કલમ 164 હેઠળ પીડિતાનું નિવેદન નોંધ્યા બાદ નિવૃત્ત આઇએએસની પત્ની સીમા પાત્રાની મુશ્કેલીઓ વધી શકે છે અને પોલીસ ગમે ત્યારે સીમા પાત્રાની ધરપકડ કરી શકે છે