દુનિયાના બીજા નંબરના સૌથી અમીર વ્યકિત બિલ ગેટ્સની સાદગીના ઘણા કિસ્સા છે. માઇક્રોસોફટ કંપનીના કર્મચારીઓ પણ ઘણી વાર બિલ ગેટ્સને દુનિયાના બેસ્ટ બોસ ગણાવી ચૂકયા છે.
હવે સોશિયલ મીડિયા પર વાઇરલ થયેલો એક ફોટો બિલ ગેટ્સની સાદગીના દાવાઓને સાચા પાડે છે. આ ફોટોમાં બિલ ગેટ્સ સિએટલની એક ફાસ્ટફૂડ રેસ્ટોરાંની બહાર લાઇનમાં ઊભા છે અને એ પણ માત્ર આઠ ડોલરના બર્ગર-ફ્રાઇ અને કોક લેવા માટે.
બિલ ગેટ્સનો આ ફોટો તેની કંપનીના પૂર્વ કર્મચારી માઇક ગેલોસે ફેસબુક પર શેર કર્યો છે. તેમાં લાલ રંગનું સ્વેટર પહેરેલા બિલ ગેટ્સ ટોપી પહેરેલા યુવકની પાછળ ઊભા છે. આ ફોટો સિએટલની ડિકસ ડ્રાઇવિંગ રેસ્ટોરાંનો છે. બિલ ગેટ્સ બર્ગરના શોખીન છે અને એક ખાસ દુકાન પર આજે પણ બર્ગર ખાવા જાય છે.
પહેલીવાર માઇક્રોસોફટના પૂર્વ કર્મચારીઓના પેજ પર શેર થતાં જ આ ફોટો વાઇરલ થઇ ગયો. ફોટોની નીચે ગેલોસે લખ્યું છે કે જ્યારે તમે અબજોના માલિક હો અને દેશની સૌથી મોટી ચેરિટી ચલાવવા છતાં બર્ગર ફ્રાઇ અને કોક માટે એક રેસ્ટોરાંની બહાર લાઇનમાં ઊભા હો ત્યારે તમે અમારા જેવા કોમનમેન લાગો છો.
ફેસબુક પર આ ફોટોને અત્યાર સુધી ૧પ ૦૦૦થી વધુ લાઇકસ મળી ચૂકયા છે. ફોટો ૧ર ૦૦૦થી વધુ વાર શેર કરાયો છે. ગેલોસે કહ્યું કે બિલ ગેટ્સ કયારેય એટેન્શનના ભૂખ્યા રહ્યા નથી. તેમની અંદર કોઇ સેલિબ્રિટીવાળો ગુણ પણ નથી.