લૂંટનો બનાવ / અમદાવાદમાં મોટી લૂંટ, દાગીના અને સોનાના બિસ્કિટ ભરેલી બેગ વેપારી પાસેથી આંચકી લૂંટારૂઓ ફરાર

• અમદાવાદના સુભાષબ્રિજ પાસે લૂંટ
• દાગીના,સોનાના બિસ્કિટ ભરેલી બેગની લૂંટ
• બે લૂંટારૂઓએ રાજસ્થાનના વેપારીને લૂંટ્યો

મેગાસિટી અમદાવાદમાં ચોરી, લૂંટ અને હત્યા સહિતના ગંભીર બનાવોમાં વધારો થયો છે. ત્યારે રાજસ્થાનથી અમદાવાદ આવેલ જ્વેલર્સના કર્મચારીને   સુભાષબ્રિજ પાસેથી ૨૭.૪૯ લાખનાં સોના-ચાંદીનાં બિસ્કિટની લૂંટ ચલાવીને બે બાઈકસવાર લૂંટારું ફિલ્મી ઢબે ફરાર થઈ હોવાની ઘટના સામે આવી છે. પોલીસે આસપાસના વિસ્તારમાં લાગેલા સીસીટીવી કેમેરાના ફૂટેજ મેળવવાની તજવીજ શરૂ કરી છે.

અમદાવાદના સુભાષબ્રિજ પાસે વેપારી લૂંટાયો

રાજસ્થાનમાં રહેતા ધર્મપાલ સોનીએ લૂંટની ફરિયાદ રાણીપ પોલીસ સ્ટેશનમાં નોંધાવી છે. ધર્મપાલ રાજસ્થાન બાડમેર ખાતે શિવમ્ જવેલર્સ નામની દુકાન ધરાવે છે. ધર્મપાલે તેની દુકાનમાં સોના-ચાંદીનાં બિસ્કિટ લાવવા તથા લઇ જવા આજથી સાત મહિના પહેલાં ડિલિવરીબોય તરીકે પવન શર્મા નામના યુવકને નોકરી પર રાખ્યો હતો.

દાગીના અને સોનાના બિસ્કિટ ભરેલી બેગની લૂંટ

ધર્મપાલ શિવમ્ જવેલર્સ ખાતે બુલિયન વ્યવસાયને લગતું કામકાજ અને સોનાનાં બિસ્કિટનું ખરીદ વેચાણ પણ કરે છે. બે દિવસ પહેલાં ધર્મપાલને સોનાનાં બિસ્કિટની જરૂર પડતાં તેમણે તેમના ઓળખીતા નવરંગપુરા કરુણા બુલિયન નામની દુકાન ધરાવતા સૌતિક શાહને ફોન કરીને સોનાનાં ૧૦૦-૧૦૦ ગ્રામનાં પાંચ બિસ્કિટની જરૂર હોવાની વાત કરી હતી. જેથી સૌતિકે ધર્મપાલને કહ્યું કે સોનાંનાં બિસ્કિટ પેટે રૂપિયા ૨૪.૯૧ લાખ આરટીજીએસથી મોકલી આપો. આથી ધર્મપાલે રૂપિયા સૌતિકને ટ્રાન્સફર કર્યા હતા. ત્યારે બાદ સૌતિકે ધર્મપાલને ફોન કરીને કહ્યું કે તમારો માણસ અમારી માણેકચોક ખાતે આવેલ શાખા પર મોકલી આપો. 

બાઇક પર આવેલા બે લૂંટારૂઓએ રાજસ્થાનના વેપારીને લૂંટ્યો

બીજી તરફ ધર્મપાલે તંબુ પોલીસ ચોકી પાસે આવેલ એક સોનીને  ત્યાંથી પણ ચાર ચાંદીનાં બિસ્કિટ ખરીદ્યાં હતાં તે પણ લાવવાનાં હતાં. જેથી ધર્મપાલે તેમની દુકાનમાં ડિલિવરીબોય તરીકે કામ કરતા પવનને ૨.૫૦ લાખ રોકડા, દસ હજાર રૂપિયા ભાડું તેમજ ખર્ચના રૂપિયા આપીને તેને બાડમેરથી અમદાવાદ બસમાં મોકલ્યો હતો. પવને અમદાવાદ આવીને સોનાના વેપારીને ત્યાંથી પાંચ સોનાનાં બિસ્કિટ અને ૩.૮૧૪ કિલો ગ્રામ ચાંદીનાં બિસ્કિટ લઇ લીધાં હતાં. પવન તેની પાસે રહેલી બેગમાં સોનાનાં બિસ્કિટ અને ચાંદીનાં બિસ્કિટ તેમજ, મોબાઈલ, તેમજ રોકડ રકમ, ડેબિટ કાર્ડ સહિત અગત્યના ડોક્યુમેન્ટ મૂકીને પરત રાજસ્થાન જવા માટે રિક્ષામાં બેસીને સુભાષબ્રિજ પહોંચ્યો હતો.જ્યારે પવન સુભાષબ્રિજ રિક્ષામાંથી ઊતરીને ત્યાં ઊભો હતો. 

રાણીપ પોલીસ સ્ટેશનમાં નોંધાઈ ફરિયાદ

આ દરમિયાન બે અજાણ્યા શખ્સોએ બાઈક પર પવન પાસે આવીને તેના હાથમાં રહેલ ૨૭.૪૯ લાખની મતા ભરેલ   બેગ લૂંટી તે બંને ફરાર થઇ ગયા હતા. ત્યાર બાદ પવને ધર્મપાલને લૂંટની જાણ કરતાં તેઓ તાત્કાલિક અમદાવાદ આવી ગયા હતા. ધર્મપાલે આ અંગે રાણીપ પોલીસ સ્ટેશનમાં બે અજાણ્યા શખ્સ વિરુદ્ધ   ફરિયાદ નોંધાવી હતી. પોલીસે બનાવના સ્થળની આસપાસના વિસ્તારમાં લાગેલા સીસીટીવી કેમેરાના ફૂટેજ મેળવવાની કવાયત આરંભી છે.