આરોપી પરેશ પટેલનો બાંધકામનો વ્યવસાય. 2014માં કોઠારીયા સોલ્વન્ટ વિસ્તારમાં તેને કામ દરમિયાન મનોજની પત્ની ફાલ્ગુની સાથે તેની નજર મળી હતી 2017માં બંને મૈત્રી કરાર કરી લીધા હતા.
દિવાળી પહેલા થયેલી હત્યાનો ઉકેલાયો ભેદ
રાજકોટમાં પ્રેમીએ પત્નીના પતિનો કાંટો કાઢ્યો
માતાજીના ભૂવાએ જ કરી નાખ્યું મેલું કામ
રાજકોટમાં ગત 28 તારીખે કોઠારીયા સોલવન્ટ રેલવેના પાટા પાસેથી મળેલી યુવાનની લાશ અંગે મોટો ઘટસ્ફોટ થયો છે . યુવાનનું મોત દારૂમાં ડખ્ખામાં કે પડી જવાથી નહિ પરંતુ તેની પત્નીના પ્રેમીએ સોપારી આપી યુવાનની હત્યા કરાવી હતી કોન્ટ્રાક્ટ કિલિંગની ઘટનાનો આ રીતે થયો પર્દાફાશ.
પત્નીને અન્ય વ્યક્તિએ કરી જાણ
દિવાળીના એક સપ્તાહ પહેલા 28 ઓક્ટોબરના રોજ મનોજ વાઢેર નામના યુવાનની કોઠારીયા સોલવન્ટના રેલવે પાટા નજીકથી લાશ મળી આવી હતી . સ્થાનિકોએ પોલીસને જાણ કરતા ઘટના સ્થળે પહોંચેલી પોલીસે આ યુવાનનું મોત પાટા ઓળંગતી વેળાએ ઠોકરે ચડતા પડી જવાથી અને માથામાં ઇજા થવાથી મોત થયા હોવાનું પ્રાથમિક તારણ દર્શાવ્યું હતું. પરંતુ ઘટનાના થોડા દિવસ પછી મૃતક મનોજની પત્ની ફાલ્ગુનીને તે જ વિસ્તારમાં રહેતા એક શખ્સે જણાવ્યું હતું. કે તેના પતિનું મોત પડી જવાથી નહીં પરંતુ તેની હત્યા નિપજાવવામાં આવી છે. સમગ્ર ઘટનાની જાણ થતા ચોંકી ગયેલ પત્નીએ પોલીસનો સંપર્ક કરી તમામ વિગતો જણાવી હતી.
નાણા લઈને કરી નાખી હત્યા
પ્રથમ દ્રષ્ટિએ પોલીસને દેખાતી આ એક્સિડેન્ટલ ડેથ મૃતકની પત્નીના જણાવ્યા બાદ પોલીસ દોડતી થઈ હતી. જે શખ્સે યુવાની મોત જોઈ હતી તે શખ્સની પૂછપરછ બાદ હત્યા કરનાર શખ્સ રાજેશને પોલીસે ઉઠાવી લીધો હતો. તેની પૂછપરછમાં મનોજને દારુ બાબતે ઝગડો થતાં પથ્થરનો ઘા ઝીંકી પતાવી દીધાનું રટણ તેને પોલીસ સમક્ષ કર્યું હતું . પરંતુ આકરી પૂછપરછમાં તેને પોતે રૂપિયા લઇ હત્યા કરી હોવાની કબૂલાત આપી હતી . ત્યારબાદ પોલીસને એક બાદ એક કડીઓ મળવા લાગી હતી.
રૂપિયા 5 લાખ 10 હજારમાં લીધી 'સોપારી'
વધુ પૂછપરછમાં તેણે તેના પારડી ગામના મિત્ર કિશને તે જ ગામના ભૂવા મેહુલ પારઘી પાસે હત્યા કરવાનું કામ આવ્યું હોવાનું જણાવ્યું હતું . અને મેહુલને રાજકોટના કોન્ટ્રાકટર પરેશ પેટલે સોપારી આપી હતી . જેથી મેહુલે 27 તારીખે આરોપી અને સોપારી આપનાર પરેશ સાથે મળી રાત્રિના સમયે કોઠારીયા સોલવન્ટ વિસ્તારમાં ગયા હતા. જ્યાં મૃતક મનોજ પાટા પાસે બેઠેલો દેખાયો હતો . મનોજની ઓળખ આપ્યા બાદ રાજેશે મનોજને ધક્કો મારી નીચે પછાડી પથ્થરોના ઘા ઝીંકી પતાવી દીધી હતો . અને આ હત્યાનું કામ પત્યા બાદ પરેશ પટેલે સોપારીની નક્કી કરેલ રકમ રૂ.5 લાખ 10 હજાર આરોપી શખ્સોને આપી હતી. હાલ પોલીસે સોપારી આપનાર કોન્ટ્રાકટર સહિત પાંચ શખ્સો ની ધરપકડ કરી કોન્ટ્રાક્ટ કિલિંગનો ભેદ ઉકેલી વધુ કાર્યવાહી હાથ ધરી છે.
પ્રેમીએ મૈત્રી કરાર કર્યા હતા,પતિ અડચણરૂપ લાગતો
પોલીસના જણાવ્યા પ્રમાણે પરેશ પટેલ બાંધકામનો વ્યવસાય કરે છે 2014માં કોઠારીયા સોલ્વન્ટ વિસ્તારમાં તેને કામ ચાલુ હતું . અને ત્યાં જ મનોજની પત્ની ફાલ્ગુની સાથે તેની નજર મળી હતી . 2017માં બંને મૈત્રી કરાર કરી લીધા હતા . પરંતુ પરેશ અને ફાલ્ગુની વચ્ચેનો કાંટો મનોજ હતો. જેથી પરેશ 6 મહિના પહેલા પારડી ગામે ત્યાંના ભૂવા મેહુલને મળ્યો હતો. અને પોતે મનોજનું થોડા સમયમાં મૃત્યુ થઈ જાય તેવી વિધિ કરાવવા જણાવ્યું હતું . પરંતુ મેહુલ પારઘી એ આમ કહેવાની ના પાડી હતી અને કહ્યું કે માતા આવું કામ ન કરે. તો પરેશે અન્ય કોઈ રસ્તો કાઢવાનું મેહુલને કહ્યું હતું અને ત્યારબાદ પરેશે મનોજની હત્યા માટે સોપારી દેવાનું જણાવતા મેહુલ રાજી થઈ ગયો હતો . 3 મહિના પહેલા અન્ય વ્યક્તિ સાથે મળી મેહુલે મનોજને જમવામાં દવા પીવડાવી મારી નાખવાનો પ્લાન ઘડ્યો હતો પરંતુ તે પ્લાન શક્ય ન હતો . જે બાદ રાજેશ 1 મહિના પહેલા મેહુલના સંપર્કમાં આવ્યો હતો જેથી તમામે સાથે મળી સોપારી લઈ મૃતક મનોજની હત્યાને અંજામ આપ્યો હતો
પત્નીએ જ પ્રેમીને ઝડ્પાવ્યો
પોલીસને પ્રથમ દ્રષ્ટિએ લાગતી આ એક્સિડેન્ટલ ડેથ એક કોન્ટ્રાક્ટનો મામલો નીકળ્યો. જો કદાચ નજરે જોનાર વ્યક્તિ મૃતક મનોજની પત્ની ફાલ્ગુનીનો સંપર્ક કરી તેને સમગ્ર હકીકત ન જણાવી હોત તો આ કેસ ઉપરથી કદાચ પોલીસ પડદો ઉઠાવી જ ન શકી હોત