- પશ્ચિમ યુપીમાં ભાજપ સમાજવાદી પાર્ટીને મોટો ઝટકો આપશે
- ભાજપ સરકારના પૂર્વ મંત્રી ધરમસિંહ સૈની આજે ભાજપમાં જોડાશે
- ખતૌલીમાં જાહેર સભા દરમિયાન સીએમ યોગી આદિત્યનાથની હાજરીમાં BJPમાં જોડાશે
પશ્ચિમ યુપીમાં આજે ભાજપ સમાજવાદી પાર્ટીને મોટો ઝટકો આપશે. વિગતો મુજબ સહારનપુરના સમાજવાદી પાર્ટીના મજબૂત નેતા અને પૂર્વ મંત્રી ધરમ સિંહ સૈની ખતૌલીમાં જાહેર સભા દરમિયાન સીએમ યોગી આદિત્યનાથની હાજરીમાં ભાજપમાં જોડાશે. પશ્ચિમ યુપીના પછાત વર્ગમાં ભાજપ માટે આને મોટો ફટકો માનવામાં આવે છે. આને સૈનીની ભાજપમાં ઘર વાપસી કહેવામાં આવી રહી છે.
હકીકતમાં સૈનીએ વિધાનસભા ચૂંટણી પહેલા પછાત વર્ગની ઉપેક્ષા કરવાનો આરોપ લગાવી અખિલેશ યાદવ સાથે હાથ મિલાવ્યા હતા. તે સમયે સૈની ભાજપ સરકારમાં આયુષ મંત્રી હતા. કહેવાય છે કે, સહારનપુરથી ચૂંટણી હાર્યા બાદ સપામાં ધરમ સિંહ સૈનીને સાઇડલાઇન કરી દેવામાં આવ્યા હતા.
શું કહ્યું હતું ધરમસિંહ સૈનીએ ?
ધરમ સિંહ સૈનીએ કહ્યું હતું કે, મેં બીજેપી છોડી દીધી કારણ કે, મારું કોઈ પણ રીતે સાંભળવામાં આવ્યું ન હતું. સંસ્થાના હોદ્દેદારોને પણ સાંભળવામાં આવ્યા ન હતા. જ્યારે 140 ધારાસભ્યોએ ધરણા કર્યા ત્યારે બધાને ધમકી આપવામાં આવી હતી, તેથી જ બધાએ નક્કી કર્યું હતું કે તેઓ યોગ્ય જવાબ આપશે. સૈનીએ એવો પણ દાવો કર્યો હતો કે, દરરોજ એક મંત્રી અને 2 થી 3 ધારાસભ્યો તેમની સાથે ભાજપ છોડશે. ત્યારે ચૂંટણી પહેલા ભાજપના 20 જેટલા નેતાઓએ ભાજપ છોડી દીધું હતું.
નોંધનીય છે કે, વર્ષ 2019માં ભાજપના ધારાસભ્યો વિધાનસભાની અંદર તેમની જ સરકાર વિરુદ્ધ ધરણા પર બેઠા હતા, જોકે સરકાર અને સ્પીકરના આશ્વાસન પછી ધારાસભ્યોએ ધરણા કાર્યક્રમ પાછો ખેંચ્યો હતો.
મહત્વનું છે કે, ડો.ધરમસિંહ સૈની એક જ બેઠક પરથી સતત ચાર વખત ધારાસભ્ય રહી ચૂક્યા છે. તેઓ 2002માં સરસાવા (હાલ નકુડ) વિધાનસભા બેઠક પરથી બસપા તરફથી પ્રથમ વખત ધારાસભ્ય બન્યા હતા. આ પછી 2007ની ચૂંટણીમાં અને ફરીથી 2012 (હાલ નકુડ)માં તેઓ BSP તરફથી ત્રીજી વખત ધારાસભ્ય તરીકે ચૂંટાયા. આ પછી 2016માં તેણે પોતાનું બેનર બદલ્યું. તેણે 2017ની ચૂંટણીમાં ભાજપની ટિકિટ પર ચૂંટણી લડી હતી અને ચોથી વખત ચૂંટણી જીતી હતી. ત્યારબાદ 2022માં વિધાનસભા ચૂંટણી પહેલા તેઓ ભાજપ છોડીને સપામાં જોડાયા હતા. તેઓ નકુડથી ચૂંટણી લડ્યા હતા પરંતુ ભાજપના ઉમેદવાર મુકેશ ચૌધરી સામે 315 મતોના માર્જિનથી હારી ગયા હતા.
