લ્યો બોલો..! બેંકમાંથી 53 હજાર ભરેલ રકમવાળી બેગ લઇ બાળક થઇ ગયો 'ગુમ'

ભાવનગરમાં તળાજાની બેંક ઓફ બરોડામાંથી ચોરીની ઘટના સામે આવી છે. બેંકમાંથી 53 હજાર ભરેલી બેગની ઉઠાંતરી કરીને બાળક ફરાર થયો છે. આ ઘટના CCTVમાં કેદ થઈ છે. CCTVમાં દેખાઈ રહ્યું છે કે બાળક બેંકની અંદર પ્રવેશે છે અને બેંકમાં મુકેલી બેગ લઈને ફરાર થાય છે. ત્યારે હવે પોલીસે CCTVના આધારે આગળની કાર્યવાહી શરૂ કરી છે.

આ ઘટના અંગે મળતી વિગત અનુસાર ભાવનગર જિલ્લાના તળાજા તાલુકા ખાતે આવેલ બેંક ઓફ બરોડામાંથી 53 હજારની રોકડ ભરેલ એક બેગ ચોરાઇ જવાની ઘટના બનવા પામી હતી. જો કે આ મામલે બેંકની શાખામાં લગાડવામાં આવેલ CCTVની તપાસ કરતા એક બાળક આ નાણા ભરેલ બેગની ઉઠાંતરી કરીને રફુચક્કર થઇ ગયો હોવાનું માલૂમ પડ્યું હતું.



આપને જણાવી દઇએ કે આ મામલાની જાણકારી નજીકના પોલીસ મથકમાં કરવામાં આવતા સ્થાનિક પોલીસ કર્મીનો સ્ટાફ બેંકમાં આવી પહોચ્યો હતો અને સમગ્ર મામલા અંગે પૂછપરછ કરીને બેંકમાં લગાવવામાં આવેલ CCTV તપાસતા એક બાળક 53000ની ચોરી કરતો હોય તે સ્પષ્ટ નજરે ચડ્યું હતું. નાનકડા બાળકની આ કારીગરી જોઇને પોલીસ અધિકારીઓ તથા બેંક મેનેજર પણ અચંબામાં મુકાઇ ગયા હતા. 

જો કે આ મામલે તળાજાની સ્થાનિક પોલીસે ફરિયાદ નોંધીને આ બાળક ક્યાંથી આવ્યું..? કોના ઇશારે આ બાળકે ચોરીને અંજામ આપ્યો..? બેગમાં આટલી મોટી રકમ છે તે અંગેની જાણકારી આ બાળક પાસે કેવી રીતે આવી..? ચોરી કર્યા બાદ આ નાણાનું બાળકે શું કર્યું જેવા અનેક સવાલો ઉભા થયા છે. પોલીસે આ તમામ પ્રશ્નોના ઉકેલ માટે તપાસ શરૂ કરી હતી.