ક્રિકેટ / 'ગરદનની સુરક્ષાવાળો હેલ્મેટનો નિર્ણય ખેલાડી પોતે લે' : BCCI

જોકે ગરદનની સુરક્ષા આપતી હેલ્મેટ પહેરવાનો નિર્ણય ખેલાડીઓ પર છોડી દીધો છે. જોકે આવી હેલ્મેટ પહેરવી ફરજિયાત કરવાની માગણી સતત થઈ રહી છે.

એશિઝની બીજી ટેસ્ટ મેચ દરમિયાન જોફ્રા આર્ચરનો બોલ સ્ટીવ સ્મિથની ગરદન પર વાગ્યો હતો, જેના કારણે ચક્કર આવવાથી સ્મિથ એ ટેસ્ટ મેચમાં રમી શક્યો નહોતો. ત્યાર બાદ ઓસ્ટ્રેલિયાની ટીમના ડોક્ટરે કહ્યું કે,'' તેમના ક્રિકેટરો માટે નજીકના ભવિષ્યમાં ગરદનને સુરક્ષા આપતી હેલ્મેટ પહેરવી ફરજિયાત કરી દેવાશે''.

આવી હેલ્મેટ પહેરવી હજુ ભલે ફરજિયાત ન બનાવાઈ હોય,પરંતુ ICC ક્રિકેટ સમિતિએ આ મુદ્દે ચર્ચા કરી અને બોલ વાગવાથી ચક્કર આવવાની સ્થિતિમાં સબસ્ટિટ્યૂટ ખેલાડીની વ્યવસ્થા કરવામાં આવી. આ સબસ્ટિટ્યૂટ બેટિંગ અને બોલિંગ પણ કરી શકે છે. ઓસ્ટ્રેલિયાએ બીજી ટેસ્ટમાં આનો ઉપયોગ પણ કર્યો અને સ્મિથના સ્થાને માર્નસ લાબુશેન સબસ્ટિટ્યૂટના રૂપમાં મેદાનમાં ઊતર્યો હતો.

BCCIના એક અધિકારીએ નામ નહીં આપવાની શરતે જણાવ્યું, ''બોલ વાગવાથી ચક્કર આવવાનાે નિયમ અમલમાં આવ્યા બાદ BCCIએ કેપ્ટન અને કોચિંગ સ્ટાફને આ અંગેની તમામ જાણકારી આપી દીધી છે. અમે તેમને ગરદનને સુરક્ષા આપતી હેલ્મેટ અંગે પણ જણાવ્યું. શિખર ધવન સહિત કેટલાક ખેલાડી આવી હેલ્મેટનો ઉપયોગ પણ કરે છે, પરંતુ અમે ખેલાડીને આવી હેલ્મેટ પહેરવાની ફરજ પાડી શકીએ નહીં, કારણ કે હેલ્મેટ ખેલાડીને અનુકૂળ છે કે કેમ એ મુદ્દો પણ આની સાથે જોડાયેલો છે.''