સત્તાના સોગઠાં / જે ફોર્મ્યુલાથી ગુજરાત જીત્યું, તેના આધારે 2024માં પણ મળશે જીત? BJPએ 1 વર્ષ પહેલા જ બનાવી લીધો માસ્ટર પ્લાન

• 2024 જીતવા અત્યારથી જ BJPનો માસ્ટરપ્લાન 
• ગુજરાત ફોર્મ્યુલાથી 2024માં પણ મળશે જીત?
• લોકસભા ચૂંટણી 2024માં લગભગ 400 દિવસ બાકી 

ગુજરાત વિધાનસભાની ચૂંટણીમાં તમામ રેકોર્ડ તોડીને ભાજપે ભવ્ય જીત મેળવી હતી. જોકે હવે લોકસભા ચૂંટણી 2024ને લઈ BJPએ વર્ષ પહેલા જ  માસ્ટર પ્લાન બનાવી લીધો છે. લોકસભા ચૂંટણી 2024માં લગભગ 400 દિવસ બાકી છે અને ભારતીય જનતા પાર્ટીએ અત્યારથી જ ચૂંટણીની તૈયારી શરૂ કરી દીધી છે. વડાપ્રધાન મહારાષ્ટ્ર અને કર્ણાટકના પ્રવાસે છે. તો બીજી તરફ પાર્ટી અધ્યક્ષ જેપી નડ્ડા પશ્ચિમ બંગાળ પહોંચી ગયા છે જ્યાં તેઓ એક જનસભાને સંબોધિત કરવાના છે. 

દિલ્હીમાં મંગળવારે પુરી થયેલી ભાજપની રાષ્ટ્રીય કાર્યકારિણીની બેઠકમાં પાર્ટીએ દેશમાં યોજાનારી નવ રાજ્યોમાં થનારી વિધાનસભા ચૂંટણી અને લોકસભાની ચૂંટણી માટે પોતાની રણનીતિ તૈયાર કરી છે. કારોબારીની બેઠકમાં પીએમ મોદીએ કહ્યું હતું કે, ચૂંટણીમાં 400 દિવસ બાકી છે, આ સ્થિતિમાં તમામ કાર્યકર્તાઓએ ઘરે ઘરે પહોંચવું પડશે. આગામી ચૂંટણીમાં ગુજરાત ભાજપની ફોર્મ્યુલા પર ભાજપ આગળ વધવાની તૈયારી કરી રહ્યું છે.

9 રાજ્યોની વિધાનસભાની ચૂંટણીમાં ગુજરાતની જીતની ફોર્મ્યુલાનો અમલ 
ભારતીય જનતા પાર્ટી 9 રાજ્યોમાં યોજાનારી વિધાનસભાની ચૂંટણીમાં ગુજરાતની જીતની ફોર્મ્યુલાનો અમલ કરવા જઈ રહી છે. વાસ્તવમાં આ જીતની ફોર્મ્યુલા ગુજરાતથી શરૂ થઈ હતી. આ ફોર્મ્યુલા પેજ કમિટીની હતી, જેનો અમલ કરીને ભાજપને પંચાયત, મહાનગર પાલિકા, નગર પાલિકા અને પછી વિધાનસભામાં પણ જીત મળી હતી. જેથી હવે ભાજપ એ રાજ્યોમાં પેજ કમિટી બનાવશે જ્યાં વિધાનસભાની ચૂંટણીઓ યોજાય છે અને દરેક બૂથ સુધી તેની પહોંચને વધુ મજબૂત બનાવશે. 

ભાજપની ફોર્મ્યુલાથી ગુજરાતમાંથી કોંગ્રેસનો સફાયો 
ગુજરાત ભાજપના નેતાઓ આ ફોર્મ્યુલાના આધારે ચૂંટણી પહેલા અભૂતપૂર્વ જીતનો દાવો કરી રહ્યા હતા. ગુજરાતના પરિણામોમાં પણ આ બાબત સ્પષ્ટપણે જોવા મળી હતી. ભાજપની આ ફોર્મ્યુલાથી રાજ્યમાંથી કોંગ્રેસનો સફાયો થઈ ગયો. તે માત્ર 17 સીટો જીતી શકી હતી. જ્યારે ભાજપે 182માંથી 156 બેઠકો જીતી હતી.

પેજ કમિટીના કારણે જીત ? 
ગુજરાતમાં ભવ્ય જીતનું આ પરિણામ પેજ કમિટીના કારણે હતું. વાસ્તવમાં પેજ સમિતિઓએ ગુજરાતમાં ભાજપને ખૂબ મજબૂત બનાવ્યું. ગુજરાતમાં પાર્ટીએ 1.5 મિલિયન પેજની સમિતિની રચના કરી અને લગભગ 7.5 મિલિયન સભ્યોને દરેક બૂથ પર 50 ટકા મત મેળવવાની જવાબદારી સોંપવામાં આવી. આ સભ્યોએ ચૂંટણી પહેલા યોજના મુજબ કામ કર્યું અને પરિણામે બમ્પર વિજય પ્રાપ્ત થયો.

3 રાજ્યોમાં વિધાનસભા ચૂંટણીની જાહેરાત
બુધવારે ચૂંટણી પંચે ત્રણ રાજ્યોની વિધાનસભા ચૂંટણીની જાહેરાત કરી છે. જેમાં નાગાલેન્ડ, મેઘાલય અને ત્રિપુરાની વિધાનસભા ચૂંટણીની તારીખોની જાહેરાત કરવામાં આવી છે. ચૂંટણી પંચના જણાવ્યા અનુસાર ત્રિપુરામાં 16 ફેબ્રુઆરીએ મતદાન થશે. તે જ સમયે નાગાલેન્ડ અને મેઘાલયમાં 27 ફેબ્રુઆરીએ મતદાન થશે. જોકે ત્રણેય રાજ્યોના પરિણામ 2 માર્ચે જાહેર કરવામાં આવશે.