LRD ભરતીને લઇને રાજકારણ શરૂ થયું છે. કોંગ્રેસ અને ભાજપે સામસામે આક્ષેપ કર્યા છે. LRDની પરીક્ષાને લઈને ધારાસભ્ય ગેનીબેન ઠાકોરે આક્ષેપ કર્યા છે કે એકેડેમી ચલાવતા વ્યક્તિઓ ભાજપના જ મળતિયાઓ છે.
LRD ભરતીને લઇને રાજકારણ શરૂ થયું
જો આ વખતે પેપર ફૂટશે તો ભગવાન માફ નહીં કરે: ગેનીબેન
કોંગ્રેસમાં સાગવાદ અને પૈસા લઈને ભરતી થતી હતીઃ જીતુ વાઘાણી
PSI અને LRDની ભરતીની શારીરિક પરીક્ષાની તારીખો જાહેર કરાઈ છે. જેમાં 3 ડિસેમ્બરથી શારીરિક કસોટીની શરૂઆત થશે. LRDની પરીક્ષા માટે 11 લાખ કરતા વધુ ફોર્મ ભરાયા છે. બે મહિના સુધી શારીરિક કસોટી ચાલશે. ત્યારે હવે આ ભરતીને લઇને યુવાનો તનતોડ મહેનત કરી રહ્યા છે. તેવામાં બનાસકાંઠાના કોંગ્રેસના ધારાસભ્ય ગેનીબેન ઠાકોરે રાજ્ય સરકાર અને ભાજપ પર ગંભીર આક્ષેપો કર્યા છે.
જ્યારે ચૂંટણી પૂરી થઇ જશે ત્યાર બાદ નોકરીઓ સેટિંગ વાળાઓને આપશે: ગેનીબેન
LRD પરીક્ષાને લઈ ધારાસભ્ય ગેનીબેન ઠાકોરે કહ્યું કે, એકેડેમી ચલાવતા વ્યક્તિઓ ભાજપના જ મળતીયાઓ છે. ભાજપના જ લોકો પેપર ફોડી લાખો રૂપિયા પડાવે છે. 2022ની ચૂંટણીને લઈ હાલ ભરતી પાડવામાં આવી છે. જ્યારે ચૂંટણી પતિ જશે ત્યાર બાદ નોકરીઓ સેટિંગ વાળાઓને આપશે. ભાજપના પેજ પ્રમુખ જે બન્યા તેનેજ નોકરી આપવાની વાત કરે છે. જો આ વખતે પેપર ફૂટશે તો ભગવાન માફ નહીં કરે.
ગેનીબેને કહ્યું હતું કે, રાજ્ય સરકારને વિનંતી છે કે તમામ ડિપાર્ટમેન્ટમાં જો યુવાનોને રોજગારી આપવા માંગતા હોય, પારદર્શક વહિવટ કરવા માંગતા હોય, યોજનાઓને લોકો સુધી પહોંચાડવા માંગતા હોય તો 11 મહિનાના કોન્ટ્રાક્ટના બેઇઝથી નહીં પરંતુ પરમેન્ટ તમામ ડિપાર્ટમેન્ટમાં ભરતી કરો તે પણ ચૂંટણી પહેલા. સરકારે ભરતીની જાહેરાત કરી છે તે હેઠળ વિદ્યાર્થીઓ તૈયારી કરી રહ્યા છે. પેપર ફૂટવાની ઘટનાઓને લઇને ભરતી થતી નથી, જેના કારણે વિદ્યાર્થીઓ એવું માને છે કે કોઈ એક પાર્ટીના પેજ પ્રમુખ હશે તેને જ નોકરી આપવામાં આવશે. મને નથી લાગતું કે આ યુવાનોને નોકરી મળે.
કોંગ્રેસમાં સાગવાદ અને પૈસા લઈને ભરતી થતી હતીઃ જીતુ વાઘાણી
ગેનીબેન ઠાકોરના આક્ષેપ મામલે જીતુ વાઘાણીએ પ્રતિક્રિયા આપી હતી. તેમણે કહ્યું કે, ભરતીનો પ્રતિબંધ કોંગ્રેસ સરકારમાં હતો. કોંગ્રેસમાં સાગવાદ અને પૈસા લઈને ભરતી થતી હતી. નરેદ્રભાઈએ પારદર્શક ભરતી કરવાનું શરૂ કર્યું. ચૂંટણી આવે એટલે કોંગ્રેસને પાંખો આવે છે.
ભાજપના પ્રવક્તા મહેશ કસવાલાએ ગેનીબેન પર વળતા પ્રહાર કર્યા હતા. તેમણે કહ્યું કે, ભાજપના શાસનમાં આ પ્રકારે ભેદભાવ નથી થતો. કોંગ્રેસના શાસનમાં મામા-માસીના દીકરા-દીકરીની ભરતી થતી હતી. આપણે પણ કેટલીક વિગતો ગૃહ વિભાગથી મેળવીને જનતા સુધી પહોંચાડવી પડે. પેપરલીકના કૌભાંડીઓને જેલ પાછળ ધકેલ્યા છે. અમે કોંગ્રેસની જેમ બે મોઢાની વાત નથી કરતા.
ગેનીબેન ઠાકોરે ઉમેદવારો સાથે દોડ લગાવી
મહત્વનું છે કે, ધારાસભ્ય ગેનીબેન ઠાકોરે આજે LRD ઉમેદવારોની સાથે દોડ લગાવી હતી. ગેનીબેન ઠાકોરે ભાભરના સદારામ લાઈબ્રેરીના વિદ્યાર્થીઓને પ્રોત્સાહન આપ્યું હતું. ગેનીબેને ઉમેદવારો સાથે દોડ લગાવીને પ્રોત્સાહન આપ્યું હતું. સાથે જ કહ્યું કે યુવાનોએ જાતે મહેનત કરીને પરીક્ષા પાસ કરવી જોઈએ. જો ઉમેદવારોને કોઈ જરૂર પડે તો મદદ પણ કરશે તેવી બાંહેધરી આપી હતી.
ગેનીબેને ભાજપને 5 સવાલ કર્યા હતા
1. ચૂંટણી ટાણે ભરતીઓ બહાર પાડી લોકોને છેતરો છો કેમ?
2. અગાઉ પણ LRD, સચિવાલયના પેપર કેમ ફૂટ્યા?
3. પેપર ફૂટવા પાછળ મળતિયાઓની એકેડેમીઓ જવાબદાર નથી?
4. ક્લાસિસ સંચાલકો સાથે ભાજપના સેટિંગ નથી?
5. શું ભાજપના મળતિયાઓ ઉપર સેટિંગ કરે છે?