હવામાન વિભાગે આજથી 3 દિવસ ભારે વરસાદની આગાહી કરી છે ત્યારે ઉત્તરગુજરાતમાં મેઘાએ જોરદાર બેટિંગ કરી છે.
ઉત્તરગુજરાતમાં વરસાદની રમઝટ
બનાસકાંઠા અને સાબરકાંઠામાં ધોધમાર
અનેક સોસાયટીમાં પાણી ભરાયા, રસ્તા પર વાહનો ફસાયાની ઘટનાઑ
ગુજરાતમાં હવામાન વિભાગની 3 દિવસ અતિભારે વરસાદની આગાહી વચ્ચે રાજ્યમાં અત્યાર સુધીમાં 76.21% વરસાદ નોંધાયો છે. જેમાં રાજ્યમાં અત્યાર સુધીમાં 647 મીમી વરસાદ નોંધાયો છે. રાજ્યના 34 જેટલા તાલુકામાં 40 ઈંચથી વધુ વરસાદ વરસ્યો છે. તો 101 તાલુકામાં 20થી 40 ઈંચ સુધી વરસાદ નોંધાયો છે. જ્યારે 102 તાલુકામાં 10થી 20 ઈંચ સુધી વરસાદ ખાબક્યો. તો રાજ્યના 14 તાલુકામાં 5થી 10 ઈંચ સુધી વરસાદ વરસ્યો છે. 76.21% વરસાદના કારણે રાજ્યમાં ઉત્તર ગુજરાતના 15 ડેમોમાં 28.90% પાણીનો સંગ્રહ થયો છે. જ્યારે મધ્ય ગુજરાતના 17 ડેમોમાં 45.29% પાણી, દક્ષિણ ગુજરાતના 13 ડેમોમાં 74.89% પાણી, કચ્છના 20 ડેમોમાં 70.09% પાણી અને સૌરાષ્ટ્રના 141 ડેમોમાં 58.41% પાણીનો સંગ્રહ જોવા મળ્યો.
હવામાન વિભાગની આગાહી
અત્રે તમને જણાવી દઇએ કે, હવામાન વિભાગે સમગ્ર રાજ્યમાં આગામી ત્રણ દિવસથી ભારેથી અતિભારે વરસાદની આગાહી કરી છે. 8,9,10 ઓગસ્ટે રાજ્યમાં અનેક જગ્યાએ વરસાદની ધમાકેદાર એન્ટ્રી થશે. આ મહિનાથી અત્યારસુધી ગુજરાતમાં છૂટો છવાયો વરસાદ પડ્યો છે. જેથી ખેડૂતોના પાક કોઈ ખતરો ઊભો થયો નથી પણ હવામાન વિભાગની આગાહી મુજબ ગુજરાતમાં વરસાદનું જોર ફરી વધી શકે છે. 9 જિલ્લામાં ભારે વરસાદ ખાબકી શકે છે. જેમાં ખાસ કરીને દ.ગુજરાત અને સૌરાષ્ટ્રમાં ભારે વરસાદની આગાહી છે. મધ્ય અને ઉત્તર ગુજરાત વરસાદી ઝાપટાં જોવા મળી શકે છે.
10 ઓગસ્ટ સુધી અતિભારે વરસાદની શક્યતા: અંબાલાલ પટેલ
અંબાલાલ પટેલની આગાહી મુજબ રાજ્યના અમુક વિસ્તારમાં 6 ઈંચથી વધુ વરસાદ પડશે જ્યારે તાપી અને નર્મદા નદીના જળસ્તરમાં પણ વધારો થશે. આગામી તારીખ 10 ઓગસ્ટ સુધી દક્ષિણ ગુજરાતમાં પણ અતિભારે વરસાદની શક્યતા રહેલી છે. જ્યારે દક્ષિણ સૌરાષ્ટ્રના ભાગોમાં ભારેથી અતિભારે વરસાદની સંભાવના રહેલી છે.
મહેસાણામાં વરસાદી માહોલ
મહેસાણામાં વહેલી સવારથી જ વરસાદી માહોલ જામ્યો છે. વાદળછાયા વાતાવરણ વચ્ચે વરસાદ તૂટી પડતા નીચાણ વાળા વિસ્તારો પાણી પાણી થયા હતા. ઊંઝામાં વહેલી સવારે ધોધમાર વરસાદથી ઠેર ઠેર પાણી ભરાતા વાહનચાલકો પરેશાન થયા હતા. રોડ રસ્તા પાણી પાણી થતા રાહદારીઓ પરેશાન થયા હતા. આ ઉપરાંત વડનગર, ખેરાલુ અને મહેસાણામાં પણ વરસાદ જોવા મળ્યો.
અરવલ્લીમાં વરસાદ
અરવલ્લીમાં પણ વરસાદનો બીજો રાઉન્ડ શરૂ થયો છે. ભિલોડા, માંકરોડા, ખલવાડ, લીલછા સહિતના વિસ્તારમાં વરસાદ થતા અનેક વિસ્તારો પાણી પાણી થયા. પવન સાથે વરસાદ તૂટી પડતા વાતાવરણમાં ઠંડકની લહેર ફરી વળી હતી.
સોમવારે આ વિસ્તારમાં વરસાદ થશે
સુરત, ડાંગ, તાપી, નવસારી, વલસાડ
પોરબંદર, જૂનાગઢ, અમરેલી, ગીરસોમનાથ
દીવ,ગાંધીનગર,ખેડા,અમદાવાદ,આણંદ
ભરૂચ,ભાવનગર,બોટાદ,દમણ
મંગળવારે આ વિસ્તારમાં વરસાદ થશે
નવસારી, વલસાડ, પંચમહાલ, વડોદરા
સુરત, ડાંગ,છોટાઉદેપુર,નર્મદા
તાપી, સુરેન્દ્રનગર, અમરેલી,ભાવનગર
બોટાદ,અરવલ્લી, ખેડા,અમદાવાદ,આણંદ
ડીસામાં 1 કલાકમાં 1 ઇંચ
તો આ તરફ બનાસકાંઠાના ડીસામાં એક કલાકમાં 1 ઇંચ વરસાદ ખાબક્યો, જિલ્લાના અનેક વિસ્તારમાં ગાજવીજ સાથે વરસાદ થતા રહીશોએ બફરામાંથી રાહત મેળવી હતી. સારો એવો વરસાદ થતા ખેડૂતો પણ ખુશખુશાલ જણાયા. વાવેતર બાદ વરસાદી માહોલ જામતા ખેડૂતોએ સારા ઉત્પાદનની આશા સેવી.
સાબરકાંઠામાં મેઘમહેર
સાબરકાંઠામાં આજે સવારથી વરસાદની પધરામણી થઇ ગઇ છે. ખેડબ્રહ્મા, વડાલી, રવિપુરા સહિતના ગ્રામ્ય વિસ્તારોમાં મેઘો ધોધમાર વરસ્યો. વડાલીમાં એક જ કલાકમાં એક ઇંચ વરસાદ વરસતા ખેડૂતો ખુશખુશાલ જણાયા. ખેડબ્રહ્માના રાધીવાડા, મેત્રાલ, માતાજીકંપામાં વરસાદી માહોલ જોવા મળી રહ્યો છે. આ તરફ હિંમતનગરના ગાંભોઇ, રૂપાલ, ગાંધીપુરા અને વાવડીમાં પણ વરસાદ થતા ખેડૂતોમાં હરખની લાગણી ફરી વળી છે. મહત્વનું છે કે પહેલા રાઉન્ડમાં અત્યાર સુધીમાં 25 ઇંચ જેટલો વરસાદ વરસ્યો છે પરંતુ હજી પણ જિલ્લાના જળશાયો ખાલી જ જોવા મળી રહ્યા છે.