ઓસ્ટ્રેલિયામાં જન્મેલા ક્રિકેટર ૨૩ વર્ષીય એલેક્સ હેમબર્નને ગઈ કાલે એક મહિલા સાથે બળાત્કાર કરવાના ગુનામાં પાંચ વર્ષની સજા ફટકારાઈ. વોર્સેસ્ટરશાયરના ભૂતપૂર્વ ખેલાડી હેમબર્ને ૨૦૧૭માં બળાત્કાર કર્યો હતો. અહેવાલો અનુસાર હેપબર્ને પોતાના મિત્રો સાથે એક વોટ્સએપ ગેમમાં વધુ સ્કોર કરવાની કોશિશમાં આ દુષ્કૃત્ય આચર્યું હતું.
જજે હેમબર્નને ચુકાદો સંભળાવતા કહ્યું, '' અપરિપક્વ ક્રિકેટર અને તેના સાથીઓએ એ કબૂલી લીધું છે કે તેઓ બધાએ મળીને વિચિત્ર રમતને ખરાબ અંજામ આપ્યો. તેં કદાચ એ સમયે એવું વિચાર્યું હશે કે આ એવું છે, જેવું યુવાનો કરતા રહે છે, પરંતુ હકીકતમાં આ ખોટો વ્યવહાર હતો. તેં આ મહિલાનું અપમાન કર્યું છે અને તેને દુષ્કર્મથી પરેશાન કરી છે. હવે તને ખબર પડશે કે આ કેટલો ગંભીર ગુનો હતો. ''
એલેક્સ હેપબર્ને પોતાના સાથી ક્રિકેટરના બેડરૂમમાં મહિલા સાથે દુષ્કર્મ આચર્યું હતું. આ ખેલાડીએ વોટ્સએપ ગ્રૂપ પર સેક્સ્યુઅલ કોનક્વેસ્ટ ગેમ (વધુમાં વધુ મહિલાઓ સાથે સહશયન કરવું)માં ભાગ લીધો હતો. કોર્ટમાં બચાવ પક્ષના વકીલે દલીલ કરી હતી કે એલેક્સે (એપ્રિલ-૨૦૧૭) વધુમાં વધુ મહિલાઓ સાથે સેક્સ કરવાની સ્પર્ધાને કારણે આ ભૂલ કરી.
ઉલ્લેખનીય છે કે અગાઉ પીડિતાએ જ્યુરીને જણાવ્યું હતું, ''મને ખબર નહોતી કે હું હેપબર્ન સાથે છું. મને લાગ્યું કે હું ક્લાર્ક સાથે ઊંઘી રહી છું. હેપબર્નના વાળને અડક્યા પછી ખબર પડી કે હું ક્લાર્ક સાથે નથી.'' પીડિતાના જણાવ્યા અનુસાર, ''હેપબર્ન મારી સુંદરતાનાં વખાણ કરવા લાગ્યો હતો અને શારીરિક સંબંધ બનાવવા માટે મનાવવા લાગ્યો હતો, પણ મેં ના પાડી દીધી હતી. આમ છતા તેણે જબરદસ્તી સંબંધો બનાવ્યા હતા.''
વેસ્ટર્ન ઓસ્ટ્રેલિયામાં જન્મેલો ઓલરાઉન્ડર હેપબર્ન પોતાની ક્રિકેટ કરિયર બનાવવા માટે ૨૦૧૩માં ઇંગ્લેન્ડ આવ્યો હતો, પરંતુ આ ઘટના બાદ તેની કરિયર પર પૂર્ણવિરામ મુકાઈ ગયું છે.