મંજૂરી / અમદાવાદીઓને ટ્રાફિકની પળોજણમાંથી મળશે મુક્તિ, AUDA બનાવશે 10 નવા ફ્લાય ઓવર અને અંડર બ્રિજ

• એસપી રિંગ રોડ પર ટ્રાફિક થશે હળવો
• ટ્રાફિકવાળા જંક્શનો પર AUDA બનાવશે ફ્લાય ઓવરબ્રિજ
• અંદાજે 790 કરોડ રૂપિયાના ખર્ચે બનશે 10 નવા બ્રિજ

અમદાવાદ શહેરનો વ્યાપ દિવસેને દિવસે કૂદકે ને ફૂદકે વધી રહ્યો છે. નવા અમદાવાદમાં હવે સિંધુ ભવન, શિલજ, સેલા, બોપલ જેવા વિસ્તારો તરફ ડેવલપમેન્ટ જોવા મળી રહ્યું છે. ત્યારે આ વિસ્તારો તરફ જવાનો માર્ગ એટલે કે 76 કિ.મી.ના સરદાર વલ્લભભાઇ પટેલ(SP) રિંગ રોડને ડેવલપમેન્ટ કરવાનું લક્ષ્ય નક્કી કરી દીધું છે. SP રિંગ રોડ પર ટ્રાફિકની સમસ્યા હળવી બનાવી શકાય તે માટે AUDA દ્વારા વધુ 10 નવા જંક્શન પર ફ્લાય ઓવર અને અંડર બ્રિજ બનાવવા માટે પ્લાનિંગ કરાયું છે.

10 બ્રિજ બનાવવા માટે અંદાજે 790 કરોડ જેટલો ખર્ચ થશે 
જેના માટે AUDA (અમદાવાદ અર્બન ડેવલપમેન્ટ ઑથોરિટી)એ એશિયન ડેવલપમેન્ટ બેંક (ADB) સમક્ષ વિકાસના કામો માટે લોનની દરખાસ્ત મૂકી હતી જેને મંજુરી મળી ગઇ છે. આ પ્રોજેક્ટ ADB બેંકે મંજૂર કરી દિધો છે. AUDAના CEO આરબી દેસાઇના મતે બ્રિજ બનાવવા અને રોડની મરામત માટે 790 કરોડ જેટલો ખર્ચ થનાર છે. ફ્લાયઓવર બ્રિજ બનાવવા માટે ટેન્ડર બહાર પાડવામાં આવ્યાં છે.

વાહનચાલકોને મુશ્કેલી ન પડે તે માટે બનાવ્યો આ પ્લાન
જ્યારે બ્રિજના કામ શરૂ થતા હોય છે ત્યારે તે બ્રિજનું કામ 2થી 4 વર્ષ સુધી ચાલતું હોય છે, જે દરમિયાન વાહનચાલકોને બિસ્માર રસ્તાઓ જેવી મુસીબતોનો સામનો કરવો પડતો હોય છે ત્યારે આ બાબતે AUDA દ્વારા વિશેષ આયોજન કરવામાં આવ્યુ છે. જે સમયે 10 નવા ફ્લાયઓવર બ્રિજ બનાવવાની શરૂઆત થશે તેની પહેલા જે સર્વિસ રોડ છે તે ડામરના બદલે RCCના બનાવવામાં આવશે અને RCCના રોડ બન્યા બાદ ટ્રાફિકને તે રોડ પર ડાઇવર્ટ કરી બ્રિજનું કામ શરૂ કરાશે. જેથી કરીને બ્રિજ બને ત્યા સુધી નાના અને મોટા વાહનોને ખરાબ રોડ રસ્તાનો સામનો ન કરવો પડે.

કેન્દ્રીય ગૃહપ્રધાનના હસ્તે ફ્લાયઓવરનું કરાયું હતું લોકાર્પણ
મહત્વનું છે કે, તાજેતરમાં જ કેન્દ્રીય ગૃહપ્રધાન અમિત શાહના હસ્તે  ભાડજ સર્કલ પર બનાવવામાં આવેલા ફ્લાયઓવરનું લોકાર્પણ કરવામાં આવ્યું છે. ગત 26મી સપ્ટેમ્બરે ભાડજ ખાતે એસ.પી રિંગ રોડ પર 73.33 કરોડના ખર્ચે નિર્માણ પામેલા ઓવરબ્રિજનું અમિત શાહે લોકાર્પણ કર્યું હતું. સિક્સ લેનનો આ બ્રિજ 27 મીટર પહોળો છે અને 73.33 કરોડના ખર્ચે બનાવવામાં આવ્યો છે. ભાડજ સર્કલ અત્યાર સુધી એસપી રિંગ રોડ પર સૌથી વધુ ટ્રાફિક ધરાવતું સર્કલ હતું. બ્રિજ બન્યા પછી રોજના 21 હજાર ભારે વાહન સીધા જ ફ્લાયઓવર પરથી નીકળી જશે.