દેશમાં મોનસૂને ધીરે ધીરે જોર પકડી રહ્યું છે. ત્યારે હવામાન વિભાગે મહારાષ્ટ્ર, ગુજરાત અને રાજસ્થાન સહિત દેશના અનેક ભાગમાં ભારે વરસાદનું અલર્ટ આપ્યું છે. હવામાન વિભાગના જણાવ્યા અનુસાર દેશના 17 રાજ્યોમાં આગામી ત્રણથી ચાર દિવસ સુધી ભારે વરસાદની ચેતવણી જાહેર કરવામાં આવી છે.
આસામના જોરહાટમાં વરસાદ બાદ પૂરની સ્થિતિ
આસામના જોરહાટમાં ભારે વરસાદે ઠેર ઠેર તબાહી સર્જી છે. વરસાદ બાદ આસામમાં પૂરની સ્થિતિ સામે આવી છે. જોરહાટમાં ભારે વરસાદ બાદ જોરહાટ ટાપૂમાં ફેરવાયો છે. ઠેર ઠેર પાણી ભરાતા લોકોને હાલાકી ભોગવવાનો વારો આવ્યો છે.
નદી નાળાઓમાં પણ વરસાદી પાણીની આવક થતા પાણીનું સ્તર ભયજનક સ્તરે જોવા મળી રહી છે. જોરહાટમાં વરસાદી પાણી ફરી વળતા ઢીંચણસમા પાણી ભરાયા છે. શાળાઓ અને દવાખાનામાં પણ વરસાદી પાણી ભરાતા લોકોને ભારે મુશ્કેલીનો સામનો કરવો પડી રહ્યો છે. વરસાદી પાણી ફરી વળતા જન જીવન અસ્તવ્યસ્ત બન્યુ છે.
આગામી ત્રણ દિવસ સુધી દિલ્લી-NCRમાં વરસાદની આગાહી
દિલ્લી-NCR માં આગામી 3 દિવસ સુધી વરસાદી માહોલનું આગાહી હવામાન વિભાગે કરી છે. આગામી ત્રણ દિવસ સુધી દિલ્લીમાં વરસાદી માહોલ રહે તેવું અનુમાન છે. હવામાન વિભાગનું માનીએ તો આજે દિલ્લી-NCRમાં વાદળો છવાયેલા રહેશે. આ દરમિયાન સામાન્ય વરસાદ થઈ શકે છે. જો વરસાદ પડશે તો દિલ્લીવાસીઓને પણ ગરમીથી રાહત મળી શકે છે.
હવામાન વિભાગનું કહેવું છે કે 10-11 જુલાઈના રોજ વાદળો રહેશે અને હળવો વરસાદ પડી શકે છે. જ્યારે 12-13 જુલાઈ સુધી કડાકાભેર સાથે વરસાદ વરસી શકે છે. દિલ્લી અને આસપાસના વિસ્તારોમાં પણ વરસાદની આગાહી છે. હવામાન વિભાગની ભવિષ્યવાણી મુજબ, આગામી 10-15 દિવસ સુધી દિલ્લી એનસીઆરમાં છુટોછવાયો વરસાદ પણ પડી શકે છે. જ્યારે 10 જુલાઈ બાદ ભારે અને મૂશળધાર વરસાદનું અનુમાન છે.
દેશના 17 રાજ્યોમાં આગામી ત્રણથી ચાર દિવસ સુધી ભારે વરસાદની ચેતવણી
ઉત્તર પ્રદેશ, પંજાબ, બિહાર, ઉત્તરાખંડ સહિત અનેક રાજ્યોમાં વરસાદનો કહેર જોવા મળી રહ્યો છે. આ વચ્ચે ઉત્તરાખંડમાં ઓરેન્જ અલર્ટ જાહેર કરવામાં આવ્યું છે. હવામાન વિભાગના જણાવ્યા અનુસાર આજે દહેરાદૂન, ચમોલી, બાગેશ્વર, નૈનીતાલ અને ઉધમસિંહ નગરમાં ભારે વરસાદની આગાહી છે. આ વચ્ચે દહેરાદૂનમાં ભારે વરસાદ વરસી રહ્યો છે. હવામાન વિભાગે મહારાષ્ટ્ર, ગુજરાત, રાજસ્થાન, કર્ણાટક, તમિલનાડૂ સહિત દેશના અનેક ભાગમાં ભારે વરસાદનું અલર્ટ આપ્યું છે.