કઝાખસ્તાનમાં ગેસની કિમંત વધતા લોકોનો રોષ ચરમસીમાએ. સરકારી ઇમારતોમાં કરી તોડફોડ, 8 સુરક્ષાકર્મીઓના મોત
કઝાખસ્તાનમાં ગેસની કિમંતમાં વધારો થતા હિંસા પ્રદર્શન
રાષ્ટ્રપતિએ દેશમાં કટોકટીની સ્થિતિ કરી જાહેર
હિંસામાં 8 સુરક્ષાકર્મીઓના મોત
એક એવો દેશ કે જ્યાં નજીવી બાબતે ખૂનીખેલ ખેલાઇ ગયો. એક એવો દેશ કે જ્યાં સરકારના નિર્ણય પર લોકોએ ફિટકાર વરસાવી. સરકારના નિર્ણય પર પ્રજા વિરોધ પ્રદર્શન અને સૂત્રોચ્ચાર કરે ત્યાં સુધી તો બરાબર પણ અહીં તો પ્રદર્શનકારીઓમાં એટલો રોષ કે સરકારી ઇમારતોમાં આગચંપી કરી. આ દેશ છે કઝાખસ્તાન. જ્યાં ગેસના ભાવ વધતા વિરોધનો વંટોળ શરૂ થયો અને ધીરે ધીરે આખા દેશમાં ફેલાઇ ગયો.કઝાખસ્તાનના કેટલાક વિસ્તારોમાં તો ભારે હિંસા અને આગચંપીને કારણે રાષ્ટ્રપતિએ કટોકટીની સ્થિતિ જાહેર કરવી પડી. તણાવગ્રસ્ત માહોલને જોતા રશિયાના રાષ્ટ્રપતિ વ્લાદિમીર પુતિને ગત રાત્રે પોતાની સેના કરી દીધી.
પ્રદર્શનકારીઓએ અલ્માટી કર્યુ માથે
કઝાખસ્તાનનું સૌથી મોટુ શહેર ગણાતા અલ્માટીમાં પ્રદર્શનકારીઓએ ભારે વિરોધ નોંધાવ્યો. ગેસના ભાવમાં વધારો થતા લોકોમાં એટલો રોષ વ્યાપી ગયો કે તેઓ સીધા રાષ્ટ્રપતિ અને મેયરના ઘર તરફ ધસી આવ્યા હતા. મેયર અને રાષ્ટ્રપતિના ઘરનો ઘેરાવો કરીને તોડફોડ કરી. આટલુ ઓછુ હોય તેમ ઘરને આગ ચાંપી હતી. પ્રદર્શનકારીઓએ સરકારી ઇમારતોમાં પણ આગ લગાવી. માહોલ એટલો ત્રસ્ત હતો કે પોલીસ પણ પ્રદર્શનકારીઓને રોકી ન શકી. પોલીસે તેઓને કાબૂમાં લેવા માટે ગોળીબાર પણ કર્યો. પોલીસ અને પ્રદર્શનકારીઓ વચ્ચેના ઘમાસાણમાં 8 સુરક્ષાકર્મીઓ મોતને ભેટ્યા હોવાનુ સામે આવ્યુ છે.મહત્વનુ છે કે છેલ્લા ઘણા દિવસોથી અલ્માટીમાં પ્રદર્શનકારીઓ અને પોલીસ વચ્ચે ઘણીવખત તકરાર થઇ છે. કઝાખસ્તાનમાં કાતિલ ઠંડી પડી રહે છે તેમ છતાં પોલીસે પ્રદર્શનકારીઓ પર પાણીનો મારો ચલાવીને સ્થિતિ કંટ્રોલમાં લાવવાનો પ્રયત્ન કર્યો હતો.
300 લોકો થયા ઘાયલ
કઝાખસ્તાનના ગૃહમંત્રાલયે કહ્યુ કે આ હિંસામાં અત્યારસુધી 8 પોલીસ અધિકારીઓ અને નેશનલ ગાર્ડના સભ્યો મોતને ભેટ્યા. જ્યારે ઓછામાં ઓછા 300 લોકો ઘાયલ થયા છે. તો રાષ્ટ્રપતિ કાસમ ઝોમાર્ટે કહ્યું કે અશાંતિને નેસ્ત નાબૂદ કરવામાં આવશે અને આખા દેશમાં એક સપ્તાહ માટે કટોકટીની સ્થિતિ લાગુ કરવાની જાહેરાત કરી. રાષ્ટ્રપતિએ ગત રાત્રે રશિયાને અપીલ કરી હતી કે હિંસાને કાબૂમાં લેવા માટે પોતાની સેના મોકલે.
અગાઉ આ સરકારે આપ્યુ હતું રાજીનામુ
મહત્વનુ છે કે અગાઉ મધ્ય એશિયાઇ દેશ કઝાખસ્તાનમાં ગેસની કિંમતમાં વધારો થતા ભડકેલી જનતાએ હિંસક પ્રદર્શન કર્યા બાદ સરકારે રાજીનામુ આપી દીધુ હતું. કઝાખસ્તાનના રાષ્ટ્રપતિ કાસમ ઝોમાર્ટે ટોકાયેવના પ્રધાનમંત્રી અસ્કાર મામિનનું રાજીનામુ સ્વીકાર કર્યુ હતું. રાષ્ટ્રપતિએ વીડિયો સંદેશમાં જણાવ્યુ હતું કે સરકાર અને સેના પર હુમલો કરવા માટે આહ્વાન કરવુ તે અમાન્ય છે.