અરવલ્લી જિલ્લાના બાયડ તાલુકામાં આવેલી હમીરપુરા પ્રાથમિક શાળામાં કુલ 145 બાળકો અભ્યાસ કરે છે. શાળામાં 6 શિક્ષકો ફરજ બજાવે છે. શાળામાં બાળકોને પીવાના પાણીની વ્યવસ્થા માટે તંત્ર દ્વારા 300 ફૂટ ઊંડો બોર બનાવાયો છે.
પરંતુ આ વિસ્તારમાં જળસ્તર 700 ફૂટ નીચે જતાં બોરનું પાણી આવતું બંધ થઈ ગયું છે. જેના કારણે બાળકો પીવાના પાણીની સમસ્યાથી મુશ્કેલી ભોગવી રહયા છે હાલ બાળકો પોતાના દફતરની સાથે એક-એક લિટર પાણીની બોટલ ઊંચકી લાવવા મજબૂર બન્યા છે.
ઉલ્લેખનીય છે કે સમગ્ર મામલે ગ્રામ પંચાયતના સરપંચનો સંપર્ક કરવામાં આવતા તેમણે જણાવ્યું હતું કે હમીરપુરા પ્રાથમિક શાળામાં પાણીની સમસ્યા અંગે તાલુકા પંચાયત કચેરીને જાણ કરવામાં આવી છે.અને ઝડપથી શાળાના બાળકોની પાણીની સમસ્યા દૂર થાય તેવા પ્રયત્નો ચાલુ છે.