અરવલ્લીના મોડાસામાં યુવતીના મોત મામલે સમગ્ર રાજ્યમાં ચકચાર મચી હતી. ત્યારે આ મામલે સમગ્ર તપાસ CIDને સોંપવામાં આવી હતી. DGP શિવાનંદ ઝાએ સમગ્ર કેસની તપાસ CID ક્રાઇમને સોંપી હતી. યુવતીના પરિવારજનોએ તપાસ CIDને સોંપવાની માગ કરી હતી. ત્યારે હવે આ કેસની તપાસ કરી રહેલ CID ક્રાઇમના SITના વડા ગૌતમ પરમારે પ્રેસ કોન્ફરન્સ કરી હતી.
મોડાસાના સાયરામાં યુવતીનાં મોતનો મામલો
CID ક્રાઇમના SITના વડા ગૌતમ પરમારે પ્રેસ કોન્ફરન્સ કરી
પીડિતા સાથે દુષ્કર્મ થયું નથીઃ ગૌતમ પરમાર
મોડાસાના સાયરાની પીડિતાના શંકાસ્પદ મોત મામલે ચાર આરોપીઓ સામે મોડાસા ગ્રામ્ય પોલીસ સ્ટેશનમાં અપહરણ સામુહિક દુષ્કર્મ અને હત્યાનો ગુનો નોંધાયો છે. જીલ્લામાં ચકચારી બની ચુકેલા આ કેસની નિષ્પક્ષ તપાસ CID ક્રાઈમને સોપવામાં આવી હતી.
નિવેદનો, ફોન રેકોર્ડિંગ અને પુરાવાના આધારે પીડિતા સાથે દુષ્કર્મ થયું નથીઃ SIT
ત્યારે રાજ્યના પોલીસ વિભાગ દ્વારા આ કેસની તપાસ સીઆઈડી ક્રાઈમને સોપવામાં આવી હતી જે અંતર્ગત સીઆઈડી ક્રાઈમના SITના વડા ગૌતમ પરમારે આ મામલે પ્રેસ કોન્ફરન્સ કરતા જણાવ્યું હતું કે FSL, પોસ્ટ મોર્ટમ રિપોર્ટ, પુરાવા અને સાક્ષીઓના નિવેદનો લેવામાં આવ્યા છે. મુખ્ય આરોપી બિમલ ભરવાડ પીડિતાને ઘરે અને ગેસ્ટહાઉસમાં લઇ ગયો હતો. 14-15 ડિસેમ્બરના રોજ પીડિતા આરોપી દર્શન ભરવાડના સંપર્કમાં આવી હતી. ત્યારબાદ બિમલ ભરવાડ અને પીડિતાની બહેન વચ્ચે સંપર્ક થયો હતો. જ્યાં પીડિતા સાથે બિમલે મિત્રતા કરી અને પ્રેમ સંબંધ બંધાયો હતો. ત્યારબાદ બિમલ પીડિતાના ઘરે અને ગેસ્ટ હાઉસમાં લઇ ગયો હતો. આ દરમિયાન પીડિતાએ પીડિતાએ બિમલ સાથે રહેવા માટે દબાણ કર્યું હતું. બિમલ પરિણીત હતો. પરંતુ બિમલ તૈયાર ન થતાં પીડિતાએ બિમલને બ્લેકમેઇલ કરવાનું શરૂ કર્યું હતું. જેથી તમામ નિવેદનો, ફોન રેકોર્ડિંગ અને પુરાવાના આધારે પીડિતા સાથે દુષ્કર્મ થયું નથી. કોઇ વીર્ય કે લાળ મળી નથી. પીડિતાએ આત્મહત્યા કરી હોવાનું CIDની તપાસમાં સામે આવ્યું છે.
શું છે સમગ્ર મામલો ?
અરવલ્લીના સાયરાની યુવતી 31 ડિસેમ્બરે ગુમ થઇ હતી. ત્યારબાદ પરિવારજનો દ્વારા શોધખોળ કરવામાં આવી હતી. આ યુવતી મળી ન આવતા મોડાસા પોલીસને જાણ કરવામાં આવી હતી. યુવતી ગુમ થયાના 5 દિવસ બાદ પણ કોઇ ભાળ મળી ન હતી. ત્યારબાદ આ યુવતીની સાયરા ગામના ખેતરના એક વૃક્ષ પર લાશ લટકતી હોવાનું સામે આવ્યું હતું. જ્યારબાદ સમગ્ર મામલે કાર્યવાહી અને તપાસ શરૂ થઇ હતી. આ મામલે ચાર આરોપીઓ વિરૂદ્ધ ફરિયાદ નોંધાઇ હતી. જેમાં બિમલ ભરવાડ, દર્શન ભરવાડ, સતિષ ભરવાડ અને જીગર વિરૂદ્ધ ફરિયાદ નોંધાઇ હતી.