અરવલ્લી જિલ્લામાંથી દારૂની હેરાફેરીમાં નવો કીમિયો સામે આવ્યો છે. શામળાજીના અણસોલ નજીકથી ચપ્પલના બોક્સની આડમાં લવાતો દારૂ ઝડપાયો છે. પોલીસે ચપ્પલના બોક્સમાંથી રૂ. 4 લાખનો દારૂ ઝડપી પાડયો છે. આ સાથે દારૂ લઇને આવતા હરિયાણાના બે શખ્સની અટકાયત કરી છે અને ટ્રક દારૂ સહિત કુલ 14.81 લાખનો મુદ્દામાલ જપ્ત કર્યો છે.
ઉલ્લેખનીય છે કે ગુજરાતમાં દારૂબંધી છે તેમ છતાં કેટલાક લોકો દ્વારા ગેરકાયદેસર રીતે દારૂની હેરફેર કરવામાં આવતી હોય છે અને અન્ય રાજ્યમાંથી મંગાવવામાં આવતા દારૂને ગુજરાતની બોર્ડરમાં ઘુસાડવા યેનકેન પ્રકારે નવા નવા પ્રયોગ પણ હાથ ધરવામાં આવતા હોય છે.
આ પહેલા પણ CNG ગેસ ટેન્કમાં કે પછી ખાનગી ટેક્સીમાં દારૂની હેરફેર કરવામાં આવતી હોવાનું ધ્યાને આવેલ અને જો કે ગુજરાતની સજાગ પોલીસે બાતમીના આધારે દારૂના મોટા જથ્થાને પકડી પાડેલ ત્યારે આજરોજ ચપ્પલના બોક્સમાં દારૂ ભરીને કરવામાં આવતી હેરફેરનો પર્દાફાશ કરેલ અને 4 લાખની કિંમતના દારૂ ભરેલ ટ્રક અને 2 અન્ય રાજ્યના લોકોની ધરપકડ કરેલ.