ઈઝરાઈલે ગાઝાની બિલ્ડિંગને મિસાઈલથી ઉડાવી મૂકતા જ જમ્મુ કાશ્મીરમાં ઈઝરાયલની વિરૃદ્ધ ભયંકર દેખાવ ફાટી નીકળ્યો છે.
ઈઝરાઈલની વિરૃદ્ધ ખીણ વિસ્તારના લોકો ભારે રોષ
ગાઝામાં ઈઝરાયલી હુમલાના પડધા ખીણ વિસ્તારમાં પડ્યાં
લોકો ઈઝરાયલની વિરૃદ્ધ રસ્તા પર ઉતરી પડ્યાં
ઈઝરાયલના ઝંડા સળગાવ્યાં
પ્રદર્શનકારીઓને કાબૂમાં લેવા પોલીસને નાકે દમ આવ્યો
જમ્મુ કાશ્મીરના વિવિધ ભાગોમાં લોકો ઈઝરાયલની વિરૃદ્ધ રસ્તા પર ઉતરી પડ્યાં હતા. લોકોએ ઈઝરાયલની વિરૃદ્ધ નારેબાજી કરીને તેના ઝંડા સળગાવ્યાં હતા. ઈઝરાયલ પેલેસ્ટાઈનને અન્યાય કરી રહ્યો હોવાનો લોકોમાં મોટાપાયે રોષ છે. શ્રીનગરના એક આર્ટિસ્ટે તો પેલેસ્ટાઈની મહિલાનો ચહેરો પણ દોરી નાખ્યો. પેલેસ્ટાઈની મહિલાનો ચહેરો ચિતરનાર આર્ટિસ્ટની સામે જમ્મુ કાશ્મીર પોલીસે ફરિયાદ દાખલ કરી છે.
કાશ્મીર ખીણ વિસ્તારમાં મોટાપાયે ઈઝરાયલની વિરૃદ્ધ દેખાવ થતા પોલીસ પણ હરકતમાં આવી હતી. પ્રદર્શનકારીઓને શાંત પાડવા પોલીસને નાકે દમ આવી ગયો હતો. પોલીસે ઠેરઠેર ચાંપતો બંદોબસ્ત ગોઠવીને પ્રદર્શનકારીઓની સામે કડક હાથે કામ લીધું હતું. પોલીસે લોકોને શાંતિથી વિખેરાઈ જવાની પણ અપીલ કરી હતી. હાલમાં જમ્મુ કાશ્મીરમાં લોકડાઉન છે.
ઈઝરાઈલી મિસાઈલ હુમલામાં 12 માળની આખી જલા બિલ્ડિંગ જમીનદોસ્ત થઈ થઈ છે. આ 12 માળની બિલ્ડિંગમાં ઘણા મીડિયા ગૃહોની ઓફિસો આવેલી હતી. એસોસિએટેડ પ્રેસ (એપી), કતારની ન્યૂઝ એજન્સી (અલ જજિરા) સહિત ઘણી મીડિયાની ઓફિસો ત્યાં આવેલી હતી. મિસાઈલ હુમલામાં મીડિયા સંસ્થાનોની ઓફિસોને મોટાપાયે નુકશાન થયું છે.
મિસાઈલ હુમલો કરતા પહેલા ઈઝરાયલે એક કલાક પહેલા મીડિયાકર્મીઓ તથા પત્રકારોને હટી જવાની ચેતવણી આપી હતી. ઈઝરાઈલની ચેતવણી મળતા પત્રકારો ત્યાંથી ખસી ગયા હતા પરિણામે તેમના જીવ બચી ગયા હતા.