આગાહી / આગામી 24 કલાકમાં ગુજરાતમાં કડાકા-ભડાકા સાથે થશે મેઘરાજાની એન્ટ્રી! 30થી 40 કિમીની ઝડપે પવન ફુંકાઇ શકે

• ગુજરાતમાં માવઠાની હવામાન વિભાગની આગાહી 
• રાજ્યના અનેક વિસ્તારોમાં વીજળીના ચમકારા સાથે વરસાદ
• વરસાદ પડતા ખેડૂતોની ચિંતા બેવડી થઈ
• 24 કલાકમાં દક્ષિણ ગુજરાતમાં પડી શકે છે વરસાદ

રાજસ્થાન અને તેની આસપાસના વિસ્તારમાં સક્રિય થયેલાં સાયક્લોનિક સરક્યુલેશનની અસરથી રાજ્યના કેટલાક વિસ્તારોના વાતાવરણમાં પલટો આવ્યો છે.  ત્યારે અન્નદાતાઓ માટે વધુ એક માઠા સમાચાર સામે આવ્યા છે. આગામી 24 કલાકમાં દક્ષિણ ગુજરાતના વિવિધ વિસ્તારોમાં 30થી 40 કિલોમીટરની ગતિના તોફાની પવનો અને વીજળીના કડાકા ભડાકા સાથે વરસાદની શક્યતા છે. મહત્વનું છે કે, ગતરોજ સુરત, બારડોલી, વડોદરા અને ભાવનગરમાં કમોસમી વરસાદ ખાબક્યો હતો.

સુરત-બારડોલીમાં ગાજવીજ સાથે માવઠું
ગઈકાલે સુરત ઉપરાંત બારડોલીના પલસાણા, કડોદરા, કામરેજ અને નિઝર સહિતના વિસ્તારોમાં ગાજવીજ સાથે માવઠું થયું હતું. જેથી ઉનાળાની શરૂઆત સાથે જ ચોમાસા જેવો માહોલ બની ગયો હતો. કમોસમી વરસાદથી ખેડૂતો ચિંતામાં મુકાઈ ગયા હતા. આ ઉપરાંત ગઈકાલે મોડી રાત્રે વડોદરના વાતાવરણમાં પણ પલટો આવ્યો હતો. 

વડોદરામાં પણ ખાબક્યો હતો કમોસમી વરસાદ
માવઠાની આગાહી વચ્ચે વડોદરા શહેર અને જિલ્લામાં મોડી રાત્રે કમોસમી વરસાદ ખાબક્યો હતો. શહેરના સયાજીગંજ, રાવપુરા સહિતના અનેક વિસ્તારોમાં કમોસમી વરસાદ પડ્યો હતો. ઉનાળાની શરૂઆતમાં વરસાદ વરસતા ખેડૂતોની ચિંતા વધી છે.

તળાજાના ગ્રામ્ય પંથકમાં વરસાદથી જગતનો તાત ચિંતિત
કમોસમી વરસાદની આગાહીનાં પગલે સૌરાષ્ટ્ર સહિત રાજ્યની મોટા ભાગની એપીએમસી દ્વારા હરાજી બંધ રાખવામાં આવી હતી. જેથી ખેડૂતોનો પાક વરસાદમાં ભીનો ન થાય. ત્યારે એકાએક ભાવનગરના તળાજાના ગ્રામ્ય પંથકમાં કમોસમી વરસાદ વરસવાનો શરૂ થતા જગતનો તાત ચિંતિત થવા પામ્યો હતો. ભાવનગર તેમજ તળાજા સહિત ગ્રામ્ય વિસ્તાર અલંગ, મણાર, સથરા, કઠવા, ત્રાપજમાં વરસાદ વરસવા પામ્યો હતો. કમોસમી વરસાદ વરસતા કેરીના પાકને નુકસાન થવાની ભીંતિ ખેડૂતો સેવી રહ્યા છે. 

થોડા દિવસો પહેલા પણ થયા હતા માવઠાં
ઉનાળાની શરૂઆતમાં માવઠાની સ્થિતિ સર્જાતા ખેડૂતો ફરી એક વખત ચિંતિત બન્યા છે. હજુ થોડા દિવસો પહેલા જ માવઠા અને કારણે ખેડૂતોના પાકને મોટું નુકસાન થવા પામ્યું હતું ત્યારે ફરી એક વખત ત્રણ દિવસની વરસાદની આગાહીને લઈ વરસાદ પડતા ખેડૂતોની ચિંતા બેવડી થઈ ગઈ છે.

હવામાન વિભાગે કરી છે આગાહી
રાજ્યમાં 15 માર્ચ સુધી ફરીવાર વરસાદ પડવાની શક્યતા હવામાન વિભાગે વ્યક્ત કરી હતી. હવામાન વિભાગે જણાવ્યું હતું કે, રાજ્યમાં તારીખ 13, 14 અને 15 માર્ચે કમોસમી વરસાદ વરસી શકે છે. ગાજવીજ અને ભારે પવન સાથે ઉત્તર-દક્ષિણ ગુજરાત અને સૌરાષ્ટ્રમાં વરસાદ વરસી શકે છે.

કયા-કયા જિલ્લાઓમાં વરસાદની આગાહી?
ઉત્તર ગુજરાતમાં બનાસકાંઠા, પાટણ અને મહેસાણા તો દ. ગુજરાતમાં ડાંગ, વલસાડ, નવસારી, તાપી અને દાહોદ તો સૌરાષ્ટ્રમાં અમરેલી, ભાવનગર તેમજ કચ્છમાં પણ કમોસમી માવઠાની સંભાવના વ્યક્ત કરાઇ છે. જ્યારે મધ્ય ગુજરાતમાં અમદાવાદ અને ગાંધીનગરમાં વાદળછાયું વાતાવરણ રહેશે. તમને જણાવી દઇએ કે, ઉત્તર-પૂર્વીય પવનોના કારણે રાજ્યમાં વાતાવરણમાં પલટો આવશે.

માર્ચમાં આ તારીખે પડશે કમોસમી વરસાદ 
અંબાલાલ પટેલે જણાવ્યું હતું કે, 14થી 17 માર્ચ કમોસમી વરસાદ વરસી શકે છે. ઉત્તર, મધ્ય, દક્ષિણ ગુજરાતમાં વરસાદની શક્યતાઓ છે. આ ઉપરાંત 25થી 28 માર્ચે ફરી કમોસમી વરસાદની સંભાવનાઓ છે. એપ્રિલ મહિનામાં પણ કમોસમી વરસાદની શક્યતાઓ છે. આ 3થી 8 એપ્રિલે વાતાવરણમાં પલટો આવશે. 14મી એપ્રિલે ફરી અષાઢી માહોલ જેમ વીજળીના કડાકા ભડાકા સાથે વરસાદ વરસી શકે છે. સાથે જ આ દરમિયાન કરા પણ પડી શકે છે. માર્ચ મહિના દિવસો ખેડૂતો માટે સારા ગણાશે નહીં.