- પેટલાદ બેઠક પર કોંગ્રેસમાં નારાજગી યથાવત
- ટિકિટ કપાતા નારાજ નેતાના રાજીનામાં
- માતરના કોંગ્રેસ કાર્યકર્તાઓ કાર્યાલયે દોડી ગયા
ગુજરાત કોંગ્રેસના ઉમેદવારોની છેલ્લી યાદી જાહેર કરવામાં આવી છે. પ્રદેશ નેતૃત્વ દ્વારા સંભવિત ઉમેદવારોની યાદી બનાવી દિલ્હી હાઇકમાન્ડ સમક્ષ મોકલવામાં આવી હતી. આ યાદી પર હાઈકમાન્ડની મહોર લાગ્યા બાદ હવે ઉમેદવારોના નામ જાહેર કરી દેવામાં આવ્યા છે. કોંગ્રેસ દ્વારા 37 ઉમેદવારોના નામ જાહેર કરવામાં આવ્યા છે. જેમાં ઉમેદવારોની પસંદગીને લઇને કાર્યકરોમાં અને આગેવાનોમાં રોષ ફેલાયો છે. જેને લઇને ધડાધડ રાજીનામાં પડી રહ્યા છે. આથી ચુંટણી ટાણે કોંગ્રેસને એક પછી એક ફટકા પડી રહ્યાં છે.
ટિકિટ કપાતા નારાજ થયેલા નિરંજન પટેલે આપ્યું રાજીનામું
આણંદના પેટલાદ બેઠક પર કોંગ્રેસમાં નારાજગી યથાવત રહેવા પામી છે. ટીકિટ કપાતા નારાજ ધારાસભ્ય નિરંજન પટેલએ રાજીનામું ધરી દીધું હતું. કોંગ્રેસે ટીકિટ કાપતા સોશિયલ મીડિયામાં રાજીનામાંની પોસ્ટ વાયરલ કરી હતી. અત્રે ઉલ્લેખનીય છે કે અગાઉ નિરંજન પટેલ ભાજપમાં જોડાવાની ચર્ચાઓ ચાલી હતી. જોકે આ અંગે કોઈ ખુલાશો કર્યો નથી.
માતરના કોંગ્રેસ કાર્યકર્તાઓ કાર્યાલયે દોડી ગયા
આજે કોંગ્રેસ દ્વારા ઉમેદવારોની યાદી જાહેર થતા માતરના કોંગ્રેસ કાર્યકર્તાઓ મોટી સંખ્યામાં કાર્યાલય પર દોડી ગયા હતા. કોંગ્રેસના ઉમેદવારો સામે નારાજ કોંગ્રેસના કાર્યકરો કોંગ્રેસના કાર્યાલયે પહોંચ્યા હતા. માતરમાં 2 વખત હારેલા સંજય પટેલને ટિકિટ આપતા કાર્યકર્તાઓએ કોંગ્રેસ કાર્યાલય પર કર્યા સૂત્રોચ્ચાર કર્યા હતા. જોકે કોંગ્રેસ ઓફિસે તાળા લાગેલા જોતા કાર્યકર્તાઓમાં નિરાશા ફેલાઈ હતી.
વડોદરા જિલ્લા કોંગ્રેસના મહામંત્રી અભિષેક ઉપાધ્યાયએ રાજીનામુ આપ્યું
વડોદરાના કરજણ વિધાનસભા બેઠક પર કોંગ્રેસે ઉમેદવાર જાહેર થતા રોષ ફેલાયો છે. રોષને પગલે વડોદરા જિલ્લા કોંગ્રેસના મહામંત્રી અભિષેક ઉપાધ્યાયએ રાજીનામુ આપી દીધું છે. અભિષેક ઉપાધ્યાયએ જણાવ્યું કે પ્રદેશ નેતાગીરીએ મારી અને મારા પરિવારની સતત અવગણના કરી છે. વધુમાં પક્ષ દ્વારા વારંવાર થતી અવગણનાથી રાજીનામું આપું છું ઉપરાંત પ્રજાના હિતમાં સામાજિક કાર્યકર અને લોકકાર્યો કરતો રહીશ તેમ જણાવ્યું હતું.
પંચમહાલના ગોધરામાં કોંગ્રેસ કાર્યાલય પર તોડફોડ કરવામાં આવી હતી. જેમાં ગોધરાના ઉમેદવારની જાહેરાત બાદ કાર્યકરો રોષે ભરાયા હતા અને કાર્યાલયના બહારના ભાગે પથ્થરમારો કર્યો હતો. જેને લઇને પોલીસ અને કોંગ્રેસ અગ્રણીઓ દોડી ગયા હતા. જ્યાં ઉમેદવારથી કાર્યકરો નારાજ હોવાની ચર્ચા જાગી હતી.
