તંત્ર / AMTSના 700 ડ્રાઇવર-કન્ડકટરને અમદાવાદ મ્યુનિસિપલ કોર્પોરેશનમાં શિફ્ટ કરાયા

સંસ્થાના માથે રૂ.ર૮ અબજથી વધુનું દેવું હોઇ કોર્પોરેશનની લોનની કાખઘોડીના સહારે AMTS બસનાં પૈડાં દોડી રહ્યાં છે. ખાનગીકરણના રવાડે ચડેલા તંત્ર દ્વારા એક અંદાજ પ્રમાણે ૭૦૦થી વધુ ડ્રાઇવર-કન્ડકટરને મ્યુનિસિપલ કોર્પોરેશનમાં ધકેલ્યા છે.

એક તરફ AMTS સંસ્થા આવક વધારવા માટે ફાંફે ચડી છે. પેસેન્જર્સને આકર્ષવા માટે ડોકયુમેન્ટરી ફિલ્મ બનાવવા જેવા ગતકડાં કરાઇ રહ્યાં છે. બીજી તરફ ખાનગી ઓપરેટરોનુું સંસ્થામાં ભારે વર્ચસ્વ હોઇ સમગ્ર બસનું સંચાલન ખાનગી ઓપરેટર હસ્તક થઇ ગયું છે.
 

છેલ્લે મળેલા મ્યુનિસિપલ બોર્ડમાં ચાર્ટર્ડ સ્પીડના સ્ટાફની હડતાળ પાછળ બે ઉચ્ચ અધિકારીઓ વચ્ચેનો ટંટો જવાબદાર હોવાનો ખુલ્લેઆમ આક્ષેપ કોંગ્રેસના કોર્પોરેટર તૌફીકખાન પઠાણે કર્યો હતો.

એએમટીએસનો હવાલો સંભાળતા ડેપ્યુટી મ્યુનિસિપલ કમિશનરને નીચું દેખાડવા સંસ્થાના એક ઉચ્ચ અધિકારીએ ઇરાદાપૂર્વક હડતાળ પડાવી હોવાના કોંગ્રેસના આક્ષેપનો શાસક પક્ષ તરફથી વળતો જવાબ અપાયો નહોતો. હવે તંત્ર આગામી દિવસો ૩૦૦ નવી બસ રોડ પર મૂકવા જઇ રહ્યું છે, પરંતુ AMTS સંસ્થામાં ડ્રાઇવરો અને કન્ડકટરોને મ્યુનિસિપલ કોર્પોરેશનમાં વિવિધ ફરજો બજાવવાની ઊલટી ગંગા વહી રહી છે.
 

તૌફિકખાન પઠાણ કહે છે કે તંત્ર દ્વારા કુલ ૪૮૮ ડ્રાઇવર અને કુલ ર૧૪ કન્ડકટર મળીને ૭૦ર ડ્રાઇવર-કન્ડકટરને મ્યુનિસિપલ કોર્પોરેશનમાં મોકલી દેવાયા છે. આમાં આશ્ચર્યજનક બાબત એ છે કે આર્થિક કરકસરના બહાને આ સ્ટાફ મ્યુનિસિપલ કોર્પોરેશનમાં સેન્ટ્રલ વર્કશોપ, ફાયર બ્રિગેડ, સો‌લિડ વેસ્ટ મેનેજમેન્ટ સહિતના વિભાગોના વાહન ચલાવે છે અને કલેરિકલ કલાર્કની જવાબદારી સંભાળે છે. તેમ છતાં દર વર્ષે રૂ.૩૦ કરોડનો પગાર ખર્ચ AMTSની તિજોરીમાંથી ચુકવાઇ રહ્યો છે.

અત્રે ઉલ્લેખનીય છે કે એએમટીએસની રોજની ૭૦૦ બસ રોડ પર મુકાઇ રહી છે. જેે પૈકી સંસ્થાની માલિકીની માંડ ૯૦ બસ દોડે છે. કુલ ૧પ૦ રૂટ પૈકી ૬૦થી વધુ રૂટ બીઆરટીએસ કોરિડોરમાં દોડી રહ્યા છે.

અનેક પ્રયાસો છતાં રોજની આવક રપ-ર૬ લાખથી વધતી નથી તેમજ રોજના પેસેન્જર્સની સંખ્યા પણ સાડા પાંચથી પોણા છ લાખની વચ્ચે રહેવા પામી છે અને જે તે બસમાં પોલવેલિડેટર મૂકીને કન્ડકટર વગરની બસ દોડતી કરવાનો સત્તાવાળાઓનો અખતરો પણ AMTSની રોજની એક કરોડની ખોટમાં વધારો કરે છે.