અહેવાલ / તો શું હવે આ મિત્રની મદદથી પેટ્રોલ સસ્તું થશે, ટ્રમ્પ ભારત માટે જે કરીને ગયા તે નિર્ણય બદલવો પડશે

• ભારતમાં સતત વધી રહ્યા છે પેટ્રોલ ડીઝલની કિંમત 
• ઈરાનથી કાચું તેલ આયાત કરવા પર વિચાર કરી રહી છે ભારત સરકાર 
• ટ્રમ્પના કારણે ભારતે બંધ કરી હતી આયાત 

શું ફરી જૂનો મિત્ર દેશ મદદ કરશે? 

ભારતમાં પેટ્રોલ અને ડીઝલના વધતાં ભાવના કારણે સામાન્ય જનતાની કમર તૂટી ગઈ છે અને વહેલામાં વહેલી તકે રાહત આપવાં આવે તેવી માંગ કરવાં આવી રહી છે. સરકારના મંત્રીઓ ક્રૂડના ભાવ પર દોષનો ટોપલો ઢોળી રહ્યા છે ત્યારે અહેવાલો સામે આવી રહ્યા છે કે ભારત સરકાર હવે ઈરાન તરફ જોઈ રહી છે. અહેવાલો અનુસાર કાચા તેલ માટે ભારત સરકાર ફરીથી ઈરાન તરફ જોઈ રહી છે. ભારત સરકાર તરફથી ઓપેક અને તેમાં સાથી દેશોને પણ અનુરોધ કરવાં આવ્યો છે કે કોરોના વાયરસ મહામારીથી પહેલા જેવી પરિસ્થિતિને ફરી શરૂ કરવામાં આવે. 

કેમ બંધ કરી હતી આયાત? 

ઈરાન સિવાય વેનેઝુએલાથી પણ કાચા તેલના આયાત માટે ભારત વિચારી રહ્યું છે. નોંધનીય છે કે ડોનાલ્ડ ટ્રમ્પ દ્વારા લગાવવામાં આવેલા પ્રતિબંધો બાદથી ભારતે ઈરાન પાસેથી તેલ ખરીદવાનું બંધ કરી દીધું હતું. ઈરાન અને વેનેઝુએલા પાસેથી તેલ ન ખરીદવા માટે અમેરિકા તરફથી સતત દબાણ બનાવવામાં આવી રહ્યું હતું અને તે બાદ વર્ષ 2019માં સરકારે આયાત બંધ કરી હતી. 

અમેરિકામાં સત્તા પરિવર્તન થતાં હવે નિર્ણય લેવામાં સરળતા 

અમેરિકા તરફથી વાયદો કરવામાં આવ્યો હતો કે ઈરાન તરફથી તેલ આવવાનું બંધ થયા બાદ વૈકલ્પિક વ્યવસ્થા કરવામાં આવશે. જોકે હવે ભારત સરકાર તરફથી ઈરાન પાસેથી તેલ આયાત પર વિચાર કરી રહી છે. બીજી તરફ અમેરિકામાં પણ સત્તા પરિવર્તન થયું છે જેના કારણે બાયડન સરકારમાં સંકેત મળી રહ્યા છે કે ઈરાનને લઈને સકારાત્મક નિર્ણય લેવામાં આવી શકે છે.