અમરેલી / ગામમાં શિક્ષકની બદલીને લઈ અધિકારીઓને પાઠ ભણાવવા ખેડૂતે કર્યું એવું કામ કે તમે પણ કહેશો ‘વાહ’

• અમરેલીના નાની કુંકાવાવમાં ગામ લોકોની ગાંધીગીરી
• સભામાં ખેડૂતે જિલ્લા શિક્ષણ અધિકારીને એક લાખ ધરી દીધા
• શાળા ચાલું રાખવા ગામ પગાર ચુકવશે એવું DPEO કહ્યું હતું 

શિક્ષણાધિકારીએ મુકેલી શરતને લઇને અમરેલીના નાની કુંકાવાવ ગામમાં લોકો ગાંધીગીરી પર ઉતરી આવ્યા હતા. ગામની શાળા બંધ કરવાનો નિર્ણય લેવામાં આવ્યો હતો. જો કે ગામના લોકો ઈચ્છે કે શાળા ચાલુ રહે.

જો કે તેના માટે પુરતા વિદ્યાર્થીઓની સંખ્યા ન હોવાથી અમરેલીના DPEO જાદવે લોકો સામે એક શરત મુકી અને કહ્યું કે જો ગ્રામજનો શિક્ષકને પગાર ચૂકવવા તૈયાર હોય તો શિક્ષકને અહીં રાખીએ નહીં તો સરકારી નિયમ અનુસાર તેઓની બદલી કરવામાં આવી છે.

ત્યારે ગ્રામજનોએ આ મામલે DPEOની બોલતી બંધ કરી દીધી. ગ્રામજનોએ ટેબલ પર એક લાખ રૂપિયા એડવાન્સ ધરી દીધા હતા. ખેડૂતો શાળાને બંધ થતી રોકવા માટે શિક્ષકને પગાર ચૂકવવા માટે તૈયાર થઈ ગયા હતા.

ગ્રામજનોએ કહ્યું કે લો આ લાખ રૂપિયા અને આજથી શાળા શરૂ કરી દો. જોકે DPEO જાદવ ગ્રામજનોને ઓફર આપીને ફસાઈ ગયા હતા તેવુ દેખાઇ રહ્યું હતું. જો કે તેમણે બાદમાં જણાવ્યું હતું કે ગ્રામજનો પગાર ચૂકવે તો પણ તેમને અહીં રાખી શકાય નહીં.

જો કે છેલ્લા 15 દિવસથી સંતાનોને સ્કૂલ નહી મોકલવાના નિર્ણયને વાલીઓએ શિક્ષણાધિકારીની મુલાકાત બાદ બદલતાં બાળકોને હવે સ્કૂલે મોકલવાનો નિર્ણય લીધો હતો.