અમદાવાદ મ્યુનિસિપલ કમિશનર દ્વારા અમદાવાદ શહેરમાં નાઈટ રાઉન્ડની શરૂઆત કરવામાં આવી છે. આ ઉપરાંત AMC કમિશનરે અધિકારીઓને રાત્રે 10 વાગ્યા પછી શહેરના વિવિધ વિસ્તારોમાં રાઉન્ડ લેવાનો આદેશ કર્યો છે. ડેપ્યુટી મ્યુનિસિપલ કમિશનરથી લઈ તમામ અધિકારીઓને નાઈટ રાઉન્ડના આદેશ આપવામાં આવ્યા છે.
મ્યુનિ.કમિશનર દ્વારા શહેરમાં નાઈટ રાઉન્ડની શરૂઆત
AMC કમિશનરનો અધિકારીને આદેશ
સફાઈથી લઇ તમામ કામગીરીનું નિરીક્ષણ કરાશે
અમદાવાદ મ્યુનિસિપલ કોર્પોરેશનમાં મ્યુનિ.કમિશનર એમ થેન્નારેસન દ્વારા ચાર્જ સંભાળવામાં આવ્યા બાદ શહેરના તમામ વિસ્તારોમાં રાઉન્ડ લેવામાં આવ્યો હતો. રાઉન્ડ દરમિયાન કોર્પોરેશનમાં ચાલતી લાલિયાવાડી સામે આવી હતી. જે બાદ હવે મ્યુનિસિપલ કમિશનર દ્વારા એક પરિપત્ર જાહેર કરી શહેરમાં નાઈટ રાઉન્ડની શરૂઆત કરવામાં આવી છે.
ડેપ્યુટી મ્યુનિ.કમિશનરથી લઈ તમામ અધિકારીઓને નાઈટ રાઉન્ડના આદેશ
શહેરના લોકોને મ્યુનિસિપલ કોર્પોરેશન તરફથી પુરી પાડવામાં આવતી વિવિધ પ્રકારની પ્રાથમિક સુવિધાને વધુ સુદ્રઢ કરવા મ્યુનિસિપલ કમિશનરે તમામ ઝોનના ડેપ્યુટી મ્યુનિસિપલ કમિશનર, ઈન્ચાર્જ ડેપ્યુટી મ્યુનિસિપલ કમિશનર તથા આસીસ્ટન્ટ મ્યુનિસિપલ કમિશનરોને રાત્રિ રાઉન્ડ લેવા આદેશ કર્યો છે.
સફાઈથી સહિત કામોનું નિરીક્ષણ કરાશે
આ પરિપત્ર મુજબ, શહેરની મ્યુનિસિપલ હોસ્પિટલો, પ્લોટ્સ બગીચાઓ, બ્રીજ નીચેની જગ્યાઓ, શેલ્ટર હોમ, વોટર ડીસ્ટ્રીબ્યુશન સ્ટેશન / વોટર ટ્રીટમેન્ટ પ્લાન્ટ, સુએઝ ટ્રીટમેન્ટ પ્લાન્ટ, ડ્રેનેજ પંમ્પીગ સ્ટેશન, કાંકરીયા, રિવરફ્રન્ટ જેવા જાહેર સ્થળો, પરિવહન સેવાઓ, શહેરના જાહેર માર્ગો વગેરે જગ્યાએ અધિકારીઓએ રાઉન્ડ લેવાનો રહેશે. આ ઉપરાંત તમામ ઝોનમાં સ્ક્રેપીંગ, સફાઈ વગેરેના રાત્રી કામોનું આકસ્મિક ચેકીંગ કરવાનું રહેશે. મ્યુનિસિપલ મિલકતોની સ્વચ્છતાની ચકાસણી પણ કરવાની રહેશે.
રિપોર્ટ તૈયાર કરી મ્યુનિ. કમિશનરને સોંપવાનો રહેશે
તમામ અધિકારીઓએ દર મહિનાનો અને દરેક બાબતનો વિગતવાર રિપોર્ટ તૈયાર કરવાનો રહેશે. આ રિપોર્ટને તૈયાર કરીને મ્યુનિસિપલ કમિશનરને સોંપવાનો રહેશે.