ટેક્નોલોજી / લ્યો બોલો, હવે હિંદીમાં વાત કરશે એલેક્સા, આ ભાષાઓમાં પણ ઉપલબ્ધ થશે ડિવાઇસ

સ્માર્ટફોનનો સ્માર્ટ ઉપયોગ કરતા લોકો ગુગલના ગુગલ આસીસ્ટન્ટ,એપલના સીરી કે અમેઝોનના એલેકસા જેવા વર્ચ્યુઅલ આસીસ્ટન્ટથી પરિચિત છે અને તેનો યુઝ પણ કરતા હોય છે. ગુગલ આસીસ્ટન્ટ અનેક ભાષામાં તમારી સાથે વાત કરી શકે છે અને તમારી ડિમાન્ડ મુજબ માહિતી પુરી પાડે છે. વર્ચ્યુઅલ આસીસ્ટન્ટ હવે માત્ર મોબાઇલ પુરતા સીમિત નથી.

ટીવી, મ્યુઝીક સિસ્ટમ, મેપ્સ સહિત અનેક ઉપકરણો હવે તેનાથી સજજ થઇ રહ્યાં છે. ભારતના વિશાળ માર્કેટ અને કરોડો યુઝર્સને ધ્યાનમાં રાખીને હવે એમેઝોનની ટીમ એલેકસાને હિન્દી સહિતની ભાષાથી સજ્જ કરવા કામ કરી રહ્યા છે. અમેઝોનના વોઇસ બેઝડ વર્ચ્યુઅલ આસીસ્ટન્ટ એલેકસાથી સજજ સ્પીકર ખાસ્સા લોકપ્રિય છે. ઇન્ટરનેશનલ ડેટા કોર્પોરેશન મુજબ ભારતમાં સ્માર્ટ સ્પીકર્સના માર્કેટમાં એમેઝોન એકોનો હિસ્સો 59 ટકા છે. જયારે 39 ટકા ગુગલ હોમ્સ તરીકે જાણીતા સ્પીકર વેચાય છે.

અમેઝોને હવે ભારતીય ભાષા તરફ ફોકસ કર્યું છે.ટુંક સમયમાં હવે એલેકસા તમારી સાથે હિન્દી, ગુજરાતી સહિતની ભારતીય ભાષામાં વાત કરી શકશે. ભારતીય ભાષમાં વર્ચ્યુઅલ આસીસ્ટન્ટ બનાવવામાં ટેક કમપનીઓને સૌથી મોટી મુશ્કેલી એ છે કે આપણા ત્યાં બાર ગાઉએ બોલી બદલાય તે કહેવત મુજબ એક ભાષાને એક જ રાજયનાં જુદા જુદા વિસ્તારનાં લોકો અલગ અલગ રીતે બોલે છે. તેથી વર્ચ્યુઅલ આસીસ્ટન્ટ તે તમામને સમજી શકે તેવો શબ્દોનો ડેટાબેઝ ઉભો કરીને તેને યોગ્ય રીતે પ્રોસેસ કરે તેવું સોફટવેર બનાવવું તે મોટો પડકાર છે.

રસપ્રદ વાત એ છે કે કોઇ માણસ જેમ નવી ભાષા શીખે ત્યારે નવા નવા શબ્દો શીખતો જોય તે રીતે વર્ચ્યુઅલ આસીસ્ટન્ટ પણ શીખે છે. લોકો જેમ તેનો વધુ ઉપયોગ કરે તેમ તેમ મશીન લર્નીંગથી વર્ચ્યુઅલ આસીસ્ટન્ટની ભાષા પણ સમૃધ્ધ થતી જાય છે.