સલમાન ખાનની રાધે : યોર મોસ્ટ વોન્ટેડ ભાઈ અને અક્ષય કુમારની લક્ષ્મીબમ બાદ હવે અજય દેવગણની આગામી ફિલ્મ ભુજ : ધ પ્રાઈડ ઓફ ઈન્ડિયા પર ઓનલાઈન પ્લેટફોર્મ પર રિલીઝ થવાના સમાચારઆવી રહ્યાં છે. કોરોનાને કારણે દેશમાં જે રીતની સ્થિતિ છે, તેને જોતા મેકર્સ હવે ફિલ્મોની રિલીઝ માટે રોકી રાખવા માગતા નથી અને ઓટીટી પ્લેટફોર્મ પર રિલીઝ કરવાની તૈયારી કરી રહ્યાં છે.
અજયના ફેન્સ માટે સારાં સમાચાર
હવે અજય દેવગણની ફિલ્મ ઓટીટી પ્લેટફોર્મ પર થશે રિલીઝ
એક રિપોર્ટ અનુસાર, ડિરેક્ટર અભિષેકની આ ફિલ્મના શૂટિંગનું થોડું કામ બાકી છે જેને પૂરું કરતા જ તેને ઓટીટી પ્લેટફોર્મ પર રિલીઝ કરી દેવામાં આવશે. મેકર્સ આવો નિર્ણય કદાચ એટલા માટે લઈ રહ્યાં છે કારણ કે, લોકડાઉન ખુલ્યા બાદ પણ લોકો ભાગ્યે જ ભીડની વચ્ચે થિયેટરમાં
જવાનું પસંદ કરશે. આ જ કારણે અજય દેવગણ અને સંજય દત્તની આ ફિલ્મને થિયેટરને બદલે ઓટીટીપ્લેટફોર્મ પર રિલીઝ કરવાનો નિર્ણય લીધો છે. આ રિપોર્ટમાં જણાવવામાં આવ્યું છે કે, મેકર્સ આ ફિલ્મ માટે સારી ડિલના પ્રયત્નોમાં જોડાયેલા છે. જોકે, આ અંગે હજુ સુધી કોઈ ઓફિશિયલ નિવેદન આવ્યું નથી.
કોરોના વાયરસને કારણે થયેલા લોકડાઉનને કારણે બોલિવૂડની કમાણીને પણ બહુ મોટો ઝટકો લાગ્યો છે. તમામ ફિલ્મોની રિલીઝ અને શૂટિંગ અટકેલા છે. જોકે, મહારાષ્ટ્ર સરકાર તરફથી કોરોના અંગે કેટલીક શરતો સાથે ફિલ્મના શૂટિંગ શરૂ કરવાની વાત કહેવામાં આવી છે. ત્યારે હાલમાં જ અજયની ફિલ્મ ભુજ અને મેદાનની રિલીઝ ડેટ આગળ વધારવાના સમાચાર આવ્યા હતા.
1971ની ભારત-પાકિસ્તાન લડાઈ પર બનેલી ફિલ્મ ભુજ: ધ પ્રાઈડ ઓફ ઈન્ડિયાને પહેલા સ્વતંત્રતા દિવસ નિમિત્તે 15 ઓગસ્ટ 2020ના રોજ રિલીઝ કરવાની હતી. ત્યારબાદ રિપોર્ટ આવ્યા
કે, આ ફિલ્મને હવે વિજય દિવસ એટલે કે 16 ડિસેમ્બર 2020ના રોજ રિલીઝ કરવામાં આવશે, કારણ કે આ જ દિવસ 1971માં ભારતે પાકિસ્તાનને હરાવ્યું હતું.
આ વર્ષે જાન્યુઆરીમાં ફિલ્મનો ફર્સ્ટ લુક રજૂ કરવામાં આવ્યો હતો, જેમાં અજય દેવગણનો લુક ખૂબ જ ઈમ્પ્રેસિવ દેખાઈ રહ્યો હતો. ફિલ્મમાં અજય દેવગણ સ્ક્વોડ્રન લીડર વિજય કર્ણિકનું પાત્ર ભજવી રહ્યો છે જેમણે ભુજમાં એરબેઝ તૈયાર કર્યો હતો. આ પહેલીવાર હશે જ્યારે અજય એરફોર્સ અધિકારીના રોલમાં જોવા મળશે. જોકે, ચર્ચા એવી પણ છે કે, ફિલ્મનું ઘણું શૂટિંગ હજુ બાકી છે. આ ફિલ્મમાં અજયની સાથે સંજય દત્ત, સોનાક્ષી સિંહા, શરદ કેલકર અને નોરા ફતેહી પણ છે.