વિવાદ / રાતો રાત એર ઇન્ડિયાએ 50 પાયલોટ્સને નોકરીમાંથી કાઢી મુકતા હોબાળો

ડિપાર્ટમેન્ટ ઓફ ટ્રેઇનિંગ એન્ડ પર્સનલ દ્વારા આદેશ અપાતા રાતોરાત એર ઇન્ડિયાના 50 પાયલોટને નોકરીમાંથી છુટા કરી દેવામાં આવ્યા છે. પાયલોટ ઉપરાંત ઘણા કૃ મેમ્બર્સનો પણ કોન્ટ્રાકટ રિન્યુ કરવામાં આવ્યો નથી. આમ તેમની નોકરી પણ છીનવાઈ ગઈ છે. 

દક્ષિણ ક્ષેત્રમાં 18 કેબિન કૃ મેમ્બર્સની સેવાઓ સમાપ્ત કરી દેવાઈ

ICPAના પત્રમાં જણાવાયું છે કે 50 પાયલોટ્સને કંપનીના નિયમોના ભંગ બદલ ડિપાર્ટમેન્ટ ઓફ ટ્રેઇનિંગ એન્ડ પર્સનલ દ્વારા ગેરવ્યાજબી ટર્મિનેશન લેટર મળ્યા છે. સંગઠને એક ટ્વિટમાં એમ પણ કહ્યું છે કે અમારા 50 પાયલોટ્સની સેવાઓ યોગ્ય પ્રક્રિયાને અનુસર્યા વિના રાતોરાત જ સમાપ્ત કરી દેવામાં આવી છે. આ મહામારી સમયે દેશની સેવા કરનારા પાયલોટ્સ માટે આ જબરદસ્ત આંચકો છે. આ ઉપરાંત, દક્ષિણ ક્ષેત્રના ઘણા કેબિન કૃ મેમ્બર્સ જેમણે તેમની પાંચ વર્ષની નોકરીની મુદત પૂર્ણ કરી છે તેના માટે કોન્ટ્રાકટ રિન્યુઅલ કરવામાં આવ્યું નથી. આવા મેમ્બર્સની સંખ્યા લગભગ 18 હોવાનું જાણવા મળ્યું છે. 

એર ઈન્ડિયાના સીએમડીને લખેલા પત્રમાં પાયલોટ્સ એસોસિએશને જણાવ્યું છે કે ગયા વર્ષે રાજીનામું આપ્યા બાદ 6 મહિનાની નોટિસ પિરિયડમાં રાજીનામુ પાછું ખેંચી લેનાર પાયલોટ્સને ગુરુવારે રાત્રે 10 વાગ્યે અચાનક સેવામુક્ત કરવામાં આવ્યા છે. પાયલોટ્સનો દાવો છે કે કૃને તેમના રાજીનામાની સ્વીકૃતિ અને ત્યારબાદના નોટિસ પિરિયડ વિશે માહિતી આપવામાં આવી ન હતી. 13 ઓગસ્ટે ઓફિસ બંધ થયા પછી સ્પષ્ટ થઈ ગયું કે આ પાયલોટ્સની સેવાઓ પણ સમાપ્ત થઈ ગઈ છે. 

ઓપરેશન મેન્યુઅલ અને સર્વિસ રૂલ્સની વિરુદ્ધ છે આ ટર્મિનેશન

ICPAએ કહ્યું કે સેવાઓ સમાપ્ત થયા બાદ ફલાઇટ ડ્યુટી લગાવવી એ સુરક્ષાના અધિનિયમોનું ગંભીર ઉલ્લંઘન છે. ICPAએ કહ્યું કે ઉડ્ડયન મંત્રાલય અને એર ઇન્ડિયાએ ભરોસો અપાવ્યો હતો કે તેઓ અન્ય એરલાઇન્સની જેમ કર્મચારીઓને કાઢી નહીં મૂકે. એસોસિએશને એમ પણ કહ્યું કે રાતોરાત ટર્મિનેશન લેટર જાહેર કરવું એર ઇન્ડિયાના ઓપરેશન મેન્યુઅલ અને સર્વિસ રૂલ્સની વિરુદ્ધ છે. ડિપાર્ટમેન્ટ ઓફ ટ્રેઇનિંગ એન્ડ પર્સનલે પાયલોટોને હટાવ્યા પહેલાની પ્રક્રિયાનું વ્યવસ્થિત પાલન કર્યું નથી.