અમદાવાદ મ્યુનિસિપલ કોર્પોરેશને કોવિડ 19ના ટેસ્ટમાં વિક્રમજનક 4197 જેટલો રેટ હાંસલ કર્યો છે. અર્થાત દર 10 લાખ લોકોએ તોતિંગ 4197 ટેસ્ટ થયા છે. આ આંકડો આખા દેશમાં સૌથી વધારે છે. આ કારણોસર વધારે ટેસ્ટ થવાને કારણે શહેરમાં કેસની સંખ્યા વધારે જણાય છે જયારે હકીકતમાં દેશના અન્ય ભાગોમાં પણ મોટી સંખ્યામાં કેસીસ છે પણ તે ટેસ્ટ ન થવાને લીધે સત્તાવાર રીતે જાહેર નથી થયા એવું નિષ્ણાતોનું માનવું છે.
અમદાવાદનો ટેસ્ટ રેટ દિલ્હીના ટેસ્ટ રેટ કરતા 3 ગણો વધારે
56101 ટેસ્ટ આખા રાજ્યભરમાં થયા છે જેમાંથી 44.45% ટેસ્ટ તો ખાલી અમદાવાદ શહેરમાં થયા છે
AMCના કમિશનર વિજય નહેરાએ કહ્યું કે શહેરમાં 22902 ટેસ્ટ લેબોરેટરીમાં અને 2038 ટેસ્ટ ટેસ્ટ કીટ વડે થતા કુલ 24940 ટેસ્ટ થયા છે જેને શહેરની વસ્તીના સંદર્ભમાં લેતા દર 10 લાખ લોકોએ 4197 ટેસ્ટ થયા છે.
નહેરાએ મંગળવારે કહ્યું કે અમદાવાદમાં દેશના ટેસ્ટ રેટ પ્રતિ મિલિયન એટલે કે 10 લાખ લોકો દીઠ ટેસ્ટની સંખ્યા ભારતમાં સૌથી વધુ છે. આ રેટ દિલ્હીના ટેસ્ટ રેટ કરતા 3 ગણો વધારે છે જે પ્રદેશ પહેલા દેશમાં ટેસ્ટ રેટના ટોચ ઉપર હતો.
AMCના સત્તાધિશોએ જણાવ્યું છે કે 56101 ટેસ્ટ આખા રાજ્યભરમાં થયા છે જેમાંથી 44.45% ટેસ્ટ તો ખાલી અમદાવાદ શહેરમાં થયા છે. અધિકારીઓએ એમ પણ જણાવ્યું હતું કે AMCની સઘન તપાસને પગલે જ શહેરમાં વધારે કેસ હોવાનું જણાય છે.
AMCના આરોગ્ય વિભાગના અધિકારીએ માહિતી આપતા કહ્યું હતું કે એપ્રિલના 4થા અઠવાડિયામાં AMCની સર્વેલન્સ ટીમે 5 લાખ ઘરોમાં ફરીને તોતિંગ 22.12 લાખ લોકોનું સ્ક્રીનિંગ કર્યું હતું જેમાંથી 4281 સેમ્પલ્સ લેવામાં આવ્યા હતા જે પૈકી 290 પોઝિટિવ આવ્યા હતા.
અત્યાર સુધી આ પ્રકારના સ્ક્રીનિંગ વડે AMCએ 18220 સેમ્પલ્સ લીધા છે જે પૈકી 1263 સેમ્પલ્સ પોઝિટિવ આવ્યા છે.