અમદાવાદ: દત્ત બંગલોઝમાં મોડી રાતે ફાયરિંગની ઘટના 2 લોકો થયાં ઘાયલ

અમદાવાદ: શહેરના સોલા વિસ્તારમાં આવેલા દત્ત બંગલોઝમાં મોડી રાત્રે ફાયરિંગની ઘટના બની હતી. સામાન્ય ઝગડામાં સમગ્ર મામલો વણસ્યો હતો અને એક વ્યક્તિ એ 5 રાઉન્ડ ફાયરીંગ કર્યું હતું. જેમાં 2 લોકો ઇજાગ્રસ્ત થયાં હતા.નવરાત્રીના તહેવાર દરમ્યાન શહેરના સોલા વિસ્તારમાં આવેલા દત્ત બંગલોઝમાં રહીશો ગરબા રમતા હતા. 

તે દરમ્યાન ફાયરિંગ ની ઘટના બનતા સમગ્ર વિસ્તારમાં હાહાકાર મચી ગયો હતો. વાત જાણે એમ છે કે સોલા વિસ્તારમાં આવેલા દત્ત બંગલોઝમાં આશરે 12 વાગ્યાની આસપાસ રહીશો ગરબા રમી રહ્યા હતા. તે દરમ્યાન એક યુવક સોસાયટીમાંથી પુર ઝડપે પોતાનુ બાઈક હંકારીને ગયો. 

જેથી રહીશો તેને સમજાવવા ગયા કે નવરાત્રી છે જેથી આટલી પુર ઝડપે વાહન ન ચલાવ નહીં તો સોસાયટી ના કોઈ સભ્યને ઈજા થઈ થશે. પરંતુ ત્યારબાદ મામલો પુરો થવાને બદલે વધુ વણસ્યો અને વાહન ચાલક યુવકના પિતા રિવોલ્વર લઈને ઘર ની બહાર ધસી આવ્યા અને 3 રાઉન્ડ હવામાં અને 2 રાઉન્ડ નીચે ફાયરિંગ કર્યું હતું. જેમાં એક મહિલા અને એક યુવક ઘવાયા હતા. જેમને સિવિલ હોસ્પિટલમાં સારવાર માટે ખસેડવામાં આવ્યા છે.



ઉલ્લેખનીય છે કે પોલીસ ને સમગ્ર ઘટનાની જાણ થતાં ઉચ્ચ પોલીસ અધિકારીઓ સહિત પોલીસ કાફલો તરત જ ઘટના સ્થળે પહોંચી ગયો હતો અને સમગ્ર ઘટના ને લઈને તપાસનો ધમધમાટ શરુ કર્યો હતો.

પોલીસની પ્રાથમિક તપાસમાં બહાર આવ્યું છે કે ફાયરિંગ કરનાર શખ્સનું નામ દોનાજી મારવાડી છે અને તે દત્ત બંગલોઝમાં છેલ્લા 10 વર્ષ કરતાં વધુ સમયથી રહે છે. હાલ તો સમગ્ર મામલે પોલીસે ગુનો નોંધી આરોપીની ધરપકડ કરી છે.