અમદાવાદ પોલીસ ઓપરેશન ક્લીનઅપના સિક્રેટ ઓપરેશનથી અજાણ હોવાના કારણે અનેક તર્ક વિતર્કો લગાવી રહ્યા હતા. જેના પગલે તમામ દારૂના અડ્ડા બંધ કરી દેવા દેવાયા હતા.
અમદાવાદમાં પાંચેક કલાક માટે દારૂના અડ્ડા બંધ થઇ ગયા હતા
બુટલેગરનો એક જ શબ્દ હતો કે માહોલ ગરમ છે
અફ્વાનો માહોલ ગરમ એટલે થયો હતો કે જેલમાં રેડ પાડવાની હતી
શુક્રવારની રાતે પાંચેક કલાક માટે અમદાવાદના તમામ ખૂણે ધમધમતા દારૂના અડ્ડા બંધ થઇ ગયા હતા જેની પાછળનું કારણ એ હતું કે પોલીસ કમિશનર સંજય શ્રીવાસ્તવ 100 ગાડી લઇને પોલીસના કાફલા સાથે અડ્ડાઓ પર રેડ કરવાના છે. જ્યારે પણ દારૂડિયા અડ્ડા પર દારૂ લેવા માટે જતા હતા ત્યારે બુટલેગરનો એક જ શબ્દ હતો કે માહોલ ગરમ છે. પોલીસ કમિશનર કાફલા સાથે રેડ પાડવા નીકળ્યા છે. અફ્વાનો માહોલ ગરમ એટલે થયો હતો કે ગૃહ રાજ્યપ્રધાન હર્ષ સંઘવીનું રાજ્યની તમામ જેલમાં રેડ કરવાનું સિક્રેટ ઓપરેશન હતું.
ખુદ પોલીસના અધિકારીઓ પણ અજાણ હતા.
અમદાવાદ પોલીસ ઓપરેશન ક્લીનઅપના સિક્રેટ ઓપરેશનથી અજાણ હોવાના કારણે અનેક તર્ક વિતર્કો લગાવી રહ્યા હતા. જેના પગલે તમામ દારૂના અડ્ડા બંધ કરી દેવા માટે પોલીસના વહીવટદારો તરફથી આદેશ કરી દેવાયા હતા. દારૂના અડ્ડાઓ ઉપર પોલીસ હલ્લા બોલ કરવાનું પણ ઓપરેશન હોય તેવું માનીને પોલીસના કેટલાક વહીવટદારોએ બુટલેગરોને એડ્વાન્સમાં સૂચના આપી દીધી હતી કે માહોલ ગરમ થવાનો છે અમારી સૂચના આવે નહીં ત્યાં સુધી દારૂનો ધંધો બંધ કરી દેજો. જ્યાં સુધી જેલમાં રેડનું ઓપરેશન શરૂ થયું નહીં ત્યાં સુધી અમદાવાદમાં તમામ દારૂના અડ્ડા બંધ થઇ ગયા હતા. જ્યારે જોઇન્ટ પોલીસ કમિશનર નીરજ બડગુર્જરની આગેવાનીમાં પાંચ ડીસીપી, છ એસીપી, સહિત પોલીસનો કાફલો ૩૦થી વધુ ગાડીમાં બેસીને સેન્ટ્રલ જેલ પહોંચ્યો અને બોડીવોર્ન કેમેરા સાથે સર્ચ કરવાનું શરૂ કર્યુ ત્યારે બુટલેગર તેમજ પોલીસના વહીવટદારોએ રાહતનો શ્વાસ લીધો હતો.
સર્ચ ઓપરેશન જેલમાં હતું ને પોલીસના વહીવટદારોની પોલ ખુલ્લી પડી ગઇ
ગૃહ રાજ્યપ્રધાન હર્ષ સંઘવીએ રાજ્યના પોલીસવડા વિકાસ સહાય તેમજ અમદાવાદ સહિત શહેરના તમામ પોલીસ કમિશનર અને જિલ્લાના એસપી સાથે વીડિયો કોન્ફરન્સથી મિટિંગ કરી હતી. જેમાં જેલમાં ઓપરેશન કરવાનો મુદ્દો સિક્રેટ હતો અને તમામ બોડીવોર્ન કેમેરા એક્ટિવ કરવાના આદેશ આપી દીધા હતા. બોડીવોર્ન કેમેરા એક્ટિવ કરીને કંટ્રોલરૂમ સાથે કનેક્ટ કરવાના આદેશ મળતાંની સાથે જ પોલીસ કર્મચારીઓ એલર્ટ થઇ ગયા હતા. દારૂ જુગારના અડ્ડાઓ ઉપર મેગારેડ થશે કે પછી ટ્રાફિક મામલે ડ્રાઇવ હશે તેવા અનેક તર્કવિતર્કો શરૂ થઇ ગયા હતા. દારૂના અડ્ડા પર મેગારેડ થશે તો પોલીસની આબરૂ જશે તેવું વિચારીને કેટલાક પોલીસ અધિકારીઓના હોશિયાર વહીવટદારોએ બુટલેગરોનો ટેલિફોનિક અને રૂબરુમાં જઇને જાણ કરી દીધી હતી કે રેડ થવાની છે થોડો સમય અડ્ડો બંધ રાખજો.
કમિશનર કોઇ પણ જગ્યાએ રેડ કરી શકે છે
પોલીસ કમિશનર સંજય શ્રીવાસ્તવ પ્રિવેન્શન ઓફ ક્રાઇમ બ્રાંચ (પીસીબી), ક્રાઇમ બ્રાંચ, લોકલ ક્રાઇમ બ્રાંચ, તેમજ ડીસીપી, એસીપી સહિત પોલીસનો કાફલો લઇને કમિશનર ઓફિસથી નીકળી ગયા છે. અમદાવાદના કોઇપણ ખૂણામાં ચાલતા અડ્ડાઓ પર રેડ કરી શકે છે રિસ્ક લેવા જેવું નથી એટલે જ્યાં સુધી અમારો આદેશ આવે નહીં ત્યા સુધી અડ્ડા બંધ કરી દેજો. જોકે પોલીસનો કાફલો સેન્ટ્રલ જેલમાં પહોચતાં અંતે તમામ બુટલેગર અને વહીવટદારે રાહતનો શ્વાસ લીધો હતો.