અમદાવાદ / સસ્તા સોનાની લાલચ આપી ગઠિયાએ વેપારી સાથે કરી રૂ.54 લાખની ઠગાઇ

અમદાવાદઃ ગુજરાતમાં સસ્તું સોનું આપવાની લાલચ આપીને છેતર‌િપંડી આચરતી ટોળકી પણ હવે ગુનાખોરીને અંજામ આપવા માટે સોશિયલ મીડિયાનો સહારો લઈ રહી છે. અમદાવાદમાં સોશિયલ સાઈટના માધ્યમથી સસ્તું સોનું આપવાની લાલચ આપીને સોનીઓ સાથે છેતર‌િપંડી આચરતી ટોળકી સક્રિય થઇ છે ત્યારે અમદાવાદ શહેરમાં છેલ્લા એક મહિનામાં સસ્તા સોનાની લાલચ આપીને લાખો રૂપિયા પડાવી લીધા હોવાનો ત્રીજો કિસ્સો પ્રકાશમાં આવ્યો છે.

સરખેજમાં મ‌િર્સડીઝ લઈને આવેલા બે ગઠિયા રાજસ્થાનના એક સોનીને સસ્તા સોનાની લાલચ આપીને ૫૪ લાખનો ચૂનો લગાવીને ફરાર થઇ  ગયા હતા. રાજસ્થાનના રાણીસતી મંદિર પાસે રહેતા રામ નિરંજન સોનીએ બે યુવકો વિરુદ્ધમાં સરખેજ પોલીસ સ્ટેશનમાં છેતરપિંડીની ફરિયાદ નોંધાવી છે. ફરિયાદમાં જણાવ્યા મુજબ  રામ નિરંજન સોની લક્ષ્મણગઢ ખાતે મીઠાઈનો મોટા પાયે ધંધો કરે છે.

રામ નિરંજન સોની થોડા દિવસ પહેલાં ફેસબુક પર સુમિત નારંગ નામના યુવક સાથે વાતચીત કરતા હતા ત્યારે સુમિત નારંગે તેના સોશિયલ સાઈટના ડીપીમાં સોનાના બિસ્કિટનો ફોટો મૂક્યો હતો. ત્યારબાદ રામ નિરંજન સોનીએ સુમિત નારંગનો  મોબાઈલ નંબર લીધો હતો. ત્યારબાદ સુમિતે  રામ નિરંજન સોની સાથે ફોન પર વાત કરતાં જણાવ્યું હતું કે હું ગોલ્ડનો વેપારી છું અને ગુજરાતમાં જથ્થાબંધ વેપાર કરું છું, જો તમારે લેવું હોય તો હું તમને બજારભાવ કરતાં ૧૦ ટકા ઓછા ભાવે આપીશ.

ત્યાર બાદ સુમિત નારંગે રામ નિરંજન સોનીને અમદાવાદ સોનું જોવા માટે બોલાવ્યા હતા. ત્યાર બાદ રામ નિરંજન સોની તેમના મિત્ર અનિલ ચૌધરી સાથે અમદાવાદ આવ્યા હતાં અને વિસલપુર પાસે સુમિત નારંગનો બંસી નામનો માણસ એક નંબર વગરની મ‌િર્સડીઝ કાર લઈને આવ્યો હતો. તે કારમાં રામ નિરંજન સોની અને તેમના મિત્રને  બેસાડીને સોનાનાં ત્રણ બિસ્કિટ સેમ્પલ તરીકે બતાવ્યાં હતાં અને  રામ નિરંજન સોનીએ સોનાનાં આ ત્રણ બિસ્કિટ જોતાં તેમને તે અસલી લાગ્યાં હતાં. ત્યાર બાદ રામ નિરંજન સોની અને તેમનો મિત્ર રાજસ્થાન જતા રહ્યા હતા.

રામ નિરંજન સોનીએ સુમિત નારંગ અને બંસી નામની વ્યક્તિના મોબાઈલ પર સોનાનાં બિસ્કિટ ખરીદવાની ઈચ્છા દર્શાવી હતી. તા ૧૯ જુલાઈના રોજ રામ નિરંજન સોની અને તેમના મિત્રને સુમિત અને બંસીએ સાણંદ ખાતે ફરી મળવા બોલાવ્યા હતા. જ્યાં સોનાનાં બિસ્કિટ લેવાનું નક્કી થયું હતું. ત્યારબાદ બંસી સોનું લઈને આવું છું તેમ કહીને ત્યાંથી જતો રહ્યો હતો અને રામ નિરંજન સોનીએ ચેક દ્વારા ર૩ લાખ બેન્કમાંથી ઉપાડી લીધા હતા.

થોડા સમય પછી બંસી આવતાં રામ નિરંજન સોનીએ કહ્યું કે ર૩ લાખનું ગોલ્ડ ખરીદવું છે તો બંસીએ  રામ નિરંજન સોનીને કહ્યું હતું કે અમે નાના વેપારીઓને સોનું વેચતા નથી અને મોટા વેપારીઓને સોનું આપીએ છીએ. આમ કહીને તે ત્યાંથી જતો રહ્યો હતો. રામ નિરંજન સોની અને તેમનો મિત્ર પણ પૈસા લઈને પાછા રાજસ્થાન જતા રહ્યા હતા, જોકે સુમિતે પાછા રામ નિરંજન સોનીને ફોન કરીને કહ્યું કે અમે ઓછામાં ઓછા બે કિલો જેટલા સોનાનું વેચાણ કરીએ છીએ, જેથી રામ નિરંજન સોનીને તેના પર વિશ્વાસ આવી જતાં તેમણે સોનું લેવાની હા પાડી હતી.

જો કે રામ નિરંજન સોની અને તેમનો મિત્રએ રૂ.પ૪ લાખ લઈને તાત્કાલિક એસપી રિંગરોડ ખાતે આવેલ કાકે કે ઢાબા પાસે  પહોંચીને સુમિતને ફોન કર્યો હતો, પરંતુ તેણે કહ્યું કે હું બહાર છું. બંસી આવે છે એવી વાત થઇ હતી. થોડી વાર પછી બંસીની કારમાં  રામ નિરંજન સોની અને તેમનો મિત્ર બેસી ગયા હતા. કારમાં  રામ નિરંજન સોનીએ બંસીને ૫૪ લાખ રૂપિયા આપ્યા હતા. બંસીએ  તે દરમિયાન અન્ય એક કાર મંગાવી હતી.

બંસીએ રામ નિરંજન સોનીને સોનાનાં બિસ્કિટ બીજી કારમાં છે તેમ કહીને તેમને ઉતારી દીધા હતા. તે દરમિયાન બંસી અને કારચાલક ફરાર થઇ ગયા હતા. રામ નિરંજન સોનીએ કારનો પીછો કર્યો હતો, પરંતુ તેણે કાર ઊભી રાખી ન હોતી. રામ નિરંજન સોનીએ  સરખેજ પોલીસ સ્ટેશનમાં સુમિત નારંગ, બંસી અને અન્ય એક યુવક વિરુદ્ધમાં ફરિયાદ નોંધાવી હતી. પોલીસે ફરિયાદના આધારે ગુનો દાખલ કરીને વધુ તપાસ હાથ ધરી છે.