અમદાવાદ / રેનબસેરામાં મફત ભોજન આપવાના ટેન્ડરને લઈ ભાજપ અને અધિકારીઓ વચ્ચે મતભેદ, ભ્રષ્ટાચારની ગંધ?

• આંગણવાડીમાં બાળકોને પોષણયુક્ત આહાર નથી અપાતો
• પ્રાયોગિક ધોરણે કોન્ટ્રાક્ટ આપવાનો હતો
• ચેરમેને મંજૂરી આપી દીધી

તંત્ર દ્વારા ઘરવિહોણા અને ફૂટપાથ પર આશરો લેતા ભિક્ષુકો તેમજ શ્રમિકો માટે રેનબસેરા ઊભા કરાયા છે. રેનબસેરામાં ભિક્ષુકો-શ્રમિકો આશરો લે તેવી ડ્રાઇવ પણ હાથ ધરાઇ છે, જોકે આશ્ચર્યજનક રીતે શ્રમિકો અને ભિક્ષુકો ફૂટપાથ છોડવા તૈયાર થતા નથી, જેના કારણે તંત્રે રેનબસેરામાં નવા આકર્ષણ તરીકે ભોજન આપવાનો સમાવેશ કર્યો છે. રેનબસેરામાં ભોજનનો લાખો રૂપિયાનો કોન્ટ્રાક્ટ અક્ષયપાત્ર સંસ્થાની ભગિની સંસ્થા સ્ટોન ફાઉન્ડેશન અને સ્ત્રી શક્તિ સંસ્થાને આપવાની તંત્રે સ્ટેન્ડિંગ કમિટીમાં દરખાસ્ત મૂકી હતી. આ દરખાસ્ત મુજબ એક સમયના ભોજનનાે એક વ્યક્તિદીઠ રૂ.ર૯નો ભાવ સંસ્થાને ચૂકવવાનો થતો હતો.

આંગણવાડીમાં બાળકોને પોષણયુક્ત આહાર નથી અપાતો

જોકે સ્ટેન્ડિંગ કમિટીમાં આ દરખાસ્તની ચર્ચા દરમ્યાન શાસક ભાજપના સભ્યોએ ભોજન પૂરુ પાડનારી સંસ્થાનો ઉગ્ર વિરોધ કર્યો હતો. આ સંસ્થા આંગણવાડીનાં બાળકોને સાવ હલકી ગુણવત્તાનું ભોજન પૂરું પાડતી હોઇ અન્ય સંસ્થાને કોન્ટ્રાક્ટ આપવાની ઉગ્ર રજૂઆત સભ્યોએ કરતાં ખુદ ચેરમેન અમૂલ ભટ્ટે પણ તેમાં સંમ‌િત દર્શાવી હતી. 

પ્રાયોગિક ધોરણે કોન્ટ્રાક્ટ આપવાનો હતો

ચેરમેન દ્વારા એક મહિનાના પ્રાયોગિક ધોરણે કોન્ટ્રાક્ટ અપાયા બાદ તે માટે ટેન્ડર બહાર પાડવાની સૂચના વહીવટીતંત્રને આપી હતી, જોકે તેમાં અગમ્ય કારણસર તંત્ર સંમત ન થતાં આ દરખાસ્તને મંજૂર કરાઇ હતી તેમ સ્ટેન્ડિંગ કમિટીના કેટલાક 'બોલકા' સભ્યોએ જણાવ્યું છે.

ચેરમેને મંજૂરી આપી દીધી

જોકે સ્ટેન્ડિંગ કમિટી પતી ગયા બાદ મીડિયા સાથેની વાતચીતમાં ચેરમેન ભટ્ટે રેનબસેરામાં ભોજન પૂરું પાડવાના કોન્ટ્રાકટને મંજૂરી આપી છે તેવી માહિતી આપતાં જાણકાર વર્તુળોમાં આશ્ચર્ય ફેલાયું હતું.