શહેરમાં નકલી પોલીસનો આતંક વધી રહ્યો છે. હાલમાં સેન્ટ્રલ એજન્સીઓના નામે વાહનચાલકો અને લોકો પાસેથી રૂપિયા પડાવતી ગેંગ સક્રિય થઈ છે. શહેરકોટડામાં થોડાક દિવસ પહેલાં નકલી ડીવાયએસપીનો ભાંડો ફૂટ્યા બાદ ગઈ કાલે વધુ બે બોગસ પોલીસ કર્મચારીઓનો ભાંડો ફૂટ્યો છે.
કાંકરિયા રેલવેયાર્ડ પાસે બે શખ્સોએ વેપારીને ક્રાઇમ બ્રાન્ચની ઓળખ આપી તેની કારમાં બેસી લાફા ઝીંકી દીધા બાદ ખોટા કેસમાં ફસાવી દેવાની ધમકી આપીને ૪૦ હજાર પડાવ્યા હોવાનો કિસ્સો પ્રકાશમાં આવ્યો છે. કાગડાપીઠ પોલીસ દ્વારા બે યુવક વિરુદ્ધમાં ગુનો નોંધાતાં તપાસનો ધમધમાટ શરૂ કરાયો છે.
મણિનગર વિસ્તારમાં આવેલ કોષ્ટી સોસાયટીમાં રહેતા કશિશભાઈ કોષ્ટીએ કાગડાપીઠ પોલીસ સ્ટેશનમાં બે યુવકો વિરુદ્ધમાં ફરિયાદ કરી છે. કશિશભાઈ કોષ્ટી શાહીબાગના તાવડીપુરા ખાતે ઋષભ વુડન વર્ક્સ નામનું કારખાનું ધરાવે છે. કશિશભાઈ કોષ્ટીએ કરેલી ફરિયાદ મુજબ ગઇ કાલે સવારના અગિયાર વાગ્યાની આસપાસ પોતાની વર્ના કાર લઈને મણિનગરથી શાહીબાગ કારખાના પર જઈ રહ્યા હતા તે સમયે કશિશભાઈ કોષ્ટીના મોબાઈલ પર કોઇનો ફોન આવ્યો હતો.
જેથી તેઓ કાંકિરયા રેલવે યાર્ડ પાસે કાર ઊભી રાખીને વાતચીત કરતા હતા તે સમયે બે શખ્સ બાઇક લઈને તેમની પાસે આવ્યા હતા. બંને શખ્સોએ વેપારીને કહ્યું હતું કે તું અહીંયાં કેમ ઊભો છે, ખરાબ ધંધા કરવા આવ્યો છે, અમે પોલીસમાં છીએ અને ક્રાઇમ બ્રાન્ચથી આવીએ છીએ, તારી ગાડી આગળ લઇ લે.
ત્યારબાદ બંને શખ્સ વેપારીની કારમાં બેસી ગયા હતા અને ક્રાઇમ બ્રાન્ચ લઇ લે તેમ કહીને કારમાં જવાનું કહ્યું હતું. આ બંને શખ્સોએ વેપારીને જુદી જુદી જગ્યાએ ફેરવ્યા હતા અને બંને જણાએ વેપારીને ગાળો આપીને લાફા ઝીંકી દીધા હતા. બંને શખ્સોએ વેપારીને ખોટા કેસમાં ફસાવી દેવાની ધમકી આપીને તેમનું એટીએમ કાર્ડ માગ્યું હતું.
તેમણે વેપારીને નજીકના એટીએમ પાસે લઇ જઈ પિન નંબર માગીને ૪૦ હજાર કાઢી લીધા હતા. ત્યારબાદ બંને શખ્સે વેપારીની કારમાંથી ઊતરીને ધમકી આપી હતી કે જો કોઈને પણ આ વાતની જાણ કરીશ તો તને જાનથી મારી નાખીશ. આથી વેપારીએ તાત્કાલિક પોલીસ સ્ટેશન પહોંચીને બે યુવકો વિરુદ્ધમાં ફરિયાદ નોંધાવી હતી. પોલીસે ગુનો નોંધીને આસપાસના સીસીટીવી ફૂટેજ મેળવીને તેના આધારે તપાસ શરૂ કરી છે.
ઉલ્લેખનીય છે કે થોડા સમય પહેલાં શહેરમાં દિનેશ મહેરિયા નામનો યુવાન નકલી ડીવાયએસપી બનીને લોકો ઉપર રોફ જમાવતો હતો તેમજ વાહનચાલકો પાસેથી પૈસા પડાવતો હતો તે સમયે પોલીસ યુનિફોર્મમાં સજ્જ નકલી ડીવાયએસપી દિનેશને અસલી પોલીસે ઝડપી લીધો હતો તો શહેરના અન્ય વિસ્તાર જેવા કે મણિનગર, ઇસનપુરમાં નકલી પોલીસ બની તોડ કરતી ગેંગના આતંકના કિસ્સા અવારનવાર પ્રકાશમાં આવ્યા છે.
બીજી બાજુ અમદાવાદ શહેરમાં બે વર્ષમાં ૩પ નકલી પોલીસ ઝડપાયા છે. અમદાવાદ શહેર પોલીસે વિવિધ ગુનાઓ અંતર્ગત નકલી પોલીસને ઝડપી પાડ્યા હતા. અમદાવાદ શહેરમાં છેલ્લાં બે વર્ષ દરમિયાન આ કાર્યવાહી કરવામાં આવી હતી. વર્ષ ર૦૧૭-૧૮માં અમદાવાદ પોલીસની કાર્યવાહીમાં ૧૭ નકલી પોલીસ અને વર્ષ ર૦૧૮-૧૯માં ૧૮ નકલી પોલીસને ઝડપી પાડવામાં આવ્યા હતા. આ નકલી પોલીસ લોકોને પોલીસના નામે ડરાવી- ધમકાવીને પૈસા પડાવવાનું કામ કરતા હતા.
શોર્ટકર્ટથી રૂપિયા કમાવવા માટે કેટલાક લોકોએ પોલીસનો સ્વાંગ રચીને તોડપાણીના ધંધા શરૂ કર્યા છે. ખાસ કરીને હોટલો, જુગારિયા, દારૂડિયા, પ્રેમીપંખીડાં તથા બે નંબરના ધંધા કરતા લોકોને આ પ્રકારની ગેંગ ટાર્ગેટ કરતી હોય છે. થોડાક સમય પહેલાં ડીસીપી ઝોન-પની સ્કવોડ હોટલમાં જતાં કપલના ટોડ કરતી ગેંગનો પર્દાફાશ કર્યો હતો.